UJobe
2 Ungafaka intambo emakhaleni akhe yini,
Kumbe umbhoboze umhlathi ngewuka?
3 Kambe angakuncenga ukuthi umzwele,
Akhulume lawe kuhle?
4 Angenza isivumelwano lawe yini
Ukuze ahlale eyisigqili sakho?
5 Kambe ungamdlalisa angathi udlalisa inyoni,
Kumbe umbophe ngentambo ukuze amadodakazi akho amdlalise?
6 Abantu bangamthengiselana yini?
Abathengayo bangamqumelana yini?
7 Ungasibhoboza yini isikhumba sakhe ngengwegwe zensimbi,+
Loba umgwaze ekhanda ngemikhonto?
8 Beka isandla sakho phezu kwakhe ubone,
Impi ezavuka lapho ngeke uyikhohlwe futhi awusoze ukuphinde!
9 Ngeke umehlule loba sekutheni.
Ungambona nje uyadilikela phansi.*
10 Kakho olesibindi sokumhlokoza,
Manje ngubani ongamisana lami?+
11 Kulomuntu engilesikwelede sakhe yini okumele ngimbhadale?+
Phela konke okusemhlabeni ngokwami.+
12 Ngizakhuluma ngenyawo zikaLeviyathani,
Ngibabaze amandla akhe lomzimba wakhe omangalisayo.
13 Ngubani ongaxexebula isikhumba sakhe?
Nxa angavula umlomo wakhe ngubani ongasondela kuye?
14 Ngubani ongambamba ngenkani ukuthi avule umlomo wakhe?
Amazinyo akhe ayesabeka.
15 Emhlane ngamaxolo wodwa,
Njalo wonke anamathelene.
16 Ngalinye lithe nama kwelinye,
Lomoya awungeni.
17 Wonke nje abambene,
Anamathelene okokuthi ngeke uwehlukanise.
18 Nxa angathimula kuthi bayi ukukhanya.
Amehlo akhe angathi yimisebe yelanga liphuma.
19 Emlonyeni wakhe kuphazima imibane,
Kuphume inhlansi zomlilo.
20 Emakhaleni akhe kuthunqa intuthu,
Angathi yibhayila elunyathiswe ngamahlanga.
21 Ukuphefumula kwakhe kwenza amalahle avuthe,
Emlonyeni wakhe kuphuma ilangabi.
22 Entanyeni yakhe kulamandla amakhulu,
Konke okumbonayo kutshaywa luvalo.
23 Amavinqo asesiswini sakhe abambene,
Aqine njengensimbi, awanyikinyeki.
24 Inhliziyo yakhe iqine njengelitshe,
Iqine njengelitshe lokucholela.
25 Nxa angavuka kwethuka labalamandla,
Angatshaya amanzi ngolaka bayaphelelwa.
26 Akulankemba engamgwaza,
Loba umkhonto lomtshoko laloba yisiphi isikhali.+
27 Kuye insimbi ifanana lomhlanga,
Lekhopha injengesigodo esibolileyo.
28 Kawubalekeli umtshoko.
Angatshaywa ngamatshe esavutha kuba angathi utshaywe ngamahlanga.
29 Induku injengehlanga kuye,
Uyahleka nxa esizwa umsindo womkhonto.*
30 Isisu sakhe silamaxolo anjengezicucu zembiza yomdaka,
Angahamba edakeni kusala kungathi kudlule isileyi sokubhula.*+
31 Wenza amanzi asekujuleni abile njengembiza,
Uyalugoqoza ulwandle angathi yimbiza yamafutha.
32 Lapho adlule khona utshiya kulamagwebu amhlophe.
Inziki yolwandle isale ingathi ilenwele ezimhlophe.
33 Akulalutho emhlabeni olufanana laye,
UNkulunkulu wamenza wangesabi lutho.
34 ULeviyathani ukhangela konke okuziphakamisayo,
Uyinkosi yezinyamazana ezilamandla.”