UJohane Ubhaphathiza uJesu

KHANGELA ijuba lisehlela phezu kwekhanda lendoda le. Indoda le nguJesu. Useleminyaka engu-30. Indoda ami layo nguJohane. Sesike safunda okuthile ngaye. Uyakhumbula yini lapho uMariya esiyavatshela isihlobo sakhe u-Elizabethi, umntwana owayesesiswini sika-Elizabethi wayeqa ngentokozo? Lowo mntwana owayesesiswini kwakunguJohane. Kodwa uJohane loJesu benzani khathesi?

UJohane usanda kucwilisa uJesu emanzini oMfula uJodani. Le yiyo indlela umuntu abhaphathizwa ngayo. Okwakuqala, uyacwiliswa emanzini abesephinda akhitshwe. UJohane ubizwa ngokuthi nguJohane uMbhaphathizi ngenxa yokuthi ubhaphathiza abantu. Kodwa kungani uJohane ebhaphathize uJesu?

UJohane wenze njalo ngoba uJesu ubuye wazocela uJohane ukuthi ambhaphathize. UJohane ubhaphathiza abantu abafuna ukutshengisa ukuthi bayazisola ngezinto ezimbi abayabe bezenzile. Kodwa uJesu wake wenza into embi angazisola ngayo yini? Hatshi, uJesu kakaze enze into embi ngoba uyiNdodana kaNkulunkulu evela ezulwini. Ngakho ucela uJohane ukuthi ambhaphathize ngenxa yesinye isizatho. Ake sibone ukuthi yisiphi leso sizatho.

UJesu wayengumbazi engakabuyi lapha kuJohane. Umbazi ngumuntu oyenza izinto ezinjengamatafula, izitulo lamabhentshi ngamapulanka. UJosefa, umkaMariya wayengumbazi njalo wafundisa uJesu ukubaza. Kodwa uJehova kathumanga iNdodana yakhe emhlabeni ukuthi ibe ngumbazi. Ulomsebenzi oqakathekileyo afuna iNdodana yakhe iwenze njalo isikhathi sesifikile sokuthi uJesu awenze. Ngakho ukuze uJesu atshengise ukuthi wabuya ukuzokwenza intando kaYise, uJesu ucela uJohane ukuthi ambhaphathize. Lokhu kuyamthokozisa yini uNkulunkulu?

Yebo kuyamthokozisa ngoba lapho uJesu ephuma emanzini, ilizwi elivela ezulwini lithi: ‘Lo yiNdodana yami, engithokoza ngayo.’ Ngemva kwalokho kukhanya angani amazulu ayavuleka njalo ijuba leli liyehla lizohlala ekhanda likaJesu. Kukhanya angani yijuba leqiniso kodwa akusilo juba leqiniso. Ngumoya ongcwele kaNkulunkulu.

Kodwa uJesu ulokunengi okumele acabange ngakho, ngakho uya endaweni ethuleyo okwamalanga angu-40. Elapho uSathane uza kuye. Kathathu, uSathane uzama ukuthi enze uJesu ephule umthetho kaNkulunkulu. Kodwa uJesu akavumi.

Ngemva kwalokho, uJesu uyaphenduka ahlangane lamadoda aba ngabalandeli bakhe bakuqala loba abafundi. Abanye babo ngu-Andreya, uPhetro (obizwa langokuthi Simoni), uFiliphu loNathaneli (obizwa langokuthi Bhatholomewu). UJesu labafundi laba abatsha basuka baye esigabeni saseGalile. EGalile bangena edolobheni laseKhana lapho okwakuvela khona uNathaneli. EseKhana, uJesu uya edilini lomtshado elikhulu njalo wenza isimangaliso sakhe sakuqala. Uyakwazi ukuthi wenzani? Untshintsha amanzi abe liwayini.