UJesu Ufundisa Esentabeni

KHANGELA uJesu ehlezi lapha. Ufundisa abantu bonke laba entabeni yaseGalile. Abaseduze laye ngabafundi bakhe. Ukhethe abayi-12 ukuthi babe ngabaphostoli. Abaphostoli ngabafundi bakaJesu abaqakathekileyo. Uyawazi yini amabizo abo?

KuloSimoni othiwa nguPhethro lomnewabo u-Andreya. KuloJakhobe lomnewabo uJohane. Kulomunye futhi umphostoli okuthiwa nguJakhobe, lomunye futhi okuthiwa nguSimoni. Kulabaphostoli ababili ababizwa ngokuthi Juda. Omunye wakhona nguJuda Isikariyothi njalo omunye nguJuda obizwa langokuthi nguThadewu. KuloFiliphi loNathaneli obizwa langokuthi nguBhatholomewu, kanye loMathewu loTomasi.

Wathi evela eSamariya uJesu waqalisa ukutshumayela esithi: ‘Umbuso wezulu useduze.’ Uyawazi yini umbuso? Unguhulumende kaNkulunkulu ongokoqobo. UJesu nguye inkosi yawo. Uzabusa esezulwini, abesesenza ukuthi emhlabeni kube lokuthula. Umbuso kaNkulunkulu uzakwenza ukuthi umhlaba wonke ube lipharadayisi elihle.

Elapha entabeni uJesu ufundisa abantu ngombuso. Uyabachasisela ukuthi: ‘Kumele lithandaze kanje: Baba wethu osezulwini, malihlonitshwe ibizo lakho. Umbuso wakho kawuze. Intando yakho yenziwe emhlabeni njengalokhu isenziwa ezulwini.’ Abantu abanengi bawubiza besithi ‘nguMthandazo weNkosi.’ Abanye bawuthi ‘nguBaba Wethu.’ Uyawazi ngekhanda yini?

UJesu ufundisa abantu indlela okumele baphathane ngayo. Uthi: ‘Yenza kwabanye lokho ofuna bakwenze kuwe.’ Nxa ungayenzelwa umusa awuthabi yini? Ngakho uJesu uthi kumele senzele abanye umusa. Epharadayisi elisemhlabeni kuzabamnandi ngoba abantu bonke bayabe sebesenza lokhu.