UJesu Usilisa Abagulayo

UJESU usilisa abagulayo kuyo yonke indawo lapho ahamba khona. Izimangaliso zikaJesu zikhulunywa emizini lasemadolobheni akuyo yonke indawo. Abantu baletha kuye abantu abagogekileyo, abangaboniyo labangezwayo endlebeni labanengi abagulayo. UJesu uyabasilisa bonke.

Sekudlule iminyaka emithathu uJohane ebhaphathize uJesu. UJesu utshela abaphostoli bakhe ukuthi masinyane nje uzahamba eJerusalema lapho azabulawa khona abesevuka kwabafileyo. Kodwa khathesi, uJesu ulokhe esilisa abagulayo.

Ngelinye ilanga uJesu ufundisa kuyiSabatha. ISabatha lilanga lamaJuda lokuphumula. Umfazi ombona emfanekisweni ubegula kakhulu. Wayegobile njalo engenelisi ukuma aqonde okweminyaka engu-18. UJesu ubeka izandla zakhe phezu komfazi lo, umfazi lo abeseqalisa ukuma aqonde. Uyasiliswa!

Lokhu kwenza abafundisi benkolo bazonde. Omunye wabo uyamemeza ebantwini esithi: ‘Ayisithupha amalanga okwenza umsebenzi. Kumele lizosiliswa ngalawo malanga hatshi ngeSabatha!’

Kodwa uJesu uthi: ‘Lina bantu ababi. Loba ngubani kini angakhulula idonki yakhe ukuthi iyenatha ngeSabatha. Manje kubi yini ukuthi umfazi lo, obegula okweminyaka engu-18 asiliswe ngeSabatha?’ Amazwi kaJesu enza amadoda la amabi abe lenhloni.

Sekudlule isikhathi, uJesu labaphostoli bakhe baya eJerusalema. Lapho besanda kuphuma edolobheni laseJerikho, iziphofu ezimbili ezicela uncedo zizwa ukuthi uJesu uyadlula. Ziyamemeza: ‘Jesu, sincede bo!’

UJesu ubiza amadoda la ayiziphofu abesewabuza: ‘Lifuna ukuthi ngilenzeleni?’ Bathi: ‘Nkosi, sicela usenze sibone.’ UJesu uthinta amehlo abo, bahle babone! Uyakwazi yini ukuthi uJesu uzenzelani izimangaliso lezi? Kungenxa yokuthi uthanda abantu njalo ufuna bakholwe kuye. Ngakho singaba leqiniso lokuthi nxa esebusa njengeNkosi akulamuntu ozagula futhi emhlabeni.