Entabeni yama-Oliva

OMBONA emfanekisweni nguJesu eseNtabeni yama-Oliva. Amadoda amane alaye ngabaphostoli bakhe u-Andreya, uPhetro, uJakhobe loJohane. Okubona phezulu emfanekisweni lithempeli likaNkulunkulu eliseJerusalema.

Sekudlule amalanga amabili uJesu ehambe eJerusalema ngedonki encane. KungoLwesibili. Ekuseni uJesu ubesethempelini. Ekhonale abaphristi bazame ukumbamba ukuze bambulale. Kodwa besabile ukumbulala ngoba abantu bayamthanda uJesu.

UJesu utshele abakhokheli benkolo labo wathi: ‘Lina zinyoka labantwana bezinyoka!’ UJesu ubatshele lokuthi uNkulunkulu uzabajezisa ngenxa yezinto zonke ezimbi abazenzayo. Esebatshelile, uJesu uya eNtabeni yama-Oliva. Khonale abaphostoli bakhe abane baqalisa ukumbuza imibuzo. Uyakwazi yini ukuthi bambuzani uJesu?

Abaphostoli babuza ngokuthi kuzakwenzakalani esikhathini esizayo. Bayakwazi ukuthi uJesu uzakhipha bonke ububi emhlabeni. Kodwa bafuna ukwazi ukuthi lokhu kuzakwenzakala nini. UJesu uzabuya nini futhi azobusa njengeNkosi?

UJesu uyakwazi ukuthi abalandeli bakhe abasemhlabeni abasoze benelise ukumbona nxa esephenduka. Lokhu kungenxa yokuthi uyabe esezulwini, yikho-ke abasoze benelise ukumbona ekhonale. UJesu utshela abaphostoli bakhe ezinye izinto ezizakwenzakala emhlabeni nxa esebusa njengeNkosi ezulwini. Yiziphi ezinye zakhona?

UJesu uthi kuzakuba lezimpi ezinkulu, abantu abanengi bazabe begula njalo belamba, ubugebengu buzakuba bunengi, njalo kuzakuba lokuzamazama komhlaba okukhulu. UJesu ubatshela lokuthi izindaba ezinhle zombuso kaNkulunkulu zizatshunyayelwa kuyo yonke indawo emhlabeni. Izinto lezi asiziboni yini zisenzakala khathesi? Siyazibona! Yikho-ke zisitshengisa ukuthi uJesu useqalisile ukubusa ezulwini. Uzakhipha bonke ububi obusemhlabeni masinyane.