Ukukhululwa Ejele

KHANGELA ingilosi le evule umnyango wejele. Ikhulula amadoda angabaphostoli bakaJesu. Ake sibone ukuthi kuyini okwenza bafakwa ejele.

Akukabi yisikhathi eside umoya ongcwele uthululelwe phezu kwabafundi bakaJesu. Lokhu yikho okwenzakalayo: UPhethro loJohane baya ethempelini eJerusalema ngelinye ilanga emini. Eduze lomnyango kulendoda eyazalwa igogekile. Abantu bayiletha lapha nsukuzonke ukuze izocela imali ebantwini abangena ethempelini. Lapho ibona uPhethro loJohane, icela ukuthi bayinike imali. Abaphostoli bazakwenzani?

Bayama, bayikhangele indoda le. UPhethro uthi: ‘Kangilayo imali, kodwa ngizakunika engilakho. Ngebizo likaJesu sukuma uhambe!’ UPhethro ubamba indoda le ngesandla sokudla, ibisisukuma iqalise ukuhamba. Lapho abantu bebona lokhu bayamangala njalo bayathokoza kakhulu ngesimangaliso lesi.

UPhethro uthi: ‘Isimangaliso lesi sisenze ngamandla kaNkulunkulu owavusa uJesu ekufeni.’ Yena loJohane besakhuluma kufika abanye abakhokheli benkolo. Bazondile ngenxa yokuthi uPhethro loJohane batshela abantu ngokuvuswa kukaJesu ekufeni. Ngakho bayababamba besebebafaka ejele.

Ngelanga elilandelayo abakhokheli benkolo baba lomhlangano omkhulu. UPhethro loJohane lendoda abayisilisileyo, bayabizwa. Abakhokheli benkolo bayabuza: ‘Liwathethe ngaphi amandla okwenza isimangaliso lesi.’

UPhethro ubatshela ukuthi basenze ngamandla kaNkulunkulu owavusa uJesu ekufeni. Abaphristi kabakwazi ukuthi benzeni ngoba ngeke baphike ukuthi isimangaliso lesi senzakele. Ngakho baxwayisa abaphostoli ukuthi bangasaphindi bakhulume ngoJesu. Sebenzenjalo babayekela bahambe.

Njengoba amalanga ehamba, abaphostoli baqhubeka besilisa abagulayo njalo betshumayela ngoJesu. Indaba eziphathelane lezimangaliso lezi zigcwala yonke indawo. Ngakho abantu abakwamanye amadolobho aseduze leJerusalema baletha abagulayo ukuze basiliswe ngabaphostoli. Lokhu kwenza abakhokheli benkolo babe lomhawu, ngakho babamba abaphostoli besebebafaka ejele. Kodwa kabahlali lapho isikhathi eside.

Ebusuku, ingilosi kaNkulunkulu ivula umnyango wejele njengoba ubona lapha. Ingilosi ithi: ‘Hambani liyekuma ethempelini liqhubeke likhuluma labantu.’ Ekuseni, abakhokheli benkolo bathuma amadoda athile ukuthi ayethatha abaphostoli ejele kodwa kababatholi. Amadoda la athola abaphostoli befundisa ethempelini. Bayabathatha bahambe labo ewolu leSanihedrini.

Abakhokheli benkolo bathi: ‘Siliqonqosele ukuthi lingaphindi likhulume ngoJesu kodwa seligcwalise iJerusalema lonke ngemfundiso yenu.’ Abaphostoli bayaphendula: ‘Kumele silalele uNkulunkulu njengombusi kulokuthi silalele abantu.’ Ngakho bayaqhubeka betshumayela “izindaba ezinhle.” Lokhu kuyisibonelo esihle kakhulu okumele sisilandele.