Ubukwazi Yini?
Kungani ibutho leNkosi uDavida lalilabantu bezinye izizwe?
EBUTHWENI likaDavida kwakulamadoda ayevela kwezinye izizwe njalo amanye akhona kwakunguZelekhi um-Amoni, lo-Uriya umHithi kanye lo-Ithima umMowabi.a (1 Imilan. 11:39, 41, 46) Kanti njalo ‘kwakulamaKherethi, lamaPhelethi lamaGithi.’ (2 Sam. 15:18) Kukhanya angani amaKherethi lamaPhelethi ayeyizihlobo zamaFilisti. (Hez. 25:16) AmaGithi wona ayevela edolobheni lamaFilisti okuthiwa yiGathi.—Josh. 13:2, 3; 1 Sam. 6:17, 18.
Kuyini okwenza uDavida wafaka abantu bezinye izizwe ebuthweni lakhe? Wayeqiniseka ukuthi babeqotho kuye lakuJehova. Ngokwesibonelo, esinye isichazamazwi okuthiwa yi-The New Interpreter’s Dictionary of the Bible nxa sikhuluma ngamaKherethi lamaPhelethi sithi: “Aqhubeka eqotho kuDavida ezikhathini ezazinzima kakhulu zokubusa kwakhe.” Akwenza njani lokhu? Ngesikhathi “wonke amadoda ako-Israyeli” etshiya iNkosi uDavida elandela ‘umuntu owayeluhlupho okwakuthiwa nguShebha,’ amaKherethi lamaPhelethi wona aqhubeka emsekela uDavida futhi amncedisa ukulwisana loShebha owayesehlamukile. (2 Sam. 20:1, 2, 7) Ngokuhamba kwesikhathi indodana kaDavida u-Adonija yazama ukuthatha ubukhosi kodwa amaKherethi lamaPhelethi aqhubeka eqotho kuDavida amncedisa ukuthi abeke uSolomoni, yena kanye owayekhethwe nguJehova ukuthi abe yinkosi.—1 Amakho. 1:24-27, 38, 39.
Omunye umuntu owayevela kwezinye izizwe owaqhubeka eqotho kuDavida kumnyama kubomvu ngu-Ithayi umGithi. U-Ithayi lebutho lakhe elalilamadoda angu-600 basekela uDavida ngesikhathi indodana yakhe u-Abhisalomu ihlamuka futhi ihuga amadoda ako-Israyeli ukuthi ahlamukele inkosi. Ekuqaliseni uDavida wathi kwakungadingeki ukuthi u-Ithayi alwe empini le ngenxa yokuthi wayengumuntu wezinye izizwe. Kodwa u-Ithayi wathi: “Ngifunga ngoJehova uNkulunkulu ophilayo, ngifunge langawe nkosi yami, lapho inkosi yami ezabe ikhona, lenceku yayo izakuba khonapho. Ngizimisele ukufa lawe!”—2 Sam. 15:6, 18-21.
U-Ithayi wayeqotho kuDavida inkosi eyayigcotshwe nguJehova
Lanxa amaKherethi, lamaPhelethi, lamaGithi ayengabantu bezinye izizwe, ayemhlonipha uNkulunkulu weqiniso uJehova kanye loDavida owayegcotshwe nguJehova ukuthi abe yinkosi. Kumele ukuthi uDavida wayewaqakathekisa kakhulu amadoda la ayeqotho kuye.
a Umthetho kaNkulunkulu okuDutheronomi 23:3-6 wawusithi ama-Amoni, lamaMowabi kwakungamelanga angene ebandleni lama-Israyeli. Umthetho lo wawungalisi abantu bezinye izizwe ukuthi bahlale labantu bakaNkulunkulu kumbe ukuthi babe lobudlelwano labo kodwa kukhanya wawungakuvumi ukuthi babe yizizalwane ezigcweleyo zesizwe sako-Israyeli. Khangela u-Insight on the Scriptures, Volume 1, ikhasi 95.