Indodana Elungileyo Lengalunganga

KHANGELA uKhayini lo-Abela khathesi. Bonke sebekhulile. UKhayini usengumlimi. Ulima amabele, izithelo, lemibhida.

U-Abela usefuya izimvu. Uthanda ukunakekela amawundlu amancane. Ayakhula abe yizimvu ezinkulu, yikho-ke u-Abela uselomhlambi wezimvu okumele aweluse.

Ngelinye ilanga uKhayini lo-Abela baletha isipho kuNkulunkulu. UKhayini ubuya lokudla akulimileyo. U-Abela ubuya lemvu yakhe enhle kakhulu. UJehova uyathokoza ngo-Abela langesipho sakhe. Kodwa kathokozi ngoKhayini langesipho sakhe. Uyakwazi ukuthi kungani?

Ayisikho ukuthi isipho sika-Abela singcono kulesikaKhayini. Kungenxa yokuthi u-Abela yindoda elungileyo. Uthanda umnewabo loJehova. Kodwa uKhayini mubi; kamthandi umnewabo.

Yikho uNkulunkulu utshela uKhayini ukuthi kumele antshintshe ukuziphatha kwakhe. Kodwa uKhayini kalaleli. Uzondile ngoba uNkulunkulu uthande u-Abela kulaye. Yikho uKhayini uthi ku-Abela, ‘Ake siye egangeni.’ Sebebodwa khonale, uKhayini utshaya umnewabo u-Abela. Umtshaya kakhulu aze ambulale. Uyabona yini ukuthi yinto embi le enziwa nguKhayini?

Lanxa u-Abela wafa, uNkulunkulu kamkhohlwanga. U-Abela wayelungile njalo uJehova kakhohlwa umuntu onjalo loba sekutheni. Yikho ngelinye ilanga uJehova uNkulunkulu uzamvusa u-Abela. Ngaleso sikhathi u-Abela ngeke afe futhi. Uzenelisa ukuphila lapha emhlabeni kuze kube nininini. Kuzakuba kuhle ukwazi abantu abanjengo-Abela.

Kodwa uNkulunkulu kathokozi ngabantu abanjengoKhayini. Yikho-ke uKhayini esebulele umnewabo, uNkulunkulu wamjezisa ngokumhambisa khatshana labangakibo. UKhayini wathi ehamba ukuyahlala kwenye ingxenye yomhlaba, wahamba lomunye udadewabo wasesiba ngumkakhe.

Ngokuhamba kwesikhathi uKhayini lomkakhe baqalisa ukuba labantwana. Amanye amadodana lamadodakazi ka-Adamu lo-Eva atshada, labo baba labantwana. Ngesikhatshana kwasekulabantu abanengi emhlabeni. Ake sifunde ngabanye babo.