UNowa Wakha Umkhumbi

UNOWA wayelomfazi lamadodana amathathu. Amabizo abo kwakunguShemu, loHamu loJafethi. Wonke amadodana kaNowa ayelabafazi. Yikho kwakulabantu abayisitshiyagalolunye emulini kaNowa.

UNkulunkulu wasesenza ukuthi uNowa enze into engajayelekanga. Wamtshela ukuthi akhe umkhumbi omkhulu. Kwakunjengomkhumbi omkhulu kodwa wawungani libhokisi elikhulu elibanzi. UNkulunkulu wathi: ‘Kawube ngamalunga engalo angamakhulu amane lamatshumi amane lanhlanu ukuphakama njalo wenze amakamelo kuwo.’ Amakamelo la ayengakaNowa lemuli yakhe lezinyamazana njalo ayengawokufakela ukudla ababezakudla.

UNkulunkulu watshela uNowa ukuthi alungise umkhumbi ukuze ungangeni amanzi. UNkulunkulu wathi: ‘Ngizathumela uzamcolo wamanzi emhlabeni, ngibhubhise konke okuphilayo ngaphansi kwezulu. Wonke umuntu ongekho emkhunjini uzakufa.’

UNowa lamadodana akhe balalela uJehova baqalisa ukwakha umkhumbi. Kodwa abanye abantu babahleka. Baqhubeka besenza okubi. Akulamuntu owamlalelayo uNowa lapho ebatshela lokho okwakuzakwenziwa nguNkulunkulu.

Kwathatha isikhathi eside ukwakha umkhumbi ngenxa yokuthi wawumkhulu kakhulu. Ngemva kweminyaka eminengi, umkhumbi waphela. Ngemva kwalokhu uNkulunkulu watshela uNowa ukuthi angenise izinyamazana emkhunjini. UNkulunkulu wamtshela ukuthi angenise izinyamazana zemihlobo yonke ngazimbili, ezinduna lezinsikazi. Kodwa wasemtshela ukuthi eminye imihlobo yezinyamazana ayingenise ngasikhombisa. UNkulunkulu watshela uNowa lokuthi angenise yonke imihlobo yezinyoni. UNowa wenza njengoba uNkulunkulu ayemtshelile.

Sekunjalo uNowa lemuli yakhe bangena emkhunjini. UNkulunkulu wasevala umnyango. Phakathi komkhumbi, uNowa lemuli yakhe bamelela. Akuzibone lawe usemkhunjini, ulabo, umelele. Wayezaba khona yini uzamcolo njengokutsho kukaNkulunkulu?