Umchilowamakhosikazi Wakuqala

UYAKWAZI yini ukuthi uNowa lemuli yakhe baqala ngokwenzani sebephumile emkhunjini? Wenza umnikelo noma wanika uNkulunkulu isipho. Uyambona yini emfanekisweni ekwenza lokhu? UNowa wanika uNkulunkulu isipho sezinyamazana ebonga uNkulunkulu ukuthi usindise imuli yakhe kuzamcolo omkhulu.

Ubona angani uJehova wasithanda yini isipho lesi? Ye, wasithanda. Yikho-ke wathembisa uNowa ukuthi wayengasoze futhi abhubhise umhlaba ngozamcolo.

Ngokuphangisa umhlaba wonke wawusuwomile, uNowa lemuli yakhe baqalisa impilo entsha bephandle komkhumbi. UNkulunkulu wababusisa wathi kubo: ‘Kumele libe labantwana abanengi njalo kumele liqhubeke lisiba banengi lize ligcwale umhlaba wonke.’

Kodwa ngokuhamba kwesikhathi nxa abantu babengezwa ngozamcolo babengesaba ukuthi wayezaphinda abuye futhi. Yikho-ke uNkulunkulu wenza kwabalento eyayizakhumbuza abantu ngesithembiso sakhe sokuthi wayengeke alethe futhi uzamcolo emhlabeni. Uyakwazi yini lokho uNkulunkulu akwenzayo ukuze abakhumbuze? Wenza umchilowamakhosikazi.

Umchilowamakhosikazi ujayele ukubonakala ilanga lingaphuma nxa izulu selinile. Umchilowamakhosikazi ungaba lemibala eminengi emihle. Wake wawubona yini? Uyawubona yini osemfanekisweni?

Nanku uNkulunkulu akutshoyo: ‘Ngiyathembisa ukuthi kakusoze kuphinde kubhujiswe abantu lezinyamazana ngozamcolo futhi. Sengifaka umchilo wami wamakhosikazi emayezini. Lapho umchilowamakhosikazi uvela, ngizawubona besengikhumbula isithembiso sami lesi.’

Yikho-ke kuyini okumele ukukhumbule ungabona umchilowamakhosikazi? Ye, kumele ukhumbule isithembiso sikaNkulunkulu sokuthi kasoze abhubhisa futhi umhlaba ngozamcolo.