Abantu Bakha Umphongolo Omkhulu

KWADLULA iminyaka eminengi. Amadodana kaNowa aba labantwana abanengi. Labantwana babo bakhula basebesiba lababo abantwana. Ngesikhatshana kwaba labantu abanengi emhlabeni.

Omunye walabo bantu kwakungumzukulu kaNowa okuthiwa nguNimrodi. Wayeyindoda eyayisenza okubi, eyayizingela njalo ibulala izinyamazana labantu. UNimrodi wazenza inkosi ukuze abuse abanye abantu. UNkulunkulu wayengamthandi uNimrodi.

Ngesikhathi leso bonke abantu babekhuluma ulimi olulodwa. UNimrodi wayefuna ukubagcina bendawonye ukuze ababuse. Uyakwazi ukuthi wenzani? Watshela abantu ukuthi bakhe idolobho elikhulu elilomphongolo omkhulu. Uyababona yini emfanekisweni besenza izitina?

UJehova uNkulunkulu kasithandanga isakhiwo lesi. UNkulunkulu wayefuna abantu baphume njalo bahlale kuwo wonke umhlaba. Kodwa abantu bathi: ‘Zwanini, kasizakheleni idolobho libe lomphongolo ofika ezulwini, besesisiba lodumo!’ Abantu babezifunela udumo hatshi ukuthi uNkulunkulu abe lodumo.

Yikho uNkulunkulu wenza bekela ukwakha umphongolo. Uyakwazi ukuthi wakwenza njani lokhu? Masinyane nje, wenza abantu baqalisa ukukhuluma ngezindimi ezitshiyeneyo kulokuthi bakhulume ulimi olulodwa. Ababesakha babengasazwanani. Yikho idolobho labo lacina selithiwa yiBhabheli noma ukuthi iBhabhiloni, okutsho “Ukuphambaniseka.”

Abantu baqalisa ukusuka eBhabheli. Amaqembu abantu ababekhuluma ulimi olufananayo ahamba ayahlala ndawonye kwezinye indawo zomhlaba.