UmkaLothi Wakhangela Emuva

ULOTHI lemuli yakhe babehlala ndawonye lo-Abhrahama eKhenani. Ngelinye ilanga u-Abhrahama wathi kuLothi: ‘Umhlaba kaweneli izifuyo zethu zonke. Kasehlukane. Ungaya le mina ngizakuya kwenye indawo.’

ULothi wawukhangela umhlaba. Wabona indawo enhle yelizwe eyayilamanzi lotshani obuhle obunengi obabungadliwa yizifuyo. Le kwakuyindawo yaseJodani. ULothi wathutha wahamba lemuli yakhe kuleyondawo. Bacina sebehlala edolobheni laseSodoma.

Abantu beSodoma babesenza izinto ezimbi kakhulu. ULothi kakuthandanga lokhu ngenxa yokuthi wayeyindoda elungileyo. UNkulunkulu laye kakuthandanga lokhu. UNkulunkulu wacina esethume izingilosi ezimbili ukuthi zixwayise uLothi ukuthi uNkulunkulu wayezabhubhisa iSodoma ledolobho eliseduze okuthiwa yiGomora ngenxa yobubi obabukhona kulezondawo.

Izingilosi zatshela uLothi zathi: ‘Phangisani! Thatha umkakho lamadodakazi akho womabili lisuke lapha!’ ULothi lemuli yakhe babesenza bephuza yikho izingilosi zacina sezibabamba ngezandla zabakhuphela phandle kwedolobho. Enye ingilosi yathi: ‘Balekani lisindise impilo zenu! Lingakhangeli emuva. Balekelani ezintabeni ukuze lingabhujiswa.’

ULothi lamadodakazi akhe balalela babaleka eSodoma. Kabazange bame ngitsho, njalo kabazange bakhangele emuva. Kodwa umkaLothi kazange alalele. Sebehambe umangwana besuka eSodoma, wama wakhangela emuva. UmkaLothi wasesiba yisiduli setswayi. Uyambona yini emfanekisweni?

Singafunda isifundo esihle kulokhu. Kutshengisa ukuthi uNkulunkulu usindisa labo abamlalelayo, kodwa labo abangamlaleliyo bazabhujiswa.