Abesifazana Ababili Abalesibindi

LAPHO ama-Israyeli esiba lohlupho, ayakhala kuJehova. UJehova ubaphendula ngokubanika abakhokheli abalesibindi ukuze babancede. IBhayibhili libiza abakhokheli laba ngokuthi abahluleli. UJoshuwa nguye umahluleli wakuqala, njalo abanye abahluleli abamlandelayo kwakuthiwa ngu-Othiniyeli, u-Ehudi loShamigari. Kodwa abanye abanceda ama-Israyeli ngabesifazana ababili okuthiwa nguDibhora loJayeli.

UDibhora ungumphrofethikazi. UJehova umnika ulwazi ngekusasa, yena abesetshela abantu ukuthi uJehova uthini. UDibhora ungumahluleli futhi. Uhlala ngaphansi kwesihlahla selala elizweni lezintaba njalo abantu babuya kuye ukuze bazothola uncedo ngenhlupho zabo.

Ngesikhathi lesi uJabhini uyinkosi yaseKhenani. Ulenqola zempi ezingu-900. Ibutho lakhe lilamandla okokuthi ama-Israyeli acindezelwe ukuthi abe yizinceku zakhe. USisera nguye owayelawula ibutho leNkosi uJabhini.

Ngelinye ilanga uDibhora ubiza uMahluleli uBharakhi athi kuye: ‘UJehova uthi: “Thatha amadoda angu-10 000 ubakhokhelele eNtabeni iThabhori. Ngizaletha uSisera kuwe. Ngizakwenza ukuthi umnqobe yena lebutho lakhe.” ’

UBharakhi utshela uDibhora: ‘Ngizahamba nxa uzahamba lami.’ UDibhora uhamba laye, kodwa uthi kuBharakhi: ‘Udumo alusoze lube ngolwakho ngoba uJehova uzanikela uSisera kowesifazana.’ Lokhu yikho kanye okwenzakalayo.

UBharakhi wehla eNtabeni iThabhori ukuze ayehlangana loSisera lebutho lakhe. UJehova wenza ukuthi kube lamanzi amanengi njalo abanengi ebuthweni lesitha bayagalula. Kodwa uSisera wehla enqoleni yakhe abaleke.

Ngemva kwesikhatshana, uSisera ufika ethenteni likaJayeli. UJayeli uyamngenisa, amuphe uchago lokunatha. Lokhu kumenza abe lobuthongo njalo masinyane usejumekile. UJayeli uthatha isikhonkwane sethente abesesibethelela ekhanda lendoda le embi. Ngemva kwesikhathi lapho uBharakhi efika, uJayeli umtshengisa uSisera osefile! Ngakho uyabona ukuthi lokho uDibhora ayekutshilo kwenzakala.

INkosi uJabhini layo icina ibulewe, ama-Israyeli aphinde abe lokuthula okwesikhatshana.