UGidiyoni Lamadoda Akhe Angu-300

UYABONA yini okwenzakala lapha? Bonke laba ngamadoda ako-Israyeli alwa impi. Amadoda aguqileyo anatha amanzi. UMahluleli uGidiyoni nguye ome eduze kwawo. Ukhangele ukuthi anatha njani amanzi.

Khangelisisa indlela ezitshiyeneyo amadoda la anatha ngayo. Abanye bafake ubuso babo emanzini. Kodwa omunye unatha ngesandla ukuze akhangele ukuthi kwenzakalani emaceleni. Lokhu kuqakathekile ngoba uJehova utshele uGidiyoni ukuthi akhethe amadoda akhangela okwenzakala emaceleni nxa enatha. UNkulunkulu uthe bonke abanye babuyele emakhaya abo. Ake sibone ukuthi kungani.

Ama-Israyeli asengozini enkulu futhi. Isizathu yikuthi abalalelanga uJehova. Abantu bakoMidiyani sebelamandla ukudlula ama-Israyeli njalo babazwisa ubuhlungu. Ngakho ama-Israyeli acela ukuthi uJehova abancede njalo uJehova uyasilalela isicelo sawo.

UJehova utshela uGidiyoni ukuthi athathe ibutho, ngakho uGidiyoni ubutha amadoda alwa impi angu-32 000. Kodwa amadoda azokulwa lama-Israyeli angu-135 000. Lanxa kunjalo, uJehova utshela uGidiyoni: ‘Ulamadoda amanengi kakhulu.’ Kungani uJehova esitsho njalo?

Kungenxa yokuthi nxa ama-Israyeli anganqoba impi angacabanga ukuthi azinqobele ngamandla awo. Bangacabanga ukuthi kabadingi usizo lukaJehova ukuze banqobe. Ngakho uJehova uthi kuGidiyoni: ‘Tshela wonke amadoda ayesabayo ukuthi abuyele emakhaya.’ Lapho uGidiyoni esenza njalo, kubuyela amadoda angu-22 000 emuva. Usala lamadoda angu-10 000 ukuthi ayekulwa lamasotsha angu-135 000.

Kodwa lalela! UJehova uthi: ‘Ulokhe ulamadoda amanengi kakhulu.’ Ngakho utshela uGidiyoni ukuthi atshele amadoda la ukuthi ayenatha esifuleni njalo lokuthi bonke labo abanatha befake ubuso babo emanzini babuyele emakhaya. UJehova uyathembisa, ‘Ngizakwenza unqobe ulamadoda angu-300 akade ekhangela emaceleni lapho enatha.’

Siyafika isikhathi sokulwa. UGidiyoni uhlukanisa amadoda la angu-300 abe ngamaqembu amathathu. Upha indoda ngayinye uphondo lezimbizanyana ezilezibane phakathi. Phakathi kobusuku, bagombolozela lapho okulamasotsha esitha khona. Bakhalisa impondo zabo kanye kanye njalo babulala imbizanyana zabo, bamemeze: ‘Inkemba kaJehova lekaGidiyoni!’ Lapho amasotsha esitha evuka, ayesaba njalo kawakwazi ukuthi kwenzakalani. Bonke baqalisa ukubaleka njalo ama-Israyeli anqoba impi.