USolomoni Wakha Ithempeli

UDAVIDA engakafi, wapha uSolomoni umdwebo wesakhiwo sethempeli likaJehova ayewuphiwe nguNkulunkulu. Ngomnyaka wakhe wesine ebusa, uSolomoni uqalisa ukwakha ithempeli njalo kumthatha iminyaka eyisikhombisa lenyanga eziyisithupha ukuze aliqede. Lakhiwa ngamadoda ayizinkulungwane ezingamatshumi njalo kusetshenziswa imali enengi kakhulu. Lokhu kungenxa yokuthi kusetshenziswa igolide elinengi lesiliva elinengi kakhulu.

Ithempeli lilamakamelo amabili aqakathekileyo njengoba ithabanikeli lalo lalilawo. Kodwa amakamelo la makhulu kulawe- thabanikeli ngokuphindwe kabili. USolomoni uthi ibhokisi lesivumelwano lifakwe ekamelweni eliphakathi kwethempeli, njalo ezinye izinto ezazigcinwa ethabanikeli zifakwa kwelinye ikamelo.

Lapho ithempeli seliphelile kuba lokuthokoza okukhulu. USolomoni uguqa phambi kwethempeli abesekhuleka njengoba ubona emfanekisweni. USolomoni uthi kuJehova, ‘Izulu kalikulingani, pho lisilela kanganani lelithempeli engilakhileyo. Kodwa, Nkulunkulu wami, ngicela ulalele abantu bakho nxa bekhuleka endaweni le.’

USolomoni eseqedile ukukhuleka, kwehla umlilo uvela ezulwini. Utshisa imihlatshelo yezinyamazana eyayenziwe. Njalo ukukhanya okukhulu okuvela kuJehova kugcwala ethempelini. Lokhu kutshengisa ukuthi uJehova ulalele njalo lokuthi uyathokoza ngethempeli langomthandazo kaSolomoni. Khathesi abantu kabasayi ethabanikeli ukuze bayekhuleka kodwa sebesiya ethempelini.

USolomoni ubusa ngendlela elenhlakanipho okwesikhathi eside njalo abantu bayajabula. Kodwa uSolomoni utshada labafazi abanengi abavela kwamanye amazwe njalo abangamkhonziyo uJehova. Uyambona yini omunye wabo ekhuleka phambi kwesithombe? Ekucineni, abafazi bakhe benza ukuthi laye acine esekhonza abanye onkulunkulu. Uyakwazi ukuthi kwenzakalani lapho uSolomoni esenza lokhu? Akasabaphathi kuhle abantu. Uba lolunya njalo abantu bacina bengasathokozi.

Lokhu kwenza uJehova amzondele uSolomoni, umtshela ukuthi: ‘Ngizakuthathela umbuso ngiwunike enye indoda. Lokhu angisoze ngikwenze wena usaphila, kodwa ngizakwenza nxa sekubusa indodana yakho. Kodwa indodana yakho angisoze ngiyithathele bonke abantu bokubusa.’ Ake sibone ukuthi lokhu kwenzakala njani.