UNkulunkulu Uthembisa iPharadayisi

LO ngumfanekiso wepharadayisi onjengalowo uNkulunkulu okungenzakala ukuthi wawutshengisa umphrofethi wakhe u-Isaya. U-Isaya waphila ngemva nje kukaJona.

Ukuthi pharadayisi kutsho “isivande” loba “iphakhi.” Mhlawumbe kukukhumbuza okunye esesike sakubona ebhukwini leli. Kakufanani yini lesivande esihle uJehova uNkulunkulu asenzela u-Adamu lo-Eva? Kodwa umhlaba wonke uzaba lipharadayisi yini?

UJehova watshela umphrofethi wakhe u-Isaya ukuthi abhale ngepharadayisi elitsha elizayo elabantu bakhe. Wathi: ‘Impisi lezimvu kuzahlala ndawonye ngokuthula. Ithole kanye lomntwana wesilwane kuzadla ndawonye, njalo abantwana abancane bazanakekela izinyamazana lezi. Lomntwana omncane ngeke alimale lanxa engadlala lenyoka eyingozi.’

Abanengi bangahle bathi: ‘Lokhu ngeke kwenzakale. Emhlabeni kulenhlupho njalo inhlupho lezi zizahlala zikhona.’ Kodwa akucabange, uNkulunkulu wayenike u-Adamu lo-Eva ikhaya elinjani?

UNkulunkulu wayefake u-Adamu lo-Eva epharadayisi. Balahlekelwa likhaya labo elihle njalo baguga futhi bafa ngenxa yokuthi babengalalelanga uNkulunkulu. UNkulunkulu uthembisa ukuthi uzanika abantu abamthandayo zona kanye izinto u-Adamu lo-Eva abazilahlayo.

Epharadayisi elitsha elizayo, akula lutho oluzalimaza loba lubhidlize. Kuzaba lokuthula okupheleleyo. Abantu bonke bayabe sebelempilakahle lentokozo. Kuzabe sekufanana xathu lalokho uNkulunkulu ayekufuna ekuqaleni. Emakhasini alandelayo, sizafunda ngokuthi uNkulunkulu uzakwenza njani lokhu.