Imimoya Kayizake Iphile njalo Ifele Emhlabeni

Izidalwa zomoya zikhona! Endaweni yomoya kulezidalwa zomoya ezilungileyo lezimbi. Zingabantu yini abaphila basebesifa emhlabeni?

Hatshi akunjalo. Umuntu angafa kayi endaweni yomoya njengoba abantu abanengi becabanga. Sikwazi njani lokhu? Siyakwazi ngoba iBhayibhili litsho njalo. IBhayibhili libhuku elileqiniso elivela kuNkulunkulu onguye yedwa oweqiniso, ibizo lakhe nguJehova. UJehova wadala abantu, yikho-ke uyakwazi okwenzakala kubo nxa bengafa.​—Hubo 83:18; 2 Thimothi 3:16.

IBhayibhili lithi uNkulunkulu wabumba umuntu wokuqala u-Adamu, “ngothuli lomhlabathi.” (Genesisi 2:7) UNkulunkulu wamfaka ensimini yase-Edeni eliPharadayisi. Ngabe u-Adamu walalela umthetho kaJehova ngabe kafanga, ngabe uyaphila lamuhla emhlabeni. Kodwa lapho u-Adamu esephula ngabomo umthetho kaNkulunkulu, uNkulunkulu wathi kuye: ‘Uzabuyela emhlabathini, ngoba wathathwa kuwo; ngokuba uluthuli njalo uzabuyela othulini.’​—Genesisi 3:19.

Kutshoni lokhu? Singazibuza, wayengaphi u-Adamu uJehova engakambumbi ngothuli? Wayengekho. Wayengayisiwo moya ongakazalwa osezulwini. Wayengakabikhona. Yikho-ke uJehova nxa wayesithi u-Adamu “uzabuyela othulini,” wayesitsho ukuthi u-Adamu wayezakufa. Kazange aye endaweni yomoya. Ekufeni kwakhe, u-Adamu wabuyela ekungabini lempilo, wayengasekho. Ukufa yikungabi lokuphila.

Kuthiwani ngabanye abafayo? Labo abaphili yini? IBhayibhili liyaphendula:

• “Konke [abantu lezinyamazana] kuyandawo yinye; Konke kuvela othulini, yikho konke kubuyela othulini.”​—umTshumayeli 3:20.

• “Abafileyo kabazi lutho.”​—umTshumayeli 9:5.

• “Uthando lwabo, inzondo yabo lomona wabo sekwedlula nya; nini lanini.”​—umTshumayeli 9:6.

• “Engcwabeni [Shiyoli] lapho oyakhona akusetshenzwa, akulakulungiselela, kakulalwazi kumbe ukuhlakanipha.”​—umTshumayeli 9:10.

• ‘[Umuntu] ubuyela emhlabathini; mhlalokho nje amacebo ahle abhidlike.’​—Hubo 146:4.

Ukubona kunzima yini ukuyikholwa imibhalo le? Nxa kunjalo, cabanga ngalokhu: Emulini ezinengi indoda iyasebenza ukuze inakekele imuli yayo. Ingafa, imuli yayo ijayele ukusala idubeka. Kwezinye izikhathi umfazi labantwana bayo bayabe bengela mali eyenela ukuthenga ukudla. Izitha zalindoda zingasala zihlukuluza imuli yayo. Zibuze-ke ukuthi alubana indoda le iyaphila endaweni yomoya, kungani ingaqhubeki inakekela imuli yayo? Kungani ingavikeli imuli yayo ingalinyazwa ngabantu ababi? Ngoba imibhalo iqondile. Indoda le kayiphili, kayenelisi ukwenza loba yini.​—Hubo 115:17.

Lokhu kutsho yini ukuthi abafileyo kabasoze baphile futhi? Hatshi akunjalo. Sizaxoxa ngokuvuswa kwabafileyo emakhasini alandelayo. Kodwa kutshengisa ukuthi abantu abafileyo abakwazi okwenzayo wena. Kabenelisi ukukubona, ukukuzwa loba ukukhuluma lawe. Akudingeki ukuthi ubesabe. Kabangeke bakuncede njalo kabenelisi ukukulimaza.​—umTshumayeli 9:4; Isaya 26:14.