“Sondelani KuNkulunkulu Laye Uzasondela Kini”

1-3. (a) Singafundani endleleni umuntu adalwe ngayo nxa sikhangela ubudlelwano babazali losane lwabo? (b) Sandise ukwenzani nxa umuntu angatshengisa ukuthi uyasithanda njalo yiwuphi umbuzo oqakathekileyo esingazibuza wona?

ABAZALI bayakuthanda ukubona usane lwabo olusanda kuzalwa lubobotheka. Bandise ukusondeza ubuso babo eduze kwalo, besebekhuluma amazwi amnandi ngapha bebobotheka ngendlela etshengisa ukuthi bayaluthanda. Bayabe befisa ukubona ukuthi usane lwabo luzakwenzani. Ngesikhatshana nje babona usane lwabo luqalisa ukubobotheka. Ukubobotheka lokhu kuyindlela olutshengisa ngayo ukuthi luzizwa njani, futhi kuyindlela yalo yokwamukela uthando lwabazali.

² Ukubobotheka kosane lokhu kusikhumbuza okuthile okuqakathekileyo ngendlela umuntu adalwe ngayo. Sandise ukuthi nxa umuntu angatshengisa ukuthi uyasithanda lathi simthande. Le yindlela esidalwe ngayo. (IHubo 22:9) Nxa siqhubeka sikhula, iyathuthuka lendlela esenza ngayo nxa singabona ukuthi umuntu uyasithanda. Mhlawumbe uyakhumbula ukuthi usesemncane wawukubona ukuthi abazali, izihlobo, kumbe abangane bakho bayakuthanda. Lokho kwenza lawe waqalisa ukubathanda njalo ngokuya kwesikhathi watshengisa uthando lolo ngendlela ezitshiyeneyo. Uzizwa njalo yini ngoJehova uNkulunkulu?

³ IBhayibhili lithi: “Siyathanda ngoba yena wasithanda kuqala.” (1 UJohane 4:19) ENgxenyeni 1 kusiya ku-3 yebhuku leli, wakhunjuzwa ukuthi uJehova uNkulunkulu usebenzise amandla, ukwahlulela okuhle kanye lenhlakanipho yakhe ngendlela elothando ukuze usizakale. Kwathi eNgxenyeni 4, wabona ukuthi uNkulunkulu ukucacise ngezindlela ezimangalisayo ukuthi uyabathanda abantu, kugoqele lawe. Lokhu sekuvusa umbuzo oqakatheke ukwedlula yonke ongazibuza yona, othi: ‘Ngizalwamukela njani uthando lukaJehova?’

Kutshoni Ukuthanda UNkulunkulu?

4. Kuyini okuphithanisa abantu amakhanda?

⁴ UJehova ungumthombo wothando yikho uyakwazi ukuthi lutshengiswa njani. Uthi umuntu olothando kumele atshengise ngezenzo ukuthi uyabathanda abanye. Lanxa abantu abanengi beqhubeka behlamuka, uJehova ulokhe elethemba lokuthi kulabanye abazalwamukela uthando lwakhe. Futhi izigidi ezinengi zikwenzile lokhu. Okudanisayo yikuthi amasonto akhona lamuhla asetshiye abantu bephithene amakhanda mayelana lokuthi kutshoni ukuthanda uNkulunkulu. Abantu abanengi abathi bayamthanda uNkulunkulu bacabanga ukuthi nxa bengakhuluma ngomlomo kuphela ukuthi bayamthanda bayabe beqedile. Ukuthanda uNkulunkulu lakho kungaqalisa njalo, ngendlela usane oluqala lubobotheke ngayo lutshengisa abazali balo ukuthi luyabathanda. Kodwa ebantwini abadala uthando lutshengiswa ngendlela edlula leyo.

5. IBhayibhili lithi kutshoni ukuthanda uNkulunkulu njalo kungani elikutshoyo kumele kusithokozise?

⁵ UJehova uyasitshela ukuthi kutshoni ukumthanda. ILizwi lakhe lithi: “Ukuthanda uNkulunkulu kutsho ukulalela imilayo yakhe.” Lokhu kutsho ukuthi ukuthanda uNkulunkulu kutshengiswa ngezenzo. Liqiniso ukuthi abanengi abakuthandi ukulalela. Kodwa ivesi le iqhubeka isithi: “Njalo imilayo yakhe kayinzima.” (1 UJohane 5:3) Imithetho lezimiso zikaJehova kwenzelwe ukuthi kusisize, hatshi ukusicindezela. (U-Isaya 48:17, 18) ILizwi likaNkulunkulu lilezimiso ezinengi ezisisiza ukuthi sisondele eduze kwakhe. Ake sixoxe ngezinto ezintathu ezizasinceda ukuthi sisondele kuNkulunkulu ezigoqela ukukhuluma laye, ukumkhonza kanye lokumlingisela.

Ukukhuluma LoJehova

6-8. (a) Singamlalela njani uJehova? (b) Singenzani ukuze sikuthande esikubala eBhayibhilini?

⁶ ISahluko 1 sebhuku leli siqalisa ngomutsho othi, “Ake uzicabange uxoxa loNkulunkulu!” Sabona ukuthi akusilophupho ukucabanga ngalokhu. UMosi wabalalo ithuba elinjalo. Thina-ke? Khathesi uJehova kasathumi izingilosi zakhe ukuthi zizokhuluma labantu. Kodwa ulendlela engcono kakhulu yokukhuluma lathi lamuhla. Pho-ke singamlalela njani uJehova?

⁷ Simlalela ngokubala iLizwi lakhe iBhayibhili ngoba “yonke iMibhalo iphefumulelwe nguNkulunkulu.” (2 KuThimothi 3:16) Yikho umhubi wakhuthaza izinceku zikaJehova ukuthi zibale iMibhalo “ubusuku lemini.” (IHubo 1:1, 2) Kumele sisebenze nzima ukuze siphumelele ukwenza njalo, futhi kasisoze sizisole ngalokhu. Njengoba safunda eSahlukweni 18, iBhayibhili linjengencwadi eligugu esiyibhalelwe nguBaba wethu osezulwini. Yikho-ke ukulibala akumelanga kube yinto esiphonguyenza nje. Kumele sikuthande esikubala eBhayibhilini. Singakwenza njani lokhu?

⁸ Ngesikhathi ubala iBhayibhili, zama ukubabona ngelihlo lengqondo abantu obala ngabo. Zama ukubona indawo ababekuyo, izimo ababekuzo kanye lendlela ababezizwa ngayo. Ngemva kwalokho zibuze imibuzo le: ‘Indaba le ingifundisani ngoJehova? Yiluphi uphawu oluhle engingalulingisela okukhulunywa ngalo lapha? UJehova ufuna ngifundeni kulokhu futhi ngingakusebenzisa njani empilweni yami?’ Nxa ungabala njalo ucabangisise ngalokho okubalayo uzakukholisa ukubala iLizwi likaNkulunkulu.—IHubo 77:12; UJakhobe 1:23-25.

9. Ngubani “inceku ethembekileyo lehlakaniphileyo” futhi kungani kuqakathekile ukuthi siyilalele?

⁹ UJehova uphinda akhulume lathi esebenzisa “inceku ethembekileyo lehlakaniphileyo.” Inceku le liqembu elincane lamadoda agcotshiweyo akhethwa ukuthi anike abantu bakaNkulunkulu ukudla okuqinisa ukholo “ngesikhathi esifaneleyo.” (UMathewu 24:45-47) Nxa sibala amabhuku esiwaphiwa yinhlanganiso njalo sisiba khona emihlanganweni yebandla lasemihlanganweni emikhulu, siyabe sisamukela ukudla okuqinisa ukholo esikuphiwa yinceku ethembekileyo. Amadoda la ayizinceku zikaKhristu yikho kuyikuhlakanipha ukuthi silandele konke akutshoyo ngoba uJesu wathi: “Nanzelelani indlela elilalela ngayo.” (ULukha 8:18) Kumele siyilalele inceku ethembekileyo ngoba yiyo esetshenziswa nguJehova ukuthi akhulume lathi.

10-12. (a) Kungani umthandazo uyisipho esihle esisiphiwe nguJehova? (b) Singathandaza njani kuJehova futhi kungani singaqiniseka ukuthi uyayiqakathekisa imithandazo yethu?

¹⁰ Kodwa kuthiwani ngokukhuluma loNkulunkulu? Singenelisa yini ukukhuluma laye? Lokhu kungakhanya kuyinto enhle kakhulu kodwa eyesabekayo. Nxa ubungazama ukuyabona umuntu olesikhundla esiphezulu kakhulu emphakathini wakini ukuze umtshele ngezinye izinto ezikukhathazayo, ubungaphumelela yini? Kuyingozi ukukwenza lokhu ngezinye izikhathi! Ngensuku zika-Esta loModekhayi, umuntu wayengabulawa nxa wayengathutsha phambi kombusi wasePhesiya engabizwanga. (U-Esta 4:10, 11) Khathesi cabanga usiya phambi koMbusi Wendawo Yonke omkhulu ukwedlula bonke ababusi abasemhlabeni, okokuthi ubabona ‘benjengezintethe’! (U-Isaya 40:22) Kumele sesabe yini ukukhuluma laye? Hatshi!

¹¹ Umthandazo yindlela elula uJehova asilungiselele yona ukuze sikhulume laye. Lomntwana omncane angakhuleka kuJehova esebenzisa ibizo likaJesu. (UJohane 14:6; KumaHebheru 11:6) Umthandazo usinceda lokuthi senelise ukuveza imizwa yethu lalokho esikucabangayo. (KwabaseRoma 8:26) Akusizi ukugabaza ngolimi kumbe ukuthandaza okwesikhathi eside usebenzisa amazwi amanengi usenzela ukubukwa nguJehova. (UMathewu 6:7, 8) Lanxa kunjalo, uJehova kasitsheli ukuthi sikhulume laye kangaki lokuthi sikhulume laye isikhathi eside kangakanani. ILizwi lakhe lisikhuthaza ukuthi ‘sithandaze kokuphela.’—1 KwabaseThesalonika 5:17.

¹² Khumbula ukuthi uJehova nguye yedwa “olalela imithandazo,” futhi uyilalela ngendlela etshengisa ukuthi uyasizwisisa. (IHubo 65:2) Kodwa ulalela imithandazo ngoba eswele okokwenza yini? Hatshi, uyakuthanda ukulalela imithandazo yezinceku zakhe. ILizwi lakhe lifanisa imithandazo enjalo lempepha ethi nxa isitsha kuthunqe intuthu elephunga elimnandi. (IHubo 141:2; ISambulo 5:8; 8:4) Ngendlela efananayo, kuyaduduza ukwazi ukuthi imithandazo yethu esuka enhliziyweni iyafika kuMbusi Wendawo Yonke futhi iyamthokozisa. Yikho nxa ufuna ukusondela kuJehova, khuleka kuye zikhathi zonke. Mtshele konke okusesifubeni sakho, ungamfihleli lutho. (IHubo 62:8) Mbonge futhi umdumise uYihlo osezulwini. Lokho kuzakwenza ube ngumngane wakhe.

Ukukhonza UJehova

13, 14. Kutshoni ukukhonza uJehova njalo kungani kuqakathekile ukuthi sikwenze lokhu?

¹³ Ukukhuluma loJehova uNkulunkulu akufanani lokuxoxa nje lesihlobo kumbe umngane. Siyabe simkhonza futhi simnika udumo okumele aluthole loba sekutheni. Kumele sizimisele ukumkhonza okwempilo yethu yonke. Le yiyo indlela esingatshengisa ngayo ukuthi silothando lokuthi sizinikele kuye ngokupheleleyo. Kanti njalo nxa singenza njalo siyabe sizimanyanisa lazo zonke izidalwa zikaJehova ezithembekileyo ezisezulwini lezisemhlabeni. Embonweni, umphostoli uJohane wezwa ingilosi imemeza isithi: “Khonzani lowo owenza izulu, lomhlaba, lolwandle kanye lemithombo yamanzi.”—ISambulo 14:7.

¹⁴ Kungani kumele simkhonze uJehova? Cabanga ngempawu ezinhle uJehova alazo ezigoqela ubungcwele, amandla, ukuzithiba, ukwahlulela okuhle, isibindi, isihawu, inhlakanipho, ukuthobeka, uthando, ukuthembeka kanye lobuhle. Sibonile ukuthi impawu zikaJehova ziphakeme kakhulu ukwedlula ezaloba ngubani. Nxa singazama ukuzwisisa impawu zikaJehova sizabona ukuthi ufanele sibili ukudunyiswa yithi abantu. Uyakhazimula ngendlela ebabazekayo njalo mkhulu ngendlela engalinganisekiyo nxa eqathaniswa lathi. (U-Isaya 55:9) Kuyacaca-ke ukuthi uJehova nguye olelungelo lokuba nguMbusi wethu njalo kumele simkhonze. Kodwa kumele simkhonze njani uJehova?

15. Singamkhonza njani uJehova “ngomoya langeqiniso” njalo imihlangano yethu isinika ithuba lokwenzani?

¹⁵ UJesu wathi: “UNkulunkulu ungumoya futhi abamkhonzayo kumele bamkhonze ngomoya langeqiniso.” (UJohane 4:24) Ukukhonza uJehova “ngomoya” kutsho ukuqondiswa ngumoya ongcwele empilweni zethu. Kanti njalo ukukhonza kwethu kumele kuvumelane lolwazi lweqiniso oluseLizwini likaNkulunkulu. Silethuba elihle lokukhonza uJehova “ngomoya langeqiniso” lapho sihlangana lesikhonza labo. (KumaHebheru 10:24, 25) Izindlela esikhonza ngazo uJehova ezitshengisa ukuthi siyamthanda zigoqela ukuhlabela izingoma zokumdumisa, ukuthandaza kuye kanye lokulalela futhi siphinde siphendule emihlanganweni yebandla.

16. Yiwuphi umlayo omkhulu kulayo yonke ophiwe amaKhristu eqiniso njalo kungani kuqakathekile ukuwulalela?

¹⁶ Enye indlela esikhonza ngayo uJehova yikumdumisa emphakathini ngokutshela abanye ngaye. (KumaHebheru 13:15) AmaKhristu eqiniso aphiwa umlayo wokutshumayela izindaba ezinhle zoMbuso kaJehova. (UMathewu 24:14) Sizimisele ukuwulalela umlayo lo ngoba siyamthanda uJehova. IBhayibhili lithi uSathane uDeveli ‘ngunkulunkulu womumo lo wezinto’ njalo ‘usevale ingqondo zabangakholwayo’ ngokufafaza amanga ehlose ukungcolisa ibizo likaJehova. Umsebenzi wokutshumayela usinika ithuba lokufakaza ngoNkulunkulu wethu futhi siwaveze egcekeni amanga kaSathane. (2 KwabaseKhorinte 4:4; U-Isaya 43:10-12) Nxa sicabangisisa ngempawu ezinhle zikaJehova siba lesifiso sokutshela abanye ngaye. Asikho isibusiso esilaso esedlula ukuncedisa abanye ukuthi bamazi njalo bamthande njengathi uBaba wethu osezulwini.

17. Ukukhonza kwethu uJehova kugoqelani njalo kungani kumele simkhonze ngenhliziyo yonke?

¹⁷ Kumele sitshengise ngakho konke esikwenzayo ukuthi sikhonza uJehova. (KwabaseKholose 3:23) Nxa sisamukela ukuthi uJehova unguMbusi wethu sizakwenza okumthokozisayo emulini, emsebenzini, lapho sizilibazisa lasendleleni esiphatha ngayo abanye. Lokhu kutsho ukuthi kumele sizame ngamandla wonke ‘ukukhonza uJehova ngenhliziyo yonke.’ (1 ImiLando 28:9) Ngakho asisoze senze angathi siyamkhonza uJehova ngapha sisenza izinto azizondayo. Nxa simthanda ngenhliziyo yonke uJehova futhi simhlonipha, awusoze ufike engqondweni zethu umcabango wokwenza into enjalo. IBhayibhili litshengisa ukuthi inhlonipho enjalo yiyo eyenza sibe ngabangane abaseduze loJehova.—IHubo 25:14.

Ukulingisela UJehova

18, 19. Kungani kulengqondo ukucabanga ukuthi abantu abalesono bangenelisa ukulingisela uJehova uNkulunkulu?

¹⁸ Ingxenye ngayinye yebhuku leli ibiphetha ngesahluko esitshengisa ukuthi singenzani ukuze ‘silingisele uNkulunkulu, njengoba singabantwabakhe abathandayo.’ (Kwabase-Efesu 5:1) Kuqakathekile ukuthi sihlale sikhumbula ukuthi lanxa silesono, singenelisa ukulingisela indlela kaJehova yokusebenzisa amandla, ukwahlulela okuhle, inhlakanipho kanye lokuba lomusa. Sikwazi njani ukuthi singenelisa sibili ukulingisela uSomandla? Khumbula ukuthi ibizo likaJehova lisifundisa ukuthi angaba yilokho afuna ukuba yikho ukuze agcwalise inhloso zakhe. Izimpawu zikaJehova ziyamangalisa sibili, kodwa lokhu akutsho ukuthi asenelisi ukumlingisela.

¹⁹ Senziwe ngomfanekiso kaNkulunkulu. (UGenesisi 1:26) Lokhu kwenza abantu bangafanani lazo zonke izidalwa ezisemhlabeni. Kasenzi izinto sifuqwa ngumuzwa nje kumbe ngezinye izinto ezenziwa emphakathini wethu loba ngenxa yofuzo. UJehova usiphe isipho esiligugu. Isipho lesi yinkululeko yokuzikhethela. Kungelani lokuthi siyaphambanisa kumbe kulezinye izinto esingenelisi ukuzenza, silenkululeko yokuzikhethela lokho esifuna ukuba yikho. Uyafuna yini ukuba ngumuntu olothando, ohlakaniphileyo njalo olungileyo osebenzisa kuhle amandla? Umoya kaJehova uzakuncedisa nxa ufuna ukuba ngumuntu onjalo! Cabanga ngokuhle ozakwenza nxa ungaba njalo.

20. Kuyini okuhle esizakufeza nxa singalingisela uJehova?

²⁰ Nxa ungalingisela uJehova uzamenza athokoze. (IZaga 27:11) Ungenelisa ‘ukumthokozisa kukho konke’ uJehova futhi okuhle yikuthi uyakwazi ukuthi kulezinto ongeke wenelise ukuzenza. (KwabaseKholose 1:9, 10) UBaba wethu othandekayo uzakubusisa kakhulu nxa ungaqhubeka usiba lobuntu obufanana lobakhe. Uzakuba yikukhanya emhlabeni lo osemnyameni njalo owehlukaniswe loNkulunkulu. (UMathewu 5:1, 2, 14) Uzakwenza abantu bakwazi ukuthi uJehova muhle kangakanani. Lesi yisibusiso esikhulu sibili!

“Sondelani KuNkulunkulu Laye Uzasondela Kini”

21, 22. Kuyini labo abathanda uJehova abazakwenza kuze kube nini lanini?

²¹ Esikukhuthazwa kuJakhobe 4:8 akumelanga sikwenze kanye nje kuphela kodwa kumele sikwenze okwempilo yethu yonke. Kufanele siqhubeke sisondela kuJehova ngokuhlala sithembekile kuye. Akumelanga sicabange ukuthi ibhuku leli lisifundise konke ngoJehova. Iqiniso yikuthi kuzahlala kukunengi esingakufunda ngoNkulunkulu. IBhayibhili lalo alisitsheli konke ngoJehova. Umphostoli uJohane wathi ngabe konke uJesu akwenzayo ngesikhathi esemhlabeni kwabhalwa, “lomhlaba wawungeke ube lendawo eyeneleyo yokubeka izincwadimgoqwa zakhona.” (UJohane 21:25) Nxa kutshiwo njalo ngeNdodana, uYise yena-ke?

²² Lanxa singaphila kuze kube nini lanini asingeke sifunde konke ngoJehova. (UmTshumayeli 3:11) Kodwa okuhle yikuthi ngemva kokuphila amabhiliyoni eminyaka emhlabeni omutsha sizabe sesikwazi okunengi kakhulu ngoJehova ukwedlula khathesi. Lanxa kunjalo, kuzaqhubeka kulezinto ezinhle ezinengi okuyabe kumele sizifunde ngaye. Kuzabe kumnandi sibili ukufunda ngaye, sizazizwa njengomhubi owathi: “Ukusondela kuNkulunkulu kuhle kimi.” (IHubo 73:28) Impilo engapheliyo izasenza sisuthiseke sibili ngoba kuzabe kulokunengi okokwenza njalo okuzasithokozisa kakhulu yikuqhubeka sisondela kuJehova.

23. Uzimisele ukwenzani?

²³ Kwangathi ungatshengisa ukuthi uyalubonga uthando lukaJehova ngokumthanda ngenhliziyo yakho yonke, langomphefumulo wonke, langengqondo yonke langamandla akho wonke. (UMakho 12:29, 30) Kwangathi ungaba lothando oluqotho futhi wenze izinqumo ezizatshengisa ukuthi ungumngane kaJehova. Kanti njalo kwangathi ungaqhubeka usondela kakhulu kuJehova njalo laye aqhubeke esondela kuwe kuze kube nini lanini!