Sihlelelwe Ukwenza Intando KaJehova

EMHLABENI wonke kulenhlanganiso ezinengi njalo zihlelwe ngendlela ezitshiyeneyo. Kulenhlanganiso zenkolo, ezombusazwe, ezokuthengiselana lezinye ezinengi futhi zonke zilenhloso lezimfundiso ezitshiyeneyo. Kodwa kulenye inhlanganiso engafanani lazo. ILizwi likaNkulunkulu likwenza kucace ukuthi inhlanganiso le ngoFakazi bakaJehova.

² Siyathokoza ukuthi lawe usulilunga lenhlanganiso kaJehova. Usuhlolisisile wayibona intando kaNkulunkulu njalo usuzimisele ukuyenza. (Hubo. 143:10; Rom. 12:2) Usuyisikhonzi esikhutheleyo esisebenza ndawonye labazalwane abalothando abasemhlabeni wonke. (2 Khor. 6:4; 1 Phet. 2:17; 5:9) Lokhu kwenza uthole izibusiso njalo uthokoze njengoba iLizwi likaNkulunkulu lithembisa. (Zaga. 10:22; Mak. 10:30) Ukuqhubeka usenza intando kaNkulunkulu khathesi kuzakwenza uthole ukuphila okungapheliyo esikhathini esizayo.—1 Tim. 6:18, 19; 1 Joh. 2:17.

³ UMdali wethu Omkhulu ulenhlanganiso emhlabeni ayikhokhela esezulwini. Uyinhloko phezu kwezinto zonke njalo nguye oyiqondisayo inhlanganiso yakhe. Siyamthemba ngenhliziyo yonke. UnguMahluleli wethu, nguye osinika imithetho njalo uyiNkosi yethu. (Isaya. 33:22) UnguNkulunkulu ohlelekileyo, yikho wenze kwaba lula ukuthi ‘sisebenze laye’ ekugcwaliseni injongo yakhe.—2 Khor. 6:1, 2.

⁴ UJesu Khristu yiNkosi ekhethwe nguJehova njalo nguye osikhokhelayo ukuze siqhubekele phambili ngomsebenzi njengoba ukuphela komumo lo wezinto sekuseduze. (Isaya. 55:4; Isam. 6:2; 11:15) UJesu wathi abalandeli bakhe bazakwenza imisebenzi emikhulu ukwedlula leyo yena ayenzayo ngesikhathi esemhlabeni. (Joh. 14:12) Lokhu kwakuzakwenziwa yikuthi babezaqhubeka besanda futhi betshumayela ezindaweni ezinengi okwesikhathi eside. Babezatshumayela izindaba ezinhle zoMbuso kuze kuyefika emaphethelweni omhlaba.—Mat. 24:14; 28:19, 20; ImiSeb. 1:8.

⁵ Lokhu yikho kanye okwenzakalayo lamuhla. Kodwa uJesu wathi ukutshunyayelwa kwezindaba ezinhle kuzakuma ngesikhathi esibekwe nguJehova. Iziphrofetho eziseBhayibhilini zitshengisa ukuthi usuku lukaNkulunkulu olukhulu futhi olwesabekayo seluseduze.—Jow. 2:31; Zef. 1:14-18; 2:2, 3; 1 Phet. 4:7.

⁶ Njengoba sesiyizwisisa kuhle intando kaJehova kulezinsuku zokucina, kumele sizame ngamandla ethu wonke ukuyenza. Ukuze senze njalo, kufanele siyazi indlela inhlanganiso kaNkulunkulu esebenza ngayo futhi sibambisane layo. Konke okwenziwa yinhlanganiso kusekelwe eLizwini likaNkulunkulu elilezimiso, lemithetho kanye lezimfundiso ezitshiyeneyo.—Hubo. 19:7-9.

⁷ Abantu bakaJehova bazahlalisana kuhle futhi basebenze ngokuthula langokumanyana nxa belandela lokho okuseLizwini likaNkulunkulu. (Hubo. 133:1; Isaya. 60:17; Rom. 14:19) Uthando yilo olwenza sibambane futhi sibaphathe kuhle abafowethu labodadewethu abasemhlabeni wonke. (Joh. 13:34, 35; Kol. 3:14) Ukumanyana kwethu kuyisibusiso esivela kuJehova futhi kusinceda ukuthi sihambisane lengxenye esezulwini yenhlanganiso yakhe.

INGXENYE ESEZULWINI YENHLANGANISO KAJEHOVA

⁸ Umphrofethi u-Isaya, uHezekheli loDanyeli babona imibono eyayitshengisa ingxenye esezulwini yenhlanganiso kaJehova. (Isaya., isahl. 6; Hez., isahl. 1; Dan. 7:9, 10) Umphostoli uJohane laye waba lombono owawutshengisa ingxenye esezulwini yenhlanganiso kaJehova njalo ebhukwini leSambulo usitshela ngalokho akubonayo. Wabona uJehova ehlezi esihlalweni sakhe sobukhosi njalo kwakulezingilosi ezazisithi: “Ungcwele, ungcwele, ungcwele uJehova uNkulunkulu, uSomandla, lowo owayekhona lokhona lozayo.” (Isam. 4:8) Waphinda wabona “imvana imi phakathi kwesihlalo sobukhosi.” IMvana kaNkulunkulu le nguJesu Khristu.—Isam. 5:6, 13, 14; Joh. 1:29.

⁹ Umbono lo owawutshengisa uJehova ehlezi esihlalweni sobukhosi uveza ukuthi uyinhloko yenhlanganiso yakhe. U-1 ImiLando 29:11, 12 ukhuluma ngesikhundla sakhe esiphakemeyo. Uthi: “Bungobakho, O Jehova, ubukhulu lamandla lodumo, lobukhosi; ngoba konke okusezulwini lokusemhlabeni kungokwakho. Bungobakho, O Jehova, ubukhosi; uphakeme wena phezu konke. Inotho lodumo kuvela kuwe; ungumbusi wazo zonke izinto. Esandleni sakho kukhona ukuqina lamandla. Kukuwe ukuphakamisa lokupha amandla kubo bonke.”

¹⁰ UJesu Khristu usebenza loNkulunkulu futhi ulesikhundla esiphezulu ezulwini njalo uphiwe amandla amakhulu. UNkulunkulu “wabeka izinto zonke ngaphansi kwenyawo zakhe futhi wamenza waba yinhloko phezu kwakho konke ebandleni.” (Efe. 1:22) Umphostoli uPhawuli wakhuluma ngoJesu wathi: “UNkulunkulu wamphakamisa wamnika isikhundla esiphezulu kulaleso ayelaso, njalo ngomusa wakhe wamnika lebizo eliphezu kwawo wonke amabizo, ukuze amadolo wonke aguqe ebizweni likaJesu, awalabo abasezulwini labasemhlabeni kanye labangaphansi komhlaba, njalo bonke bavume ebantwini ukuthi uJesu Khristu uyiNkosi, besekukhazinyuliswa uNkulunkulu uBaba.” (Flp. 2:9-11) Yikho siyamthemba uJesu Khristu futhi sileqiniso lokuthi uzasikhokhela ngokulunga.

¹¹ Embonweni awubonayo, umphrofethi uDanyeli wabona uSimakade esesihlalweni sakhe sobukhosi ekanye lezingilosi ‘eziyizinkulungwane lezinkulungwane zimkhonza; izinkulungwane ezilitshumi ziphindwe ngezinkulungwane ezilitshumi zimi phambi kwakhe.’ (Dan. 7:10) IBhayibhili lithi izingilosi lezi ‘ziyimimoya eyenza inkonzo engcwele, ethunywa ukuthi iyencedisa labo abazathola ilifa lensindiso.’ (Heb. 1:14) Izingilosi lezi ziphiwe imisebenzi etshiyeneyo enhlanganisweni kaJehova.—Kol. 1:16.

¹² Nxa singacabangisisa ngengxenye esezulwini yenhlanganiso kaJehova, sizazwisisa okwenziwa ngu-Isaya aze abone ‘uJehova ehlezi esihlalweni sobukhosi esiphakemeyo futhi ngaphezu kwakhe kulamaserafi.’ Wathi: “Maye mina! Sengibhujisiwe! Ngoba ngingumuntu olezindebe ezingcolileyo, njalo ngihlala phakathi kwabantu abalezindebe ezingcolileyo, lamehlo ami asebone uJehova, uJehova uSomandla.” U-Isaya wasala emangele njalo wazibona emncane kakhulu lapho ezwisisa ubukhulu benhlanganiso kaJehova. Umbono lo wamthinta okokuthi ngesikhathi uJehova esithi kulomsebenzi wokutshela abantu izahlulelo zakhe u-Isaya wathi: “Ngilapha. Thuma mina!”—Isaya. 6:1-5, 8.

¹³ Ukuzwisisa lokho inhlanganiso kaJehova eyikho khona lokuyiqakathekisa kwenza abantu bakaNkulunkulu balingisele u-Isaya. Njengoba isiyaphambili, sizama ngamandla ethu wonke ukuthi sihambisane layo. Senza konke esingakwenza ukuze sitshengise ukuthi siyayithemba inhlanganiso kaJehova.

INHLANGANISO KAJEHOVA IYA PHAMBILI

¹⁴ Isahluko sokuqala sesiphrofetho sikaHezekheli sikhuluma ngoJehova egade inqola esezulwini. Inqola le enkulu futhi emangalisayo imela ingxenye esezulwini yenhlanganiso kaJehova. Ukuthi uJehova ugade inqola le kutshengisa ukuthi nguye oyiqondisayo futhi uyisebenzisa ngendlela elothando ukuze agcwalise injongo yakhe.—Hubo. 103:20.

¹⁵ Iviri ngalinye lenqola le lilelinye elilingana lalo elinqume phakathi kwalo. Lokhu yikho okwenza amaviri la enelise ‘ukuya kuloba yiliphi lamacele amane.’ (Hez. 1:17) Ayenelisa ukuntshintsha masinyane aqonde loba ngaphi. Kodwa lokhu akutsho ukuthi ayazintshintsha wodwa. UJehova kayiyekeli inhlanganiso yakhe isiya loba ngaphi. UHezekheli 1:20 uthi: “Loba kungaphi lapho umoya owaya khona lazo zaya khona.” Lokhu kutshengisa ukuthi uJehova nguye okhokhela inhlanganiso yakhe esebenzisa umoya wakhe ongcwele. Umbuzo okumele sizibuze wona ngothi, ‘Mina ngihambisana layo yini?’

¹⁶ Ukuhambisana lenhlanganiso kaJehova akutsho ukungena imihlangano lokuya ekutshumayeleni kuphela, kugoqela lokuthuthuka ekukhonzeni. Siba “leqiniso lokuthi yiziphi izinto eziqakatheke kakhulu” futhi kasisaleli emuva kuloba yini eyenziwa yinhlanganiso. (Flp. 1:10; 4:8, 9; Joh. 17:3) Kumele sikhumbule ukuthi ukuze kube lokuhleleka kufanele abantu babambisane futhi basebenze ndawonye. Yikho kumele sisisebenzise kuhle isikhathi sethu, lamandla, leziphiwo kanye lakho konke uJehova asinike khona ukuze senze intando yakhe. Nxa sihambisana lenhlanganiso kaJehova, indlela esiphila ngayo izavumelana lalokho esikutshumayelayo.

¹⁷ Inhlanganiso kaJehova iyasincedisa ukuthi siqhubeke sisenza intando yakhe. Khumbula ukuthi uJehova nguye oqondisa inqola le. Yikho nxa sihambisana layo siyabe sitshengisa ukuthi siyamhlonipha njalo siyamthemba uJehova, iDwala lethu. (Hubo. 18:31) IBhayibhili lithi: “UJehova unika amandla ebantwini bakhe; uJehova ubusisa abantu bakhe ngokuthula.” (Hubo. 29:11) Ukuba senhlanganisweni kaJehova ehlelekileyo kwenza sibe lamandla lokuthula akunika abantu bakhe. Asithandabuzi ukuthi uJehova uzaqhubeka esibusisa nxa singenza intando yakhe khathesi kuze kube nini lanini.