IBHOKISI 1B
Okusebhukwini LikaHezekheli
Ibhuku likaHezekheli singalehlukanisa libe zingxenye ezilandelayo:
ISAHLUKO 1 KUSIYA KU-3
Ngo-613 B.C.E., ngesikhathi amaJuda ethunjiwe eBhabhiloni, uHezekheli ubona imibono kaJehova futhi uthunywa nguJehova ukuthi atshele amaJuda ahlala eduze komfula uKhebhari iziphrofetho zakhe.
ISAHLUKO 4 KUSIYA KU-24
Phakathi kuka-613 kusiya ku-609 B.C.E., uHezekheli uphrofetha mayelana lokwahlulela kweJerusalema kanye labantu bayo abakhonza izithombe.
ISAHLUKO 25 KUSIYA KU-32
Ngo-609 B.C.E., ngomnyaka abeBhabhiloni abafika ngawo bezovimbezela iJerusalema okokucina, uHezekheli uqalisa ukuphrofetha ngezizwe eziyizitha zabako-Israyeli. Izizwe lezi ngama-Amoni, abako-Edomi, amaGibhithe, amaFilisti, abaseSidoni labeThire.
ISAHLUKO 33 KUSIYA KU-48
Kusukela ngo-606 B.C.E., iJerusalema lethempeli sekubhidliziwe, uHezekheli uphrofetha ngokuvuselelwa kokukhonza kweqiniso.
UHezekheli wabhala izenzakalo ngendlela ezalandelana ngayo kodwa ezinye wayezibhala ndawonye ngenxa yokuthi zazihambelana lanxa zazingalandelani. Ngokwesibonelo waqala ngokubhala iziphrofetho ezimayelana lokubhujiswa kweJerusalema lethempeli, wasebhala ngokuvuselelwa kokukhonza kweqiniso. Lokho kulengqondo ngenxa yokuthi iziphrofetho zokuvuselelwa kokukhonza kweqiniso zitshengisa ukuthi abako-Israyeli babengasamkhonzi uJehova ethempelini ngenxa yokuthi iJerusalema laselibhidliziwe.
Ngemva kokubhala iziphrofetho ezimayelana lokwahlulelwa kweJerusalema, uHezekheli wabhala ngeziphrofetho ezikhuluma ngokujeziswa kwezizwe ezaziyizitha zabako-Israyeli (isahluko 25 kusiya ku-32). Ngemva kwalokho wabhala ngokuvuselelwa kokukhonza kweqiniso. Esinye isazi sathi sikhuluma ngeziphrofetho zikaHezekheli ezimayelana lokwahlulelwa kwezizwe lezi sathi: “Iziphrofetho lezi zifakwe endaweni efaneleyo sibili ngoba ngemva kokuthi uHezekheli esekhulume ngolaka lukaJehova, ukhuluma ngesihawu ayezasitshengisa abantu bakhe. Phela ukujeziswa kwezitha zabantu bakaNkulunkulu kwakuzakwenza ukuthi bona bakhululwe.”