IBHOKISI 19A
Izibusiso Ezigeleza Njengamanzi Omfula
EBhayibhilini kulamavesi atshiyeneyo lapho okusetshenziswa khona ibala elithi “umfula” lelithi “amanzi” nxa kukhulunywa ngezibusiso ezinengi ezivela kuJehova. Amavesi la ayasikhuthaza nxa siwabala ngoba enza sibone indlela uJehova asibusisa ngayo. Cabanga ngezibonelo ezilandelayo:
UJOWELI 3:18 Isiphrofetho lesi sisitshela ngomthombo wamanzi ompompoza endlini kaJehova. Amanzi lawo ayageleza aze ayefika ‘esigodini sezihlahla zesinga.’ Ngakho bobabili uJoweli loHezekheli babona amanzi aletha ukuphila endaweni engavundanga. Bobabili bakhuluma ngomfula osuka endlini kaJehova kumbe ethempelini.
UZAKHARIYA 14:8 Umphrofethi uZakhariya wabona ‘amanzi okuphila egeleza ephuma eJerusalema.’ Amanye amanzi ayezakuya elwandle olusempumalanga olwalubizwa langokuthi luLwandle Lwesawudo, amanye aye elwandle olusentshonalanga olwalubizwa langokuthi luLwandle lweMedithera. IJerusalema ‘yayilidolobho leNkosi enkulu’ uJehova. (Mat. 5:35) Yikho isiphrofetho sikaZakhariya esikhuluma ngedolobho leli sisikhumbuza ukuthi esikhathini esizayo uJehova uzabusa umhlaba wonke. Sesilesikhathi eside sikuzwisisa ukuthi amanzi okukhulunywa ngawo esiphrofethweni lesi atshengisa ukuthi ePharadayisi uJehova uzabusisa amaqembu amabili abantu bakhe. Elokuqala ngelalabo abazasinda ekuhluphekeni okukhulu, besekusithi elesibili libe ngelalabo abazavuswa.
ISAMBULO 22:1, 2 Umphostoli uJohane wabona umfula ohambelana lalowo owabonwa nguHezekheli. Kodwa owabonwa nguJohane wawugeleza usuka esihlalweni sobukhosi sikaJehova. Yikho umbono lo uphinda uhambelane lokaZakhariya ngoba kukhanya uveza izibusiso esizazithola nxa uJesu esebusa okweminyaka eyinkulungwane.
Kulomehluko omncane nje phakathi kwezibusiso esizithola eMbusweni kaNkulunkulu lalezo esifunda ngazo embonweni kaHezekheli womfula owawugeleza. Kodwa zonke izibusiso lezo zivela kuJehova futhi zigelezela ebantwini abathembekileyo kuye.
IHUBO 46:4 Nanzelela ukuthi evesini le kukhulunywa ngezibusiso ezilethwa nguMbuso kaNkulunkulu lalezo ezilethwa yikukhonza kweqiniso. Ivesi le ithi kulomfula owenza kube lokuthokoza “edolobheni likaNkulunkulu,” okungabe kusitsho uMbuso kaNkulunkulu. Umfula lo uphinda wenze kube lokuthokoza “ethabanikeli elikhulu futhi elingcwele likaNkulunkulu oPhezukonke,” okungabe kusitsho ukukhonza kweqiniso.
Nxa sesiwahlanganisa amavesi la, enza kucace ukuthi uJehova uzabusisa abantu bakhe abathembekileyo ngendlela ezimbili. Okokuqala, uzababusisa esebenzisa uMbuso wakhe. Okwesibili, uzababusisa esebenzisa ukukhonza kweqiniso. Ngakho kasizimiseleni ukuqhubeka sinatha ‘amanzi okuphila’ esiwaphiwa nguJehova uNkulunkulu leNdodaneni yakhe. Amanzi la azakwenza ukuthi sithole impilo engapheliyo!—Jer. 2:13; Joh. 4:10.