Zwisisa Ukuthi uJehova Uyaphana Lokuthi unguNkulunkulu Ozwisisayo

1, 2. Abangane bakaJehova balaliphi ithuba?

UMKHRISTU okuthiwa nguMonika uthi: “Sesileminyaka ephose ifike-35 sitshadile. Mina lomkami sazana kakhulu. Lanxa sekudlule iminyaka yonke le, lokhu sisafunda izinto ebesingazazi ngomunye lomunye!” Akuthandabuzwa ukuthi imitshado eminengi labangane abanengi basesimeni esifananayo.

² Siyakukholisa ukuqhubeka sibazwisisa labo esibathandayo. Kodwa akulabungane esingaba labo obuqakatheke ukwedlula ukuba lobungane loJehova. Asisoze safa sakwazi konke okumayelana laye. (Roma. 11:33) Esikhathini esizayo, sizaba lentokozo lethuba lokujulisa ukuzwisisa izimpawu zobuntu bukaJehova kuze kube nini lanini.​—UmTshu. 3:11.

3. Kuyini esizakuhlola kulesisihloko?

³ Isihloko esidlulileyo sisincede ukuthi sijulise ukuzwisisa ukungeneka kukaJehova lokungabandlululi kwakhe. Ake sihlole ezinye izimpawu zobuntu bukaJehova ezimbili​—ukuphana lokuzwisisa. Ekuhloleni kwethu kuzasikhanyela ngokupheleleyo ukuthi “uJehova ulungile kubo bonke; ulesihawu kukho konke akwenzayo.”​—Hubo. 145:9.

UJEHOVA UYAPHANA

4. Ukuphana kweqiniso kutshoni?

⁴ Kutshoni ukuba ngophanayo? Sithola impendulo emazwini kaJesu abhalwe kumiSebenzi 20:35 athi: “Ukupha kubusisekile okudlula ukwamukela.” Ngamazwi la alula, uJesu wachaza okutshiwo yikuphana kweqiniso. Umuntu ophanayo upha isikhathi sakhe, amandla akhe, lempahla yakhe ngenhliziyo yakhe yonke ukuze abanye bathole njalo lokhu ukwenza ethokoza. Ngakho-ke ukuphana kukalwa ngenhloso yomuphi hatshi ngobukhulu besipho. (Bala u-2 KwabaseKhorinte 9:7.) Akula muntu ophana ukwedlula “uNkulunkulu” wethu “othokozayo” uJehova.​—1 Tim. 1:11, NW.

5. UJehova utshengisa njani ukuthi uyaphana?

⁵ UJehova ukutshengisa njani ukuthi uyaphana? Unika abantu bonke izidingo zabo kugoqele lalabo abangamkhonziyo. Ngeqiniso, “uJehova ulungile kubo bonke.” “Wenza ilanga lakhe liphume kwababi labalungileyo, anise izulu kwabenza okuhle lakwabangalunganga.” (Mat. 5:45) Yikho lapho umphostoli uPhawuli ekhuluma ngoJehova kwabangakholwayo wathi: “Utshengisile umusa ngokulipha izulu laphezulu lamabele ngesikhathi sawo; ulipha ukudla okunengi njalo agcwalise izinhliziyo zenu ngentokozo.” (ImiSeb. 14:17) Kuyacaca-ke ukuthi uJehova uyaphana kubo bonke abantu.​—Luka. 6:35.

6, 7. (a) Ngobani uJehova athokoziswa yikubapha abakudingayo? (b) Yisiphi isibonelo esitshengisa ukuthi uNkulunkulu uyazinanza izikhonzi zakhe ezithembekileyo?

⁶ UJehova uyathokoza kakhulu nxa esipha izikhonzi zakhe ezithembekileyo ezikudingayo. INkosi uDavida yathi: “Ngangimutsha, manje sengiluphele, kodwa angizange ngibone abalungileyo bedelwa loba abantwababo becela isinkwa.” (Hubo. 37:25) AmaKhristu amanengi athembekileyo ayabubona ubufakazi bokuthi uJehova uyawakhathalela empilweni zawo. Ake sikhangele isibonelo esilandelayo.

⁷ Eminyakeni eyadlulayo, uNancy osenkonzweni yesikhathi esigcweleyo waba lohlupho oluthile. Uthi: “Ngangifuna ukubhadala imali yerenti engange-$66 eyayifuneka ngelanga elilandelayo. Ngangingakwazi ukuthi ngizayithatha ngaphi leyomali. Ngathandaza ngaloluhlupho, ngasengihamba emsebenzini wami wokuba nguweta. Ngangingacabangeli ukuthi ngizathola imali yokubongwa ngamakhasimende ngalobobusuku njengoba kwakulilanga leviki elalingajayelanga ukuba lamakhasimende amanengi. Ngamangala ukubona kusiba lamakhasimende amanengi ekhefa ngalobobusuku. Ngathi sengitshayisile emsebenzini ngabala imali engangiyitholile, kwakuyi-$66.” UNancy uyaqiniseka ukuthi uJehova wamnika ngomusa khona kanye ayekudinga.​—Mat. 6:33.

8. Yisiphi isipho esivela kuJehova esiligugu ukwedlula zonke?

⁸ Umuntu wonke ukhululekile ukuthola isipho esivela kuJehova esiligugu ukwedlula zonke. Yisiphi lesosipho? Ngumhlatshelo wenhlawulo yeNdodana yakhe. UJesu wathi: “UNkulunkulu walithanda ilizwe waze wanikela iNdodana yakhe iyiyo yodwa ukuze kuthi loba ngubani okholwa kuyo angabhubhi kodwa abe lokuphila okungapheliyo.” (Joha. 3:16) Evesini le, ibala elithi “ilizwe” litsho abantu bonke nje. Kuliqiniso ukuthi isipho esivela kuJehova esiligugu ukwedlula zonke sitholwa yibo bonke abakhetha ukusamukela. Abakholwa kuJesu bazathola ukuphila okungapheliyo, babe lakho ngokugcweleyo! (Joha. 10:10) Yikho-ke lobu yibufakazi obukhulu ukwedlula bonke obutshengisa ukuthi uJehova uyaphana.

LINGISELA UKUPHANA KUKAJEHOVA

9. Singakulingisela njani ukuphana kukaJehova?

⁹ Singakulingisela njani ukuphana kukaJehova? UJehova ‘usinika kakhulu konke okwentokozo yethu.’ Yikho-ke kumele ‘sithande ukwabela’ abanye ukuze sibenze bathokoze. (1 Tim. 6:17-19) Kuyasithokozisa ukusebenzisa izinto esilazo ukuze siphe esibathandayo izipho njalo sincede abaswelayo. (Bala uDutheronomi 15:7.) Kuyini okungasinceda ukuthi singakhohlwa ukuba ngabaphanayo? Amanye amaKhristu enza lokhu: Nxa angathola isipho, ayazimisela ukuthi lawo anike omunye umuntu isipho. Ibandla lobuKhristu libusisiwe ngoba lilabafowethu labodadewethu abanengi abaqhubeka bethuthukisa isifiso sokupha.

10. Yiphi enye indlela engcono yokuba ngabaphanayo?

¹⁰ Enye indlela engcono yokuba ngabaphanayo yikwenza lokhu ngamazwi langezenzo. Singakwenza njani lokhu? Ngokusebenzisa isikhathi lamandla ethu ukunceda lokukhuthaza abanye. (Gal. 6:10) Ukuze sizihlole ukuthi senza njani kulokhu, singazibuza imibuzo le: ‘Abanye bayakubona yini ukuthi ngizimisele ukubancedisa lokubalalela nxa belezikhalazo? Uma othile engangicela ukuthi ngimphathise emsebenzini othile kumbe entweni ethile ayenzayo ngiyavuma yini nxa izimo zingivumela? Ngacina nini ukuncoma ngenhliziyo yonke omunye emulini kumbe engikhonza laye?’ Nxa singaba lomkhuba wokuba ‘ngabaphanayo’ sizaphumelela ukusondela kuJehova lakubangane bethu.​—Luka. 6:38; Zaga. 19:17.

11. Yiziphi ezinye izindlela zokuba ngabaphanayo kuJehova?

¹¹ Kuyenzeka ukuthi sibe ngabaphanayo kuJehova. IMibhalo isikhuthaza ukuthi: ‘sidumise uJehova ngemfuyo yethu.’ (Zaga. 3:9) ‘Imfuyo’ le igoqela isikhathi sethu, amandla kanye lempahla esingakusebenzisa sikhululekile enkonzweni yakhe. Abantwana abancane labo bangafundiswa ukupha uJehova. UJason, ubaba othile uthi: “Nxa imuli yethu inikela eWolu loMbuso, sandise ukuvumela abantwana ukuthi kube yibo abafaka imali ebhokisini leminikelo. Bayakukholisa lokhu, ngoba bathi bayabe ‘benika uJehova okuthile.’” Abantwana abathokoziswa yikupha uJehova besesebancane bazakuthola kulula ukuqhubeka besenzanjalo nxa sebekhulile.​—Zaga. 22:6.

UJEHOVA UYAZWISISA

12. Kutshoni ukuba ngozwisisayo?

¹² Enye yezimpawu ezikhangayo zobuntu bukaJehova yikuzwisisa. Kutshoni ukuba ngozwisisayo? Ibala lolimi lwakuqala elihunyutshwe ngokuthi “zwisisa” ku-New World Translation litsho “ukuvuma ukuntshintsha.” (Tit. 3:1, 2, amabala aphansi e-NW.) Umuntu ozwisisayo kaphonguwomelela emthethweni kungelasidingo, kalukhuni, kayisuye ntandokayiphikiswa futhi kalasihluku. Kodwa uyalwisa ukuba ngumuntu omnene ekusebenzeni labanye, azame ukuzwisisa izimo zabo. Uyazama ukulalela imibono yabanye njalo nxa kufanele, uyantshintsha avumelane lezifiso zabo.

13, 14. (a) UJehova utshengisa njani ukuthi uyazwisisa? (b) Indlela uNkulunkulu aphatha ngayo uLothi isifundisani ngokuzwisisa?

¹³ UJehova utshengisa njani ukuthi uyazwisisa? Ngomusa uyayizwisisa imizwa yezinceku zakhe njalo izikhathi ezinengi uyazinika ezikucelayo. Ngokwesibonelo, cabanga ngendlela uJehova alalela ngayo uLothi, indoda elungileyo. Lapho uJehova esekhethe ukutshabalalisa amadolobho eSodoma leGomora, wanika uLothi isiqondiso esicacileyo sokuthi abaleke aqonde ezintabeni. Kodwa ngenxa yesizathu esingaziwayo, uLothi wancenga ukuthi avunyelwe ukubalekela kwenye indawo. Akukumangalisi yini ukuthi uLothi wayecela ukuthi uJehova antshintshe isiqondiso sakhe!​—Bala uGenesisi 19:17-20.

¹⁴ Kungaba lula ukuthi omunye umuntu athi uLothi wayengalaleli futhi eligwala. Angatsho lokuthi uLothi wayesesaba umnyama ongelampisi ngoba kwakusegcekeni ukuthi uJehova wayezamsindisa kungelandaba ukuthi wayengaphi. Lanxa kunjalo, iqiniso yikuthi wayesesaba, wayengaphambanisi ngokuzizwa ngendlela ayezizwa ngayo futhi uJehova wavuma ukuntshintsha evumelana laye. Yikho wavumela uLothi ukuthi abalekele edolobheni ayekade ehlose ukulibhubhisa. (Bala uGenesisi 19:21, 22.) Kuyacaca ukuthi uJehova kalukhuni njalo kayisuye ntandokayiphikiswa. Uyazwisisa avume ukuntshintsha.

15, 16. UMthetho kaMosi utshengisa njani ukuthi uJehova uyazwisisa? (Khangela umfanekiso osekuqaliseni kwesihloko.)

¹⁵ Ake sikhangele esinye isibonelo sokuzwisisa kukaJehova esivezwe eMthethweni kaMosi. Uma owako-Israyeli wayengumyanga, engenelisi ukunikela ngemvu kumbe ngembuzi, wayenganikela ngamajuba amabili kumbe ngenkwilimba ezimbili. Kodwa um-Israyeli wayengenzani nxa wayedubeka okokuthi wayengeke enelise ukunikela ngenkwilimba ezimbili? Nxa kwakunjalo, uJehova wayevumela um-Israyeli lo oswelayo ukuthi anikele ngefulawa encane. Kodwa nanzelela lokhu okuqakathekileyo: Kwakungamelanga kube yifulawa nje kodwa kwakumele ibe ‘yifulawa ecolekileyo’ esetshenziswa nxa kulezethekeli ezihloniphekayo. (Gen. 18:6) Lokhu kuqakatheke ngani?​—Bala uLevi 5:7, 11.

¹⁶ Ake sithi ungum-Israyeli njalo ungumyanga. Ufika ethabanikeli ulefulawa encane yokunikela ngayo ubusubona ama-Israyeli anothileyo eletha imfuyo. Mhlawumbe ungayangeka ngomnikelo wefulawa yakho okhanya ungatsho lutho. Kodwa ubusukhumbula ukuthi umnikelo wakho uqakathekile phambi kukaJehova. Ngani? Ngoba uJehova wayefuna ukuthi ifulawa leyo kube ngelohlonzi. Kufanana lokuthi uJehova wayesithi kuma-Israyeli ayengabayanga: ‘Ngiyakuzwisisa ukuthi alenelisi ukunikela okufanana lokwabanye, kodwa ngiyakwazi ukuthi elinginika khona ngokuhle kulokho elilakho elikutholayo.’ Kuyacaca-ke ukuthi uJehova utshengisa ukuzwisisa ngoba uyacabanga ngezimo zezinceku zakhe lalokho ezingenelisiyo ukukwenza.​—Hubo. 103:14.

17. Yiphi inkonzo ongaqiniseka ukuthi uJehova uyayamukela?

¹⁷ Kuyasiduduza ukwazi ukuthi ngenxa yokuzwisisa kwakhe uJehova uyayemukela inkonzo yethu esiyenza ngomphefumulo wonke. (Kol. 3:23) Omunye udadewethu oseluphele wase-Italy okuthiwa nguConstance wathi: “Ukutshela abanye ngoMdali wami yinto engiyithanda ukwedlula zonke. Yikho ngiqhubeka ngitshumayela njalo ngifundisa abantu iBhayibhili. Kwezinye izikhathi kuyangidanisa ukuthi angenelisi ukwenza okunengi ngenxa yokugula. Kodwa ngiyananzelela ukuthi uJehova uyakwazi lapho engisilela khona njalo uyangithanda aphinde athokoziswe yilokho engenelisa ukukwenza.”

LINGISELA UKUZWISISA KUKAJEHOVA

18. Abazali bangasilandela njani isibonelo sikaJehova?

¹⁸ Singakulingisela njani ukuzwisisa kukaJehova? Cabanga futhi ngendlela uJehova aphatha ngayo uLothi. UJehova nguye owayelesikhundla endabeni le, kodwa walalela ngomusa ngesikhathi uLothi eveza imizwa yakhe. UNkulunkulu wamvumela lokuthi enze ayekucela. Nxa ungumzali, ungasilingisela yini isibonelo sikaJehova? Ungabalalela yini abantwabakho njalo uvumelane lezifiso zabo nxa kukhanya kuqondile? INqabayokulinda ka-September 1, 2007, yakhuluma ngalokhu ichaza ukuthi abanye abazali bangaxoxa labantwana ngemithetho yendlini. Ngokwesibonelo, abazali yibo abanquma ukuthi abantwana kumele babuye sikhathi bani endlini ngoba kulilungelo labo ukwenza lokhu. Lanxa kunjalo, abazali abangamaKhristu bangalalela imibono yabantwababo mayelana lesikhathi abasinqumileyo. Kwezinye izimo, abazali bangakhetha ukuntshintsha isikhathi sokufika endlini nxa bebona ukuthi izimiso zeBhayibhili azephulwa. Bangathola ukuthi nxa belalela imibono yabantwababo mayelana lemithetho yendlini, kubalula ukuthi abantwana bayamukele njalo bayilalele.

19. Abadala bangakulingisela njani ukuzwisisa kukaJehova?

¹⁹ Abadala abangamaKhristu bazama ngamandla ukulingisela ukuzwisisa kukaJehova ngokucabanga ngezimo zalabo abakhonza labo. Khumbula ukuthi uJehova wayeqakathekisa ngitsho leminikelo yama-Israyeli ayengabayanga. Lalamuhla, abanye abafowethu labodadewethu abenelisi ukwenza okunengi enkonzweni mhlawumbe ngenxa yokugula kumbe ukuguga. Kodwa kuthiwani nxa abantu laba esibathandayo bengakhululeki emoyeni ngenxa yokusilela kwabo? Abadala bangabatshela ngomusa ukuthi uJehova uyabathanda ngenxa yokuthi benza okusemandleni abo.​—Mark. 12:41-44.

20. Ukuba ngozwisisayo kutsho ukuthi sivilaphe yini ekukhonzeni uNkulunkulu? Chaza.

²⁰ Kodwa akumelanga sicabange ukuthi ukuba ngabazwisisayo kutsho ukuthi asisasebenzi nzima njalo sesingavilapha enkonzweni kaNkulunkulu. (Mat. 16:22) Asifuni ukuthatha izinto lula besesivikela lokho esikwenzayo ngokuthi singabantu abazwisisayo. Kulokuthi senze njalo, sonke kumele ‘sizame ngamandla’ ukusekela izinto eziphathelane loMbuso. (Luka. 13:24) Sifuna ukuzisebenzisa kuhle lezizimiso ezimbili. Okwakuqala, sizama ngamandla ukungavilaphi enkonzweni yethu. Kanti njalo, siyakhumbula ukuthi uJehova kakhangelelanga ukuthi senze esingenelisi ukukwenza. Yikho-ke singaba leqiniso lokuthi uyathokoza nxa simnika okuhle kakhulu esilakho. Akusijabulisi yini ukukhonza iNkosi etshengisa ukubonga njalo ezwisisa kangaka? Esihlokweni esilandelayo, sizahlola ezinye izimpawu ezimbili zobuntu bukaJehova obukhangayo.​—Hubo. 73:28.