Uzimisele Yini Ukuhambelana Lezimo?
1. Ukuntshintsha komhlaba kwenza senze luphi untshintsho?
1 U-1 KwabaseKhorinte 7:31, uthi isimo somhlaba siyadlula loba siyantshintsha. Lokhu kungaqhathaniswa lesiteji esilezigaba labadlali okuhlala kuntshintsha. Ukuntshintsha komhlaba kwenza sintshintshe indlela esitshumayela ngayo, isikhathi esitshumayela ngaso kanye lentshumayelo esiyisebenzisayo. Uzimisele yini ukuntshintsha?
2. Kungani kufanele sihambelane lezimo ukuze sihambisane lenhlanganiso?
2 Indlela Otshumayela Ngayo: Ibandla lobuKhristu lihambelana lezimo ngazozonke izikhathi. Ngesikhathi uJesu ethuma abafundi bakhe okwakuqala, wabatshela ukuthi bangathwali imali kumbe izikhwama zokudla. (Mat. 10:9, 10) Kodwa ngokuhamba kwesikhathi wantshintsha iziqondiso lezo ecabanga ngesikhathi esasisiza lapho abafundi bakhe ababezazondwa khona langesikhathi lapho umsebenzi wokutshumayela owawuzaqhela ngaso ufike lakwezinye izindawo. (Luka. 22:36) Okweminyaka elikhulu edlulileyo, inhlanganiso kaJehova ibisebenzisa izindlela zokutshumayela ezitshiyeneyo ezihambelana lokwakudingakala ngalesosikhathi. Ngokwesibonelo ibisebenzisa amabhakane okufakaza, umsakazo werediyo lezimota ezazilamasipikha. Lamuhla, njengoba abantu abanengi bengasatholakali ezindlini, sikhuthazwa kakhulu ukuthi senze inkonzo yokutshumayela obala leyokutshumayela okungahlelwanga. Lanxa kunjalo siyaqhubeka futhi ngokutshumayela endlini ngendlu. Sikhuthazwa lokuthi sitshumayele endlini ngendlu ngezikhathi zantambama nxa kuyikuthi abantu bayabe bengekho ekuseni lasemini. Njengoba inqola kaJehova engokomoya ihambelana lezimo, wena uhambisana layo yini?—Hez. 1:20, 21.
3. Ukuhambelana lezimo kusinceda njani ukuthi siphumelele ensimini yethu?
3 Intshumayelo Ozayisebenzisa: Abantu abahlala emphakathini wakini bakhathazeke ngani? Ngezomnotho, ngezemuli, loba ngezempi yini? Kuyanceda ukwazi izinhlupho lezenzakalo ezijayelekileyo endaweni esiphila kuyo ukuze silungiselele izintshumayelo ezincedayo. (1 Kor. 9:20-23) Nxa abaninimuzi bekutshela okusezinhliziyweni zabo, kulokuthi ubaphendule nje ukuthi kudlule ubusuqhubeka ngokade ulungiselele ukuzoxoxa ngakho, kungabangcono kakhulu ukuthi untshintshe intshumayelo yakho futhi uzame ukuxoxa ngalokho okubakhathazayo.
4. Kungani kumele siphangise ukuntshintsha sihambelane lezimo?
4 Sekuseduze ukuthi “isigaba” sokucina somhlaba lo siphele njalo ukuhlupheka okukhulu kuqalise. ‘Isikhathi esiseleyo sifitshane.’ (1 Kor. 7:29) Ngakho kuqakatheke kakhulu ukuthi sihambelane lezimo njalo lokhu sikwenze masinyane ukuze senelise ukwenza okunengi ngesikhathi esincane esiseleyo!