“Philani Impilo Elungileyo Phakathi Kwabangakholwayo”
1. Kungani kuqakathekile ukuthi siphile impilo elungileyo ngesikhathi singena imihlangano ezayo?
1 Kuqakathekile ukuthi indlela esiziphatha ngayo itshengise ukuthi sikhonza wuphi uNkulunkulu, njengoba abantu bayabe besikhangele ngesikhathi semihlangano yethu yesigaba. (Levi. 20:26) Ubuntu bethu lendlela esigqoka ngayo lesizilungisa ngayo kumele kutshengise ukuthi singabalandeli bakaKhristu beqiniso. Njengoba sizangena umhlangano wesigaba kumbe owezizwe ozayo, ‘singaphila njani impilo elungileyo phakathi kwabangakholwayo,’ okuzakwenza ukuthi sidumise uBaba wethu osezulwini?—1 Phet. 2:12.
2. Ngesikhathi singena umhlangano, yiwaphi amathuba esizaba lawo okutshengisa ubuntu bomKhristu?
2 Tshengisa Ubuntu bomKhristu: Uthando esilutshengisanayo lendlela esiphatha ngayo labo “abangaphandle” kutshiyene kakhulu lokujayele ukwenziwa emhlabeni. (Kol. 3:10; 4:5; 2 Tim. 3:1-5) Kumele sibe lomusa njalo sibekezele endleleni esiphatha ngayo abasebenza emahoteleni kumbe emakhefa, lanxa kungenzeka ukuthi kube lokungazwisisani. Ukutshiyela abasenzela imisebenzi imali yokubonga lakho kutshengisa ukuthi silobuntu.
3. Abazali bakhunjuzwani, njalo kungani bekukhunjuzwa lokhu?
3 Abazali kumele bananzelele ukuthi abantwababo benzani enkundleni yomhlangano, emakhefa, lasehoteleni. (Zaga. 29:15) Umaqhuzu wenye ihotela wathi kwabanye abazali: “Lina bantu siyalithanda. Imuli zenu labantwabenu balembeko sibili njalo bathobekile. Izisebenzi zonke bezikhuluma ngani, njalo siyafisa ukuthi ngabe liyahlala lapha impelaviki zonke.”
4. Kumele sigqoke njani ngesikhathi sisedolobheni okwenzelwa khona umhlangano?
4 Ukugqoka Okulesithunzi: Ngesikhathi somhlangano wethu kumele sigqoke okufaneleyo njalo okulesithunzi, singalandeli izitayila ezingalambeko ezijayelekileyo ezweni. (1 Tim. 2:9) Lapho sifika emahoteleni lalapho siphuma kumbe ngezikhathi zokuzilibazisa umhlangano ungakaqalisi lalapho usuphelile, akumelanga siphongugqoka nje impahla ezingaqedakaliyokumbe sigqoke butshapha. Uma sigqoke kuhle sizenelisa ukugqoka amabheji ethu omhlangano futhi kasisoze siyangeke ukutshumayela nxa singathola ithuba. Indlela esikhangeleka ngayo lesiziphatha ngayo ngesikhathi semihlangano ezayo izathokozisa uJehova njalo izakhanga abantu abathembekileyo ukuthi bafune ukuzwa izindaba ezisindisayo eziseBhayibhilini.—Zef. 3:17.
[Ibhokisi elisemakhasini 2-5]
Izikhumbuzo zoMhlangano weSigaba ka2014
◼ Izikhathi Zohlelo loMhlangano: Umculo otshengisa ukuthi sesizaqalisa uhlelo uzaqala ngo 9:20 ekuseni okwamalanga wonke womathathu. Ngasonaleso isikhathi, sonke kumele siyehlala endaweni zethu ukuze uhlelo luqalise ngendlela ehlelekileyo. NgoLwesihlanu langoMgqibelo ingoma yokuphetha lomthandazo kuzethulwa ngesikhathi sika 4:55 ntambama, kanti ngeSonto ngesikhathi sika 3:50 emini.
◼ Imihlangano Yezizwe: EHarare kuzabe kulomhlangano wezizwe mhlaka 22 kusiya ku24 August 2014, njalo amabandla wonke aseZimbabwe ayanxuswa.
◼ Indawo Yokupaka Izimota: Enkundleni zonke zemihlangano lapho esiyabe siqondisa khona ukupakwa kwezimota, ziyabe zipakwa mahala njalo kusiya ngokuthi oqalileyo ukufika ngubani. Kanengi izindawo zokupaka ziyabe zincane, ngakho nxa kusenza sicela lisebenzise imota eyodwa libanengi kulokuthi omunye lomunye abuye ngeyakhe. Labo abayabe bethwele abantu abagogekileyo yibo kuphela abazavunyelwa ukupaka endaweni eziyabe zigcinelwe abantu abanjalo.
◼ Ukugcina Indawo Yokuhlala: Lapho inkundla ivulwa nsuku zonke, sicela lingagijimeli izindawo zokuhlala angani selincintisana labanye. Ukuzinikela okuzasenza senzele abanye okuhle kutshengisa ukuthi singamaKhristu eqiniso njalo kuzenza abayabe bekhangele badumise uNkulunkulu. (Joh. 13:34, 35; 1 Khor. 13:4, 5; 1 Phet. 2:12) Labo esiyabe sihlala labo endlini kumbe sihamba labo emoteni lesiyabe sifunda labo iBhayibhili yibo kuphela esingabagcinela indawo. Asebeluphele labagulayo bazabe belendawo zabo abazigcinelwayo. Njengoba indawo lezi zizilutshwana, ngumuntu oyedwa kumbe ababili kuphela abangahlala losekhulile kumbe ogulayo bemncedisa.
◼ Ukudla Kwemini: Sicela libuye lokudla kwemini kulokusuka enkundleni yomhlangano selisiyadinga ukudla ngesikhathi sekhefu. Lingasebenzisa isikhwama esincane esingafakwa ngaphansi kwesitulo. Izikhwama ezinkulu kanye lamankomitsho lemiganu efayo akuvunyelwa enkundleni yomhlangano.
◼ Iminikelo: Emhlanganweni lo singatshengisa ukuthi siyabonga ukuhlelwa kwawo ngokunikela imali yokusekela umsebenzi owenziwa emhlabeni wonke. Nxa sizanikela nge-cheque kumele siyibhale ukuthi “Watchtower Society.” Singasebenzisa njalo amakhadi ebhanga.
◼ Amaphilisi Lemithi: Nxa ulamaphilisi owabhalelwe ngudokotela, sicela ubuye lawakho eneleyo njengoba ayabe engekho emhlanganweni. Amajekiseni e-diabetes kumele alahlelwe endaweni ezifaneleyo hatshi emabhimu asenkundleni yomhlangano kumbe ehoteleni njengoba engaba yingozi.
◼ Ukuvikeleka: Sicela linanzelele njalo livikele izingozi ezingabangelwa yikutshelela kumbe ukukhubeka. Minyaka yonke abantu balimala ngenxa yezicathulo, ikakhulu ezinde. Kumele ukhethe izicathulo ezifaneleyo, ezingabambiyo ezizakuvumela ukuhamba kuhle emasitepisini, lakuzozonke izindawo.
◼ Abazwela Khatshana: Enkundleni uhlelo luzasakazwa kumagagasi omsakazo we-FM. Ukuze uluzwe, kuzamele ubuye lewayilesi encane engena amabhathri lama-earphones.
◼ Amaphurema Lezitulo Ezigoqwayo: Amaphurema lezitulo ezigoqwayo akumelanga kulethwe enkundleni yomhlangano. Kodwa izitulo zabantwana ziyavunyelwa nxa kuyikuthi zizafakwa eceleni kwezabazali babo.
◼ Ama-perfume: Singatshengisa abanye uthando uma singayekela ukusebenzisa ama-perfume angenza ukuthi abanye baphefumule nzima.—1 Khor. 10:24.
◼ Ifomu elithi Sicela Uyebona (S-43): Kumele usebenzise ifomu elithi Sicela Uyebona nxa ungatshumayeza umuntu okungahlelwanga ngesikhathi somhlangano abesesithi ufuna ukufunda. Ungahambisa amafomu la eHlangothini lwaMabhuku kumbe ulinike unobhala webandla lakho nxa usubuyele endlini.
◼ Amakhefa: Dumisa ibizo likaJehova ngendlela oziphatha ngayo emakhefa. Gqoka ngendlela efanele amaKhristu. Tshiya imali yokubonga nxa kungumkhuba.
◼ Amahotela:
(1) Ungabhadaleli izindlu ezinengi kulalezo ozazisebenzisa, njalo ungahlali labantu abanengi ukwedlula labo abavunyelwayo endlini eyodwa.
(2) Ungantshintshi ingqondo nxa usubhadalele indlu ngaphandle nxa kuvuke okuthile okufuna ukuphangiselwa. Sicela utshele abehoteleni masinyane ukwenzela ukuthi abanye abafuna indawo yokuhlala benelise ukusebenzisa indlu yakhona. (Mat. 5:37) Nxa ungakwenza lokhu, woba leqiniso lokuthi bayakunika i-cancellation number. Nxa ungantshintsha ingqondo sokusele amahola angaphansi kwangu-48, kawusoze ubiselwe imali yakho ye-deposit.
(3) Sicela uqaphele ukuthi nxa ungasebenzisa ikhadi lakho lebhanga ukubhadala imali yehoteleni, ihotela ingabamba enye imali yakho esebhanga ukuze ibhadale izindleko zamalanga wonke, njalo lezingozi ezingaba khona ngesikhathi usehoteleni. Kawusoze wenelise ukuyisebenzisa imali leyi kuze kudlule insukwana ususukile ehoteleni, bona sebethethe eyabo.
(4) Sicela uthathe inqola yokuthwala izikhwama uma usufuna ukuyisebenzisa kuphela, njalo uphangise ukuyibisela ukwenzela ukuthi abanye bayisebenzise.
(5) Nxa abasebenza ehoteleni bangakuthwalela izikhwama, kungumkhuba omuhle ukubanika imali yokubonga, kanye labayabe behlanza indlu yakho.
(6) Phekelani ezindlini okuvunyelwa ukuphekela kuphela.
(7) Sicela lingabuyi emhlanganweni lezinto okuyabe kumele lizisebenzise lisehoteleni kuphela, ezinjenge-coffee, ama-ice lokunye.
(8) Lapho ukhuluma lezisebenzi zehoteleni, zikhathi zonke sicela utshengise izithelo zomoya. Izisebenzi lezi ziyabe zikhangele abantu abanengi njalo zingabonga uma ungaba lomusa, ubekezele njalo utshengise ukuthi uyazwisisa.
(9) Abazali kumele bananzelele ukuthi abantwababo benzani zikhathi zonke ehoteleni, kugoqela kuma-elevator, e-swimming pool, endaweni efikela izivakatshi, e-gym lakwezinye indawo.
(10) Nxa kungaba lohlupho endlini okuyo ehoteleni,sicela utshele aboHlangothi lweNdawo Yokuhlala ngesikhathi usemhlanganweni ukuze bakusize.
◼ Uhlangothi Lwabazinikeleyo: Bonke abafisa ukuzinikela ukwenza imisebenzi etshiyeneyo bangayatshela ababona ngoHlangothi Lwabazinikeleyo emhlanganweni. Abantwana abaleminyaka engaphansi kwengu-16 bangancedisa kodwa beqondiswa ngumzali kumbe omunye umuntu omdala ovunyelwe ngabazali.