Zejayeze Ukubamba Isikhathi
1. UJehova usibekela siphi isibonelo endabeni yokubamba isikhathi?
1 UJehova uhlala ebamba isikhathi. Ngokwesibonelo, uJehova ‘usisiza ngesikhathi esifaneleyo.’ (Heb. 4:16, The Holy Bible in Ndebele) Uphinda asinike izinto eziphathelane lokukhonza ‘ngesikhathi esifaneleyo.’ (Mat. 24:45) Ngakho singaba leqiniso lokuthi usuku lwentukuthelo yakhe ‘kaluyikuphuza.’ (Hab. 2:3) Ukubamba kukaJehova isikhathi kuyasinceda kakhulu! (Hubo. 70:5) Kodwa kunzima ukuthi thina sibambe isikhathi ngenxa yokuthi silesono njalo sihlala sibambekile. Kungani kumele sizejayeze ukubamba isikhathi?
2. Kungani ukubamba isikhathi kudumisa uJehova?
2 Abantu abasakuqakathekisi ukubamba isikhathi ngoba siphila ezinsukwini zokucina lapho okulabantu abazithandayo njalo abangasazikhuziyo. (2 Tim. 3:1-3) Ngakho abantu bayakunanzelela nxa amaKhristu efika ngesikhathi emsebenzini lasemihlanganweni ephathelane lemisebenzi yawo, futhi lokho kuzakwenza ukuthi uJehova adunyiswe. (1 Phet. 2:12) Sijayele ukufika emsebenzini ngesikhathi yini kodwa sehluleke ukufika ngesikhathi emihlanganweni yobuKhristu? Ukufika ngesikhathi emihlanganweni yobuKhristu, okugoqela ukufika kungakaqalisi ingoma yokuvula lomthandazo kutshengisa ukuthi sifuna ukulingisela uBaba wethu ohlelekileyo osezulwini.—1 Khor. 14:33, 40.
3. Kungani ukubamba isikhathi kutshengisa ukuthi silendaba labanye?
3 Ukubamba isikhathi kutshengisa lokuthi silendaba labanye. (Flp. 2:3, 4) Ngokwesibonelo, nxa sifika ngesikhathi emihlanganweni yobuKhristu lasemihlanganweni yokuya ekutshumayeleni, kasisoze sibaphazamise abanye. Ikanti nxa singahlala siphuza, bazacabanga ukuthi sibona esethu isikhathi kuyiso esiqakatheke kulesabo. Ukubamba isikhathi kutshengisa ukuthi sithembekile njalo sikhuthele futhi abantu bayaziqakathekisa izimpawu lezi.
4. Singenzani ukuze sibambe isikhathi nxa sijayele ukuphuza?improvement?
4 Nxa ujayele ukuphuza, zibuze ukuthi kuyini okukuphuzisayo. Yenza uhlelo oluzakunceda ukuthi wenelise ukwenza izinto zakho ngesikhathi. (UmTshu. 3:1; Flp. 1:10) Cela uJehova akuncedise. (1 Joh. 5:14) Nxa sibamba isikhathi siyabe sitshengisa ukuthi siyayilandela imilayo emibili futhi emikhulu kulayo yonke. Imilayo le yikuthanda uNkulunkulu lokuthanda umakhelwana.—Mat. 22:37-39.