Yenza Okunengi Enkonzweni Ngenyanga ka-August!

1. Yiwuphi umkhankaso oqakathekileyo ozakwenziwa emhlabeni wonke njengoba sekuseduze ukuthi uMbuso ube leminyaka engu-100?

¹ Kuhle ukuthi sidumise uJehova ngomkhankaso oqakathekileyo njengoba sekuseduze ukuthi uMbuso wakhe ube leminyaka engu-100! Ngenyanga ka-August sizahambisa iphetshana elitsha elilesihloko esithi Singazithola Ngaphi Izimpendulo Zemibuzo Ehluphayo Empilweni? Iphetshana leli likhuthaza abantu ukuthi badinge izimpendulo eBhayibhilini njalo lichasisa lokuthi i-jw.org ingabanceda njani.

2. Singakwenza njani ‘ukumemeza sidumisa uJehova’ ngenyanga ka-August?

² Memezani Lidumise: Kwenziwe uhlelo oluqakathekileyo oluzanceda abamemezeli abafuna ukuba ngamaphayona asizayo ngenyanga ka-August. Abamemezeli ababhaphathiziweyo abazakuba ngamaphayona asizayo ngenyanga leyo bavunyelwe ukubika amahora angu-30. Njengoba inyanga ka-August ilezimpelaviki ezinhlanu, kuzakuba lula ukuthi abamemezeli abasebenza phakathi kweviki benelise ukuphayona. Kanti njalo kuzanceda labasakhulayo njengoba izikolo ziyabe zivaliwe ngaleyo enyanga. Khuluma lomhleli wequla labadala khathesi nxa ulomuntu ofunda laye iBhayibhili kumbe nxa ulomntwana ofuna ukuba ngummemezeli. Kuzasithokozisa kakhulu ukuthi sibe labamemezeli abanengi abazasebenza lathi ngenyanga leyo eqakathekileyo! Lanxa amaphayona esikhathi sonke amanengi ejayele ukuvakatsha ngenyanga ka-August ngemva kokuba esefikise amahora adingakalayo ngomnyaka, kungaba kuhle ukuthi ahambise amaphetshana la ngaleyo nyanga abesehlela ukuvakatsha ngesinye isikhathi. Ukuze izimuli zenelise ‘ukumemeza zidumisa uJehova’ ngenyanga ka-August, kumele zihle zixoxe ngakho khathesi.​—⁠Ezra. 3:​11; Zaga. 15:⁠22.

3. Kungani kuzasithokozisa ukwenza umkhankaso lo oqakathekileyo?

³ Lanxa sake senza eminye imikhankaso, sithemba ukuthi kuzasithokozisa kakhulu ukuhambisa iphetshana leli elitsha. Okuzasithokozisa kakhulu yikuthi sizatshumayela amahora amanengi, sengezelele inani labamemezeli njalo sibe lamaphayona asizayo amanengi ngenyanga leyo. Njengoba sifika ekupheleni komnyaka wenkonzo ka-2014, sifisa ukuthi uJehova abusise yonke imizamo yabantu bakhe abasemhlabeni wonke abazasebenzisa isikhathi esinengi betshumayela ngenyanga ka-August!​—⁠Mat. 24:​14.