Iminyaka Elikhulu Yokufakaza NgoMbuso!
1. Eminyakeni ephose ibe likhulu eyadlulayo, kuyini abantu bakaJehova abakhuthazwa ukuthi bakwenze?
1 “Khangelani, iNkosi isibusa! Liyizisebenzi zayo eziyikhankaselayo. Ngakho-ke, memezelani, memezelani, memezelani, ukuthi sekuleNkosi lombuso wayo.” Amazwi la akhulunywa ngumfowethu uRutherford eminyakeni engaba likhulu eyadlulayo abakhuthaza abantu bakaJehova ukuthi bamemezele umlayezo woMbuso emhlabeni wonke. Lokhu yikho kanye esikwenzileyo! NjengamaKhristu ekhulu lokuqala, sesitshumayele izindaba ezinhle zoMbuso “kuzo zonke izidalwa ngaphansi kwezulu.” (Kol. 1:23) Kuyini esikwenzileyo eminyakeni elikhulu edlulileyo ukuze simemezele uMbuso kaNkulunkulu? Singaqhubeka njani siwumemezela njengoba sekuzakuba yiminyaka elikhulu uMbuso ubusa?
2. Amabhuku ethu awumemezela njani uMbuso kaNkulunkulu?
2 Ukukhangela Okwenzakala Kudala: Sekulamatshumi eminyaka amabhuku ethu etshela abantu ngoMbuso kaNkulunkulu. Kusukela ngo-1939 imagazini yethu eqakathekileyo ibilokhu ilesihloko esithi: INqabayokulinda Ebika NgoMbuso KaJehova. Imagazini le ihlala ikhuluma ngoMbuso lalokho ozakwenza. I-Awake! layo itshengisa ukuthi uMbuso kaNkulunkulu yiwo wodwa onganceda abantu. Ngakho kakusimangalisi ukuthi amamagazini la womabili yiwo ahunyutshwa futhi aphiwe abantu ukwedlula loba yiwaphi amanye amamagazini emhlabeni!—Isam. 14:6.
3. Yiziphi ezinye izindlela esike sazisebenzisa ukuze simemezele ngoMbuso?
3 Abantu bakaJehova basebenzise izindlela ezinengi ukuze bamemezele uMbuso. Kudala sasisebenzisa izimota ezilama-speaker, umsakazo, kanye lama-phonographs athwalekayo. Izindlela lezi zasinceda ukuthi simemezele izindaba ezinhle ebantwini abanengi ngesikhathi abamemezeli boMbuso besesebalutshwana. (Hubo. 19:4) Eminyakeni esanda kudlula sisebenzise i-jw.org, futhi lokhu kwenze ukuthi izigidi zabantu zenelise ukuzwa ngoMbuso. Izigidi lezi zigoqela labantu abasemazweni lapho umsebenzi wethu ongavunyelwa khona.
4. Yiziphi izindlela eziqakathekileyo esizisebenzisayo?
4 Abantu bakaJehova basebenzise ezinye izindlela eziqakathekileyo ukuze bamemezele uMbuso. Ngokwesibonelo, kusukela ngabo-1990 sizame ukwengezelela umsebenzi wethu wendlu ngendlu ngokutshumayela emaphakhi, ezindaweni zokupaka izimota, lasezindaweni zamabhizimusi. Sihlele lokutshumayela obala okuqakathekileyo okwenziwa emadolobheni aphithizelayo asemhlabeni wonke. Kanti njalo amabandla amanengi atshumayela obala ensimini yawo esebenzisa izinqola kanye lamatafula amabhuku futhi lokhu akwenzela ezindaweni okudlula khona abantu abanengi. Lanxa kunjalo indlela esiyisebenzisa kakhulu ngeyokutshumayela endlini ngendlu.—ImiSeb. 20:20.
5. Umnyaka omutsha wenkonzo uzasinika amathuba okwenzani?
5 Ukukhangela Okuzakwenzakala: Abanengi bazakuba ngamaphayona esikhathi sonke ekuqaliseni komnyaka omutsha wenkonzo ngo-September. Lawe ungaphayona yini? Nxa ungeke wenelise, ungaba liphayona elisizayo yini ngezinye izikhathi? Kungelani lokuthi uyenelisa ukuphayona yini loba hatshi, uJehova uzayibusisa imizamo oyenzayo ukuze utshumayele ngoMbuso.—Mal. 3:10.
6. Inyanga ka-October 2014 izabe iqakatheke ngani?
6 Ngo-October 2014, uMbuso uzakuba usuleminyaka elikhulu ubusa. INqabayokulinda yaleyo nyanga izabe ikhuluma ngoMbuso kaNkulunkulu. Ungazama yini ukunika abantu abanengi iNqabayokulinda le? Njengoba sikhangele okuzakwenzakala, sengathi sonke singaqhubeka ‘sitshumayela izindaba ezinhle zoMbuso kaNkulunkulu’ kubo bonke abafuna ukulalela.—ImiSeb. 8:12.