Ukuthuthukisa Indlela Esitshumayela Ngayo—Ngokutshumayeza Umuntu Okhuluma Olunye Ulimi
Kungani Kuqakathekile? UJehova ufuna abantu “benhlanga” zonke babe lobuhlobo obuhle laye. (ImiSeb. 10:34, 35) Yikho-ke, uJesu wathi izindaba ezinhle zazizatshunyelwa “kuwo wonke umhlaba” kanye ‘lakuzo zonke izizwe.’ (Mat. 24:14) UZekhariya waphrofetha ukuthi abantu “abaphuma kuzo zonke izindimi lezizwe” babezazamukela izindaba ezinhle. (Zek. 8:23) Umbono womphostoli uJohane utshengisa ukuthi labo abazasinda ekuhluphekeni okukhulu bazagoqela abantu ‘abavela ezizweni zonke, lasezizwaneni, lasebantwini kanye lasezindimini zonke.’ (Isam. 7:9, 13, 14) Lokhu kumele kusenze sizame ukutshumayeza abantu esihlangana labo ensimini yethu abakhuluma olunye ulimi.
Indlela Yokukwenza:
• Hlala ukulungele. Hlala ulebhukwana elithi Good News for People of All Nations esikhwameni sakho. Wazi kuhle umlayezo osekuqaliseni kwebhukwana leli olesihloko esithi “How to Help Those Who Speak Another Language.” Cabanga ngezindimi ezisensimini yenu, ubusudawuniloda ividiyo loba ibhuku elilotshwe ngezindimi lezo ku-jw.org usebenzisa ifoni yakho. Sebenzisa i-JW Language app ukuze ufunde imitsho emilutshwana yezindimi lezo. Nxa insimu yenu itshunyayelwa ngamabandla akhuluma izindimi ezitshiyeneyo, thwala amabhuku olimi lwebandla lenu kuphela nxa lingena indlu ngendlu. Kodwa nxa litshumayela obala thwala amabhuku ezindimi ezitshiyeneyo.
• Nxa ungahlangana lomuntu okhuluma olunye ulimi, zama ukukhuluma ngolimi lwakhe lapho umtshela ‘ngezimangaliso zikaNkulunkulu.’ (ImiSeb. 2:11) Mtshele angene ku-jw.org ukuze athole okunengi okolimi lwakhe. Nxa etshengise ukuthi uyafuna ukufunda okunengi, gcwalisa ifomu elithi Sicela Uyebona (S-43) ubusulinika unobhala webandla lenu. Qhubeka usiyambona umuntu lo kuze kube yilapho abamemezeli abakhuluma ulimi lwakhe sebembonile.
Zama Ukwenza Okulandelayo Kulinyanga:
• Ekukhonzeni kwenu Kwemuli okulandelayo, phurakithizani ukuthi lingamtshumayeza njani umuntu okhuluma olunye ulimi.