Ukuthuthukisa Indlela Esitshumayela Ngayo—Ukuqeqetsha Labo Abasanda Kuba Ngabamemezeli

Kungani Kuqakathekile? Labo abasanda kuba ngabafundi bakaJesu kumele bafunde ukwenza “konke” asilaya khona okugoqela ukufundisa abanye iqiniso. (Mat. 28:19, 20) Sikhuluma nje, asingeke sibabale sibaqede abantu asebabhalisa ukwenza izinkulumo zeSikolo Senkonzo samaKhristu njalo akuthandabuzwa ukuthi bayake batshumayeze izihlobo kanye labangane. Njengoba bekuqakathekisa sibili lokho abayabe bekufunda, ngokuhamba kwesikhathi bangacina sebesitshela ngesifiso sabo sokutshumayela izindaba ezinhle njengoba bayabe sebekufundile ukuthi uJehova ufuna abantu bonke bazizwe. (Rom. 10:13, 14) Nxa besanda kuba ngabamemezeli abangabhaphathizwanga, kufanele sizame ukubaqeqetsha. Lokhu kuzabasiza ukuthi babelesibindi sokuqhubeka bethuthuka.—Luk. 6:40.

Indlela Yokukwenza:

Nceda lowo osanda kuba ngummemezeli athole amabhuku angawasebenzisa ekutshumayeleni. Mtshengise amabhuku owathwala nxa usiya ekutshumayeleni lokuthi linye ngalinye lisetshenziswa njani.
Khethani intshumayelo eyisibonelo etholakala ku-Nkonzo Yethu YoMbuso beseliyiphurakithiza. Mkhuthaze lowo osanda kuba ngummemezeli ukuthi akhulume ngawakhe amazwi kulokuthi abale intshumayelo. Phurakithizani izindlela ezitshiyeneyo zokutshumayela ezisekhasini 82 ebhukwini leSikolo Senkonzo njalo lisebenzise izindlela ezijayelekileyo ensimini yenu. Gcizelela ukuqakatheka kokugqoka kuhle.—2 Khor. 6:3, 4.
Qhubeka uqeqetsha abasanda kuba ngabamemezeli. Mtshengise ikhadi lensimu, uphinde umfundise indlela yokusebenzisa ifomu lokubhala abantu eliyabe libatholile. Mfundise ukuthi ibhukwana elithi Good News for People of All Nations lingasetshenziswa njani enkonzweni lokuthi i-jw.org ingamnceda njani. Mncedise ukuthi akukhuthalele ukuyabona izimpindela.—1 Khor. 3:6.
Woba lesineke njalo uzame ukumkhuthaza. (Zaga. 25:11) Futhi kumele ubeyisibonelo esihle. Nxa ebona ukuthi ulendaba laye lokuthi ukhuthele enkonzweni uzakuba lesifiso sokukulingisela.

Zama Ukwenza Okulandelayo Kulinyanga:

Sebenza lesifundo sakho enkonzweni yendlu ngendlu njalo uhambe laso nxa usiyabona ezinye izimpindela kumbe izifundo zakho. Nxa ungelaso isifundo esesitshumayela ungahlela ukuhamba lothile ebandleni osanda kuba ngummemezeli.