Zisebenzise Kuhle Izingxenye Ezisebhukwini Elithi Okufundiswa LiBhayibhili
Nxa umfundi eqhubeka efunda lokho okuseBhayibhilini futhi ekusebenzisa empilweni yakhe uyathuthuka aphile ngendlela ethokozisa uNkulunkulu. (Hubo. 1:1-3) Eyinye indlela esingamsiza ngayo umfundi yikusebenzisa kuhle izingxenye ezisebhukwini elithi Okufundiswa LiBhayibhili.
Imibuzo Esekuqaliseni Kwesahluko: Isahluko ngasinye silemibuzo esekuqaliseni ephendulwa phakathi kwesifundo. Yikho ungabala imibuzo le ukuze umfundi akulindele ngabomvu lokhu azakufunda. Okunye ongakwenza yikumcela ukuthi ayiphendule kafitshane. Lanxa angaze atshaye iganga, akulasizatho sokuthi uhle umqondise. Impendulo zakhe zizakunceda ubone lapho okumele utshaye kuzwele khona nxa usumfundisa.—Zaga. 16:23; 18:13.
Isengezo: Nxa umfundi ekuzwisisa lokho akufundayo futhi ekukholwa ungamcela ukuthi azibalele yedwa isengezo. Ngesikhathi esilandelayo lingaxoxa kafitshane ngesengezo ukuze ubone ukuthi usizwisisile yini. Kwesinye isikhathi ungafunda laye isengezo sonke loba ukhethe ezinye izindima. Kumele ulungiselele imibuzo ezamenza azwisise elikufundayo.
Ibhokisi Elisekuphetheni Kwesahluko: Ibhokisi leli lilezimpendulo zemibuzo esekuqaliseni kwesahluko. Ungalisebenzisa ukuze usuthiseke ukuthi umfundi ukuzwisisile yini akufundileyo njalo uyenelisa ukuchasisa imicijo eqakathekileyo. Balani imicijo esebhokisini kanye lemibhalo efakiweyo. Ngemva kwalokho cela umfundi achasise ukuthi imibhalo le itshengisa njani ukuthi impendulo leyo iqonde nta.—ImiSeb. 17:2, 3.