Umhlaba lo Uzaphela Yini?

Engxenye uyakwazi ukuthi iBhayibhili likhuluma ngokuphela komhlaba. (1 UJohane 2:17) Liyabe lisitsho ukuphela kwabantu yini? Umhlaba uzasala ungaselalutho oluphilayo yini kumbe uzatshabalaliswa?

IMPENDULO YEBHAYIBHILI NGUHATSHI

Kuyini Okungasoze Kutshabalaliswe?

ABANTU

Okutshiwo liBhayibhili: UNkulunkulu “kawudalanga [umhlaba] ukuba ungabi lalutho, kodwa wawenza ukuba kuhlalwe kuwo.”—U-ISAYA 45:18.

Umfula olezintaba legusu emaceleni kwawo.

UMHLABA

Okutshiwo liBhayibhili: “Izizukulwane ziyafika, izizukulwana ziyedlula, kodwa umhlaba umi lanini.”—UMTSHUMAYELI 1:4.

KUTSHONI: IBhayibhili lithi umhlaba awusoze utshabalaliswe njalo uzahlala ulabantu. Manje ukuphela komhlaba kutshoni?

CABANGA NGALOKHU: IBhayibhili lifanisa ukuphela komhlaba lo lalokho okwenzakala ngesikhathi sikaNowa. Ngalezonsuku umhlaba ‘wawugcwele ubudlwangudlwangu.’ (UGenesisi 6:13) Kodwa uNowa yena wayelungile. Yikho uNkulunkulu wasindisa uNowa lemuli yakhe kodwa watshabalalisa abantu ababi ngoZamcolo. Nxa iBhayibhili likhuluma ngalokhu lithi: ‘Umhlaba wangalesosikhathi wabhujiswa, lapho usibekelwa ngamanzi.’ (2 UPhetro 3:6) Lokhu kwakuyikuphela kwalowo mhlaba. Kodwa kuyini okwabhujiswayo? Ngabantu ababi ababesemhlabeni hatshi umhlaba ngokwawo. Yikho nxa iBhayibhili likhuluma ngokuphela komhlaba kalitsho ukutshabalaliswa kweplanethi yethu. Litsho ukutshabalaliswa kwabantu ababi lokuphela kwezinto ezimbi ezenzakala emhlabeni.

Kuyini Okuzaphela?

INHLUPHO LABANTU ABABI

Okutshiwo liBhayibhili: “Kuseyisikhatshana nje, ababi bazabe bengasekho; loba usubadinga kabasayikufunyanwa. Kodwa abathobekileyo bazakudla ilifa lelizwe bakholise ukuthula okukhulu.”—IHUBO 37:10, 11.

Umfanekiso: 1. Amasela azivale ubuso aphuma esitolo ethwele izinto azitshontshileyo. 2. Indoda inika omunye isikhwama esigcwele imali.

KUTSHONI: Lanxa abantu ababi batshabalaliswa nguZamcolo ngesikhathi sikaNowa, baphinda babakhona ngemva kukaZamcolo futhi benza impilo yabanzima emhlabeni. Sekuseduze ukuthi uNkulunkulu abhubhise bonke abantu abenza izinto ezimbi njengoba nje umhubi wathi: “Ababi bazabe bengasekho.” Uzakwenza njalo esebenzisa uMbuso wakhe. UMbuso lo nguhulumende osezulwini ozabusa abantu abamlalelayo.

CABANGA NGALOKHU: Ababusi bomhlaba bazawusekela yini uMbuso kaNkulunkulu? IBhayibhili lisitshela ukuthi abasoze. Bazamelana lawo futhi lokhu kuyabe kuyibuthutha obuphindiweyo. (IHubo 2:2) Besekuphetha ngani? UMbuso kaNkulunkulu uzabakhipha bonke ohulumende babantu njalo “wona uzakuma laphakade.” (UDanyeli 2:44) Kodwa kungani kumele imibuso yabantu iphele?

OKUFUNAKALAYO—Yikuthi Imibuso Yabantu Iphele

Okutshiwo liBhayibhili: “Umuntu akusikho kwakhe ukuthi aqondise izinyathelo zakhe.”—UJEREMIYA 10:23.

Abantu badlula umduli ogcwele amaphepha emikhankaso yezombusazwe.

KUTSHONI: Abantu abadalelwanga ukuthi bazibuse. Yikho abenelisi ukubusa abanye abantu lokuqeda inhlupho ezikhona.

CABANGA NGALOKHU: Ibhuku elithi Britannica Academic libika ukuthi ohulumende kukhanya abenelisi “ukuqeda inhlupho zabantu ezinjengobuyanga, indlala, imikhuhlane, ingozi zemvelo kanye lezimpi kumbe udlakela.” Liqhubeka lisithi: ‘Abanye bacabanga ukuthi nxa kungabunjwa uhulumende oyedwa ozabusa umhlaba wonke angaqeda inhlupho zonke lezi.’ Kodwa iqiniso yikuthi lanxa ohulumende bonke bengabambana umhlaba uyabe ulokhu ubuswa ngabantu abalesono abangenelisi ukuqeda izinhlupho eziqanjwe phezulu. UMbuso kaNkulunkulu yiwo wodwa uhulumende olamandla okuqeda zonke inhlupho ezisemhlabeni zingaphindi zibe khona.

Yikho ngokwalokho okutshiwo liBhayibhili abantu abalungileyo akumelanga besabe ukuphela komhlaba loba okomumo lo wezinto. Kodwa kumele bakulindele ngabomvu ngoba umhlaba lo owonakeleyo uzasuswa besekusiba lomhlaba kaNkulunkulu omutsha oyabe umuhle okwamagama!

Kuzakwenzakala nini lokhu? Isihloko esilandelayo sizasinika impendulo etholakala eBhayibhilini.