Ungenzani Ukuze Uphile Emhlabeni Omutsha?

Ezihlokweni ezidlulileyo sibonile ukuthi sekuseduze ukuthi uNkulunkulu atshabalalise abantu ababi futhi aqede zonke inhlupho. Asithandabuzi ukuthi lokhu kuzakwenzakala ngoba iLizwi likaNkulunkulu iBhayibhili lithi:

“Umhlaba uyadlula.”—1 UJOHANE 2:17.

Siyaqiniseka ukuthi bakhona abazasinda ngoba ivesi le iphinda ithi:

“Lowo owenza intando kaNkulunkulu uhlala ekhona kuze kube nini lanini.”

Ngakho-ke, nxa sifuna ukusinda kumele senze intando kaNkulunkulu. Kufanele siqale simazi ukuze siyazi intando yakhe.

‘KUMELE UMAZI’ UNKULUNKULU UKUZE USINDE NXA UKUPHELA KUFIKA

Umfanekiso: 1. Unesi uhlezi phansi esibhedlela, udiniwe njalo usephele amandla. 2. Usendaweni yokudlela abesebona omunye asebenza laye ekholisa ukubala imagazini. 3. Asebenza laye umbalela ivesi, amnike lekhadi le-jw.org.

UJesu wathi: “Ukuze bathole ukuphila okungapheliyo, kumele bakwazi wena onguwe wedwa uNkulunkulu weqiniso.” (UJohane 17:3) ‘Kumele simazi’ uNkulunkulu ukuze sisinde nxa ukuphela kufika futhi siphile kuze kube nini lanini. Akwanelanga ukuphonguvuma ukuthi uNkulunkulu ukhona kumbe ukwazi okuthile ngaye. Kumele sibe ngabangane bakhe. Njengoba nje kufanele sizinike isikhathi sokuba labangane bethu ukuze siqinise ubungane, kumele sizinike isikhathi sokwenza izinto ezizasinceda ukuthi siqinise ubungane bethu loNkulunkulu. Khathesi asixoxeni ngokunye okuqakathekileyo esikufunda eBhayibhilini okusinceda ukuthi sibe ngabangane bakaNkulunkulu njalo sihlale singabangane bakhe abaseduze.

Iqiniso Esilifunda EBhayibhilini

Sifunda ukuthi uNkulunkulu wayefuna siphile ePharadayisi.

Wadala abantu bokuqala u-Adamu lo-Eva wabafaka endaweni enhle eyayibizwa ngokuthi yisivande sase-Edeni. Babengelasono futhi uNkulunkulu wayebanike konke ababekudinga ukuze bathokoze empilweni. Babengaphila kuze kube nini lanini. Aluba baqhubeka bengabangane bakaNkulunkulu babengasoze bafe. Kodwa bakhetha ukungalaleli umthetho olula ababewunikwe nguNkulunkulu.

Sifunda ukuthi kungani sihlupheka.

Umuntu wokuqala u-Adamu, kazange alalele uNkulunkulu yikho yena labantu bonke babengasenelisi ukuphila kuze kube nini lanini. IBhayibhili lithi: “Isono sangena emhlabeni ngomuntu oyedwa, lokufa kwangena ngesono, ngaleyondlela ukufa kwafika ebantwini bonke.” (KwabaseRoma 5:12) Sonke abantwana baka-Adamu sizalwa silesono esisithethe kuye njengoba nje umntwana engazalwa elomkhuhlane awuthethe ebazalini bakhe. Lokhu kwenza siguge njalo sife.

Sifunda ngalokho uNkulunkulu asekwenzile ukuze asincede.

IBhayibhli lithi: “UNkulunkulu wawuthanda kakhulu umhlaba waze wanikela ngeNdodana yakhe ezelwe yodwa, ukuze wonke umuntu otshengisa ukuthi ulokholo kuyo angabhujiswa, kodwa abe lokuphila okungapheliyo.” (UJohane 3:16) UNkulunkulu wathuma uJesu emhlabeni ukuthi azosifela. Indoda ethile edabuka e-India eleminyaka engu-86 okuthiwa nguPrabhakar yakhuluma ngalokhu yathi: “Kutshengisa ukuthi uJehovaa uyangithanda kakhulu. Uthando lwakhe lungenze ngaba lethemba lokuthola ukuphila okungapheliyo.”

Sifunda ukuthi singatshengisa njani ukuthi siyabonga ngalokho uNkulunkulu asenzele khona.

IBhayibhili lisitshela ukuthi singatshengisa ukuthi siyabonga ngalokho uNkulunkulu asenzele khona ‘ngokulalela imilayo yakhe.’ (1 UJohane 2:3) UJehova uNkulunkulu utshengisa ukuthi uyasithanda ngokusitshela ukuthi singenzani ukuze sithokoze empilweni. (U-Isaya 48:17, 18) Kafuni sihlupheke. Uthembisa ukuthi nxa singalalela lokho asitshela khona sizathokoza khathesi futhi sithole ukuphila okungapheliyo.

BALA ILIZWI LIKANKULUNKULU NSUKU ZONKE

Unesi ukhangele ezulwini ngemva kokubala iBhayibhili ngesikhathi eku-lunch phandle kwesibhedlela. — Nxa ungathandaza kuJehova ucele ukuthi akuncedise njalo wenze intando yakhe uzasinda ngesikhathi umhlaba lo usuphela

Siyadla nsuku zonke ukuze siqhubeke siphila. Kodwa uJesu wathi: “Umuntu akumelanga aphile ngesinkwa kuphela, kodwa ngalo lonke ilizwi eliphuma emlonyeni kaJehova.”—UMathewu 4:4.

Amazwi kaJehova siwathola eBhayibhilini. Ngesikhathi ulibala uzafunda ngalokho uNkulunkulu akwenza kudala lalokho akwenza khathesi kanye lalokho azakwenza esikhathini esizayo.

THANDAZA UCELE UKUTHI UNKULUNKULU AKUNCEDISE

Ungenzani nxa ufuna ukulalela uNkulunkulu kodwa uthwala nzima ukutshiya ukwenza izinto athi zimbi? Ukumazi kungakunceda kakhulu.

Omunye owesifazana esizambiza ngokuthi nguSakura, wayengaziphathanga. Wathi eqalisa ukufunda iBhayibhili wafunda ngomlayo kaNkulunkulu othi “balekelani ukuziphatha okubi kwezemacansini.” (1 KwabaseKhorinte 6:18) USakura wakhuleka kuJehova ecela ukuthi amnike amandla futhi wenelisa ukutshiya umkhuba lo omubi. Kodwa ulokhu elwisana lesilingo sokuziphatha kubi. Uthi: “Nxa sengifikelwa ngumcabango wokuziphatha kubi ngiyakhuleka kuJehova ngenhliziyo yonke ngoba ngeke ngenelise ukulwisana lakho ngingedwa. Ukubona indlela umthandazo olamandla ngayo kungisondeze eduze kakhulu loJehova.” Amamiliyoni abantu ayafunda ngoNkulunkulu ukuze amazi njengoSakura. Ubanika amandla ukuze batshintshe impilo zabo njalo baphile ngendlela emthokozisayo.—KwabaseFiliphi 4:13.

Nxa ungaqhubeka usibamazi uNkulunkulu laye ‘uzakwazi’ njalo uzakuba ngumngane wakhe oligugu. (UGalathiya 4:9; IHubo 25:14) Lokhu kuzakwenza usinde futhi uphile emhlabeni omutsha asithembisa wona. Kodwa kuzabe kunjani ukuphila emhlabeni lo? Isihloko esilandelayo sizasichasisela.

a IBhayibhili lisitshela ukuthi ibizo likaNkulunkulu nguJehova.