Vumela “Umthetho Womusa” Ukuqondise

Omunye udade okuthiwa nguLisaa wathi: “Umusa engawutshengiswa ngabafowethu labodadewethu yiwo owangenza ngafuna ukufunda iBhayibhili.” U-Anne laye wathi: “Okwanginceda kakhulu ukuthi ngibe nguFakazi ngumusa engawutshengiswayo ukwedlula lokho engangikufundiswa.” Odade laba sebekuthanda ukufunda iBhayibhili lokucabangisisa ngalokho abakubalayo futhi okwabanceda kakhulu yikuthi batshengiswa umusa.

Singatshengisa njani umusa kwabanye? Sizaxoxa ngendlela ezimbili. Eyokuqala, yindlela esisebenzisa ngayo ulimi lwethu. Eyesibili yizenzo zethu. Sizaxoxa langokuthi ngobani okumele sibatshengise umusa.

“UMTHETHO WOMUSA” KUMELE UBE SOLIMINI LWAKHO

Umfazi omuhle okukhulunywa ngaye kuZaga isahluko 31 kuthiwa ‘ulomthetho womusa’ olimini lwakhe. (Zaga. 31:26, NWT) Uvumela “umthetho” lo uqondise lokho akutshoyo lendlela akhuluma ngayo. Obaba labo kumele babe ‘lomthetho’ lo olimini lwabo. Abazali abanengi bakwazi mhlophe ukuthi ukukhuluma ngolaka kuyamlimaza umntwana njalo kungenza angalaleli lokho abakutshoyo. Yikho kumele bakhulume labo ngendlela elomusa ukuze kube lula ukuthi babalalele.

Kungelani lokuthi ungumzali loba hatshi kuyini okungakunceda ukuthi ukhulume ngendlela elomusa? Impendulo siyithola emazwini okuqala akuZaga 31:26 athi, “Ukhuluma ngenhlakanipho.” Lokhu kutsho ukuthi kumele sikhethe kuhle lokho esizakukhuluma njalo sinanzelele lendlela esikhuluma ngayo. Okunye okuzasinceda yikuzibuza ukuthi lokho esifuna ukukutsho kuzabazondisa yini abanye kumbe kuzakwenza kube lokuthula. (Zaga. 15:1) Kuyikuhlakanipha ukuqala ucabange ungakakhulumi.

Esinye isaga sithi: “Amazwi okubhuda agwaza njengenkemba.” (Zaga. 12:18) Nxa singacabanga ngokuthi lokho esikutshoyo lendlela esikutsho ngayo kungabaphatha njani abanye sizakhuluma kuhle labo. Nxa ‘silomthetho womusa’ asisoze sikhulume amazwi ahlabayo loba sikhulume ngendlela engelamusa. (Efe. 4:31, 32) Sizenelisa ukulahla imicabango engalunganga lenkulumo elimazayo besesikhuluma ngomusa futhi sikhuthaze abanye. Lathi singalingisela indlela uJehova enza ngayo ngesikhathi ekhuthaza inceku yakhe u-Elija eyayisesaba. Ingilosi eyayimele uJehova yakhuluma laye ngelizwi ‘elipholileyo inyenyeza.’ (1 AmaKho. 19:12) Lanxa kunjalo ukuba lomusa akupheleli ekukhulumeni kuphela kodwa kugoqela lezenzo. Singakwenza njani lokhu?

UKUTSHENGISA UMUSA NGEZENZO KUYABANCEDA ABANYE

Ukukhuluma labanye ngendlela elomusa ayisiyo yodwa indlela esingalingisela ngayo uJehova. Kumele sibenzele lezenzo zomusa. (Efe. 4:32; 5:1, 2) ULisa esike sakhuluma ngaye wakhuluma ngomusa awutshengiswa ngoFakazi. Wathi: “Imuli yangakithi yathi iphiwe isikhathi esincane sokuthutha, abafowethu ababili labomkabo bacela isikhathi emsebenzini ukuze bazosincedisa ukupakitsha. Khonapho ngangingakaqalisi lokufunda iBhayibhili.” Umusa awutshengiswayo yiwo owamenza waba lesifiso sokufunda iBhayibhili.

U-Anne esikhulume ngaye ekuqaliseni uyabonga ngomusa awutshengiswa ngoFakazi. Uthi, “Indlela abantu bomhlaba lo abenza ngayo yangenza ngangasathembi muntu.” Uqhubeka esithi, “Ngathi ngiqala ukuhlangana laboFakazi ngangingabathembi. Ngazibuza ukuthi bafunani vele kimi. Kodwa umuntu owangifundisa iBhayibhili wangitshengisa umusa futhi lokhu kwenza ngamthemba.” Kwamnceda njani lokhu? Uthi, “Ngokuhamba kwesikhathi, ngaqalisa ukucabangisisa ngengangikufunda.”

ULisa lo-Anne baqalisa ukufunda iBhayibhili ngenxa yomusa abawutshengiswa ngabanye ebandleni. Ukutshengiswa umusa yikho okwenza bamthemba uJehova labantu bakhe.

LINGISELA UNKULUNKULU NGOKUBA LOMUSA KWABANYE

Abanye abantu bajayele ukukhuluma ngendlela elomusa lokuhlala bebobotheka ngenxa yendlela abakhuliswe ngayo. Abantu abanjalo balomusa ngenxa yobuntu babo obuhle kumbe ngenxa yesiko lalapho abakhulele khona. Kodwa lokhu akutsho ukuthi balingisela uNkulunkulu.—Khangela imiSebenzi 28:2.

Umusa yisithelo somoya ongcwele kaNkulunkulu. (Gal. 5:22, 23) Yikho umoya ongcwele kaNkulunkulu yiwo ongasincedisa ukuthi sibe lomusa. Nxa silomusa siyabe silingisela uJehova loJesu. Siyabe sitshengisa ukuthi siyamthanda uJehova. Siyabe silingisela uJesu nxa silendaba labanye futhi lokhu kutshengisa ukuthi siyabathanda. Yikho okwenza sibatshengise umusa yikuthi siyamthanda uJehova labantu. UNkulunkulu uyathokoza nxa simlingisela ngokutshengisa abanye umusa ngokusuka enhliziyweni.

NGOBANI OKUMELE SIBATSHENGISE UMUSA?

Kulula ukuba lomusa kulabo abalomusa kithi kumbe ebantwini esibaziyo. (2 Sam. 2:6; Kol. 3:15) Kodwa kumele senzeni nxa sibona angani omunye umuntu kafanelanga ukuthi simtshengise umusa?

Cabanga ngalokhu. UJehova uyisibonelo esihle ekutshengiseni umusa omkhulu ebantwini bonke, kungelani lokuthi balungile kumbe abalunganga. EBhayibhilini usifundisa isifundo esiqakathekileyo mayelana lokutshengisa umusa omkhulu. Umutsho othi “umusa omkhulu” usetshenziswa kanengi eMibhalweni YamaKhristu YesiGrikhi. Umutsho lo ungasebenza emuntwini ophanayo oyenzela omunye into enhle, lanxa umuntu lo engafanelanga ukwenzelwa into le. UNkulunkulu usitshengisa njani umusa?

UJehova utshengisa umusa ebantwini bonke ngokubanika abakudingayo ukuze baqhubeke bephila. (Mat. 5:45) Wasitshengisa umusa singakamazi lokumazi. (Efe. 2:4, 5, 8) Ngokwesibonelo, wathuma iNdodana yakhe eyiyo yodwa ukuthi izofela abantu bonke. Umphostoli uPhawuli wathi uJehova wasinika inhlawulo ngenxa “yomusa wakhe omkhulu.” (Efe. 1:7) Kanti njalo uJehova uqhubeka esiqondisa njalo esifundisa lanxa simphambanisela futhi simdanisa. Ukufundisa kwakhe lamazwi akhe ‘kunjengemifefezo’ etshaya kuhle kuhle etshanini. (Dute. 32:2) Asingeke siwubhadale wonke umusa asitshengisa wona. Siyakwazi ukuthi besingeke sibe lethemba lokuthola impilo engcono esikhathini esizayo aluba uJehova kasitshengisanga umusa.—Khangela u-1 Phetro 1:13.

Umusa kaJehova wenza simthande kakhulu njalo uyasikhuthaza. Yikho kulokuthi sikhethe ukuthi ngobani esibatshengisa umusa kumele silingisele uJehova ngokuba lomusa ebantwini bonke nsuku zonke. (1 Thes. 5:15) Nxa singahlala sitshengisa abanye umusa sizakuba njengomlilo okhudumeza abantu nxa kugodola. Sizabaduduza abanye emulini, ebandleni, emsebenzini, esikolo lasemphakathini.

Akucabange ngamalunga emuli yakho kumbe ngabanye ebandleni abangancedakala nxa ungakhuluma labo ngomusa kumbe ubenzele izenzo zomusa. Ukhona yini ebandleni odinga ukuncediswa ukuklina endlini kumbe ukulungiselwa ingadi loba ongayamthengela izinto azidingayo? Kanti njalo nxa ungahlangana lomuntu odinga ukuncediswa ngento ethile usekutshumayeleni, ungamncedisa yini?

Asilingiseleni uJehova ngokuvumela ukuthi “umthetho womusa” uqondise lokho esikutshoyo lesikwenzayo.