Lingisela Indlela UJehova LoJesu Abacabanga Ngayo

1-2. Ukuthanda uJehova kugoqelani, futhi uJesu watshengisa njani ukuthi wayemthanda ngengqondo yakhe yonke?

“KUMELE uthande uJehova uNkulunkulu wakho ngenhliziyo yakho yonke, langomphefumulo wonke, langamandla akho wonke, langengqondo yonke.” (Luk. 10:27) UJesu wathi lo yiwo umthetho oqakatheke kulayo yonke emthethweni kaMosi. Nanzelela ukuthi kumele sithande uJehova ngenhliziyo yethu yonke. Lokhu kugoqela esikufisayo kanye lendlela esizizwa ngayo. Kanti njalo kumele simthande ngomphefumulo wonke langamandla ethu wonke. Kumele simthande langengqondo yethu yonke, okutsho indlela esicabanga ngayo. Liqiniso ukuthi asingeke siyizwisise ngokugcweleyo indlela uJehova acabanga ngayo kodwa nxa singahlola indlela uKhristu acabanga ngayo sizazwisisa ukuthi uJehova ucabanga njani. Phela uJesu wayecabanga ngendlela uYise acabanga ngayo.—1 Khor. 2:16 lomcijo wokutaditsha othi “we do have the mind of Christ,” ku-Nguqulo Yomhlaba Omutsha yesiNgisi okuthiwa yi-Study Bible.

² UJesu wayethanda uJehova ngengqondo yakhe yonke. Wayekwazi ukuthi uNkulunkulu wayefuna enzeni futhi wayezimisele ukukwenza lanxa kwakungabangela ukuthi athwale nzima. Ayekuqakathekisa kakhulu yikwenza intando kaYise, yikho kazange avume ukuthi loba yini imphambanise.

3. Kuyini umphostoli uPhetro akufunda kuJesu njalo wakhuthaza amanye amaKhristu ukuthi enzeni? (1 Phetro 4:1)

³ UPhetro labanye abaphostoli baba lesibusiso sokuba loJesu futhi lokhu kwenza bazwisisa indlela ayecabanga ngayo. Encwadini yakhe yokuqala uPhetro ayibhalela amaKhristu wawakhuthaza ukuthi ahlome ngesimo sengqondo esinjengesikaKhristu.a (Bala u-1 Phetro 4:1.) Ibala elasetshenziswa nguPhetro elithi “hlomani” lalijayele ukusetshenziswa empini. Nxa umKhristu angalingisela indlela uJesu ayecabanga ngayo uyabe ehlome ngesikhali esilamandla esizamnceda ukuthi alwisane lezifiso ezimbi lokuthi amelane lezilingo zomhlaba lo obuswa nguSathane.—2 Khor. 10:​3-5; Efe. 6:12.

4. Sizaxoxa ngani esihlokweni lesi?

⁴ Esihlokweni lesi sizahlola indlela uJesu ayecabanga ngayo besesibona ukuthi singamlingisela njani. Sizabona ukuthi singayilingisela njani indlela uJehova acabanga ngayo ngoba lokhu kuzasinceda ukuthi sibe ngqondonye. Sizaxoxa langokuthi singenzani ukuze sithobeke lokuthi ukuhlala sithandaza kungasinceda njani ukuthi sizisebenzise kuhle izingqondo zethu.

LINGISELA INDLELA UJEHOVA ACABANGA NGAYO

5. Kunini lapho uPhetro ehluleka khona ukulingisela indlela uJehova acabanga ngayo?

⁵ Ake sixoxe ngokwenzakala ngelinye ilanga uPhetro aze ehluleke ukulingisela indlela uJehova acabanga ngayo. UJesu wayetshele abaphostoli bakhe ukuthi kwakumele aye eJerusalema lapho ayezanikelwa khona kubakhokheli abangamaJuda, ahlukuluzwe futhi acine ebulawa. (Mat. 16:21) Kukhanya kwakunzima ukuthi uPhetro akwamukele ukuthi uJehova wayengavumela ukuthi uJesu abulawe, njengoba uJesu wayelithemba labako-Israyeli futhi enguMesiya owayethenjisiwe. (Mat. 16:16) Ngakho uPhetro wamdonsela eceleni wathi kuye: “Zizwele isihawu Nkosi. Lokho ngeke kwenzakale kuwe loba sekutheni.” (Mat. 16:22) Njengoba uPhetro engazange alingisele indlela uJehova acabanga ngayo endabeni le, wayengekho ngqondonye loJesu.

6. UJesu watshengisa njani ukuthi wayecabanga ngendlela uJehova acabanga ngayo?

⁶ UJesu wayecabanga ngendlela uYise osezulwini acabanga ngayo. UJesu watshela uPhetro wathi: “Yana emva kwami Sathane! Uyisikhubekiso kimi ngoba awucabangi imicabango kaNkulunkulu kodwa ucabanga eyabantu.” (Mat. 16:23) Lanxa uPhetro wayengabe efisela uJesu okuhle, uJesu kazange avumelane laye. Sifundani? Kwakungayisiyo ntando kaJehova ukuthi uJesu azizwele. UPhetro wafunda isifundo esiqakathekileyo esokuthi imicabango yakhe kumele ivumelane lemicabango kaNkulunkulu.

7. UPhetro watshengisa njani ukuthi wayefuna ukuthi indlela acabanga ngayo ivumelane lekaJehova? (Khangela umfanekiso ongaphandle.)

⁷ Ngokuhamba kwesikhathi uPhetro watshengisa ukuthi wayefuna ukuthi indlela acabanga ngayo ivumelane lekaJehova. Isikhathi sikaJehova sokuthi abantu bezinye izizwe abangasokwanga babe semulini yakhe sasesifikile. UPhetro wathunywa ukuthi ayetshumayeza uKhoneliya owayengowezinye izizwe. UKhoneliya waba phakathi kwabantu bezinye izizwe bokuqala ukuba ngamaKhristu. Njengoba amaJuda ayengadlelani labantu bezinye izizwe, uPhetro kwakumele ancediswe ukuze awenze kuhle umsebenzi lo ayesewuphiwe. UPhetro wathi eseyizwisisile intando kaNkulunkulu ngendaba le, watshintsha indlela ayecabanga ngayo. Yikho ‘engazange athikaze’ ngesikhathi ethunywa. (Imiseb. 10:​28, 29) Watshumayeza uKhoneliya labendlu yakhe njalo babhabhathizwa.—Imiseb. 10:​21-23, 34, 35, 44-48.

8. Singatshengisa njani ukuthi indlela esicabanga ngayo iyavumelana lekaJehova? (1 Phetro 3:8 lamabala angaphansi.)

⁸ Ngemva kweminyaka ethile, uPhetro wakhuthaza amaKhristu ukuthi ‘avumelane emcabangweni’. (Bala u-1 Phetro 3:8 lamabala angaphansi.) Sizenelisa ukuvumelana emicabangweni labafowethu labodadewethu nxa singalingisela indlela uJehova acabanga ngayo esiyifunda eLizwini lakhe iBhayibhili. Ngokwesibonelo uJesu watshela abalandeli bakhe ukuthi bafune kuqala uMbuso. (Mat. 6:33) Omunye ummemezeli osebandleni lenu angakhetha ukungena enkonzweni yesikhathi sonke elalela okwakhulunywa nguJesu. Nxa sekunjalo akumelanga simkhuthaze ukuthi azizwele isihawu kodwa kumele simncome ngalokho akwenzayo futhi simsekele.

THOBEKA

9-10. UJesu watshengisa njani ukuthi wayethobekile sibili?

⁹ UJesu engakabulawa wafundisa uPhetro labanye abaphostoli isifundo esiqakathekileyo esimayelana lokuthobeka. UJesu wayethume uPhetro loJohane ukuthi bayelungisa lapho ababezadlela khona njengoba wayefuna ukudla labo okokucina engakabulawa. Ekulungiseleleni kwabo kumele ukuthi baba leqiniso lokuthi kuba lenditshi lamathawulo ukuze nxa abantu befika bageze inyawo zabo bengakadli. Kodwa ngubani owayezatshengisa ukuthi uthobekile agezise abanye inyawo?

¹⁰ UJesu kazange atshone ethikaza futhi lokho kwatshengisa ukuthi wayethobekile sibili. Kumele ukuthi abafundi bakhe bamangala kakhulu ngoba umsebenzi lo wawandise ukwenziwa yisigqili. UJesu wabeka eceleni izembatho zakhe zangaphandle wasethatha ithawulo wayithandela ekhalweni, wathela lamanzi enditshini, waseqalisa ukugezisa abafundi bakhe inyawo. (Joh. 13:​4, 5) Kumele ukuthi wathatha isikhathi eside egezise inyawo zabaphostoli abangu-12 okugoqela lezikaJudasi owayezamthengisa. Kodwa uJesu wenza umsebenzi lo ngenxa yokuthi wayethobekile. Ngemva kwalokho uJesu wathi kubo: “Liyakuzwisisa yini lokhu engikwenze kini? Lingibiza ngokuthi ‘Mfundisi’ langokuthi ‘Nkosi’ njalo liqondile ngoba ngiyikho lokho. Yikho nxa mina engiyiNkosi loMfundisi ngiligezise inyawo, lani kumele ligezisane inyawo.”—Joh. 13:​12-14.

11. Kukhanya njani ukuthi uPhetro wayesethobekile? (1 UPhetro 5:5) (Khangela lomfanekiso.)

¹¹ UPhetro wafunda ukuthi laye kumele athobeke njengoJesu. Kwathi uJesu esebuyele ezulwini, uPhetro wenza isimangaliso sokwelapha indoda eyayizelwe igogekile. (Imiseb. 1:​8, 9; 3:​2, 6-8) Ixuku lathi libona isimanga lesi latheleka ngobunengi lagcwalela uPhetro. (Imiseb. 3:11) Njengoba uPhetro wayekhulele emphakathini oqakathekisa ukubukwa ngabantu, walwamukela yini udumo olwaluvela ebantwini? Hatshi kenzanga njalo, yena wakhazimulisa uJehova loJesu wathi: “Indoda le eliyibonayo leliyaziyo isiliswe ngebizo [likaJesu’] langokholo lwethu ebizweni leli.” (Imiseb. 3:​12-16) Amabala asetshenziswa nguPhetro ngesikhathi ebhalela amaKhristu incwadi ekhuluma ngokuqakatheka kokuthobeka asikhumbuza lokho okwenziwa nguJesu aze agezise abaphostoli bakhe inyawo, wathatha ithawulo wasegezisa abaphostoli bakhe inyawo.—Bala u-1 Phetro 5:5.

12. Singenzani ukuze sithobeke njengoPhetro?

¹² Lathi singenelisa ukulingisela uPhetro ngokuzama ukuba ngabantu abathobekileyo. Ukuthobeka kweqiniso akukhanyi ngamazwi esiwakhulumayo kuphela kodwa langesikwenzayo. Ibala lesiGrikhi elasetshenziswa nguPhetro elihunyutshwe ngokuthi ukuthobeka ligoqela indlela esizibona ngayo lesibona ngayo abanye. Nxa sithobekile sizakwenzela abantu izinto ezinhle ngenxa yokuthi siyabe sibathanda futhi sithanda uJehova, hatshi ukuthi sifuna ukubukwa. Sitshengisa ukuthi sithobekile nxa siqhubeka sisebenzela uJehova futhi sisenzela abafowethu okuhle kungelani lokuthi abanye abantu bayakubona kumbe abakuboni esikwenzayo.—Mat. 6:​1-4.

SEBENZISA KUHLE INGQONDO

13. Kutshoni ukusebenzisa kuhle ingqondo?

¹³ Kutshoni ‘ukusebenzisa kuhle ingqondo’? (1 Phet. 4:7) UmKhristu oyisebenzisa kuhle ingqondo uqala adingisise ukuthi uJehova uyibona njani indaba engakenzi isinqumo. UmKhristu onjalo uyakwazi ukuthi into eqakatheke kakhulu ekuphileni kwakhe yikuhlala engumngane kaJehova. Uyananzelela lokuthi kayisizo zonke izinto azaziyo, kulalapho acina khona. UmKhristu onjalo uhlala ethandaza kuJehova emcela ukuthi amncedise kukho konke akwenzayo.b

14. Kuyini okwenza uPhetro wehluleka ukuthembela kuJehova?

¹⁴ UJesu wathi esezabotshwa watshela abafundi bakhe wathi: “Lonke lizakhubeka ngenxa yami ngalobubusuku.” UPhetro wazitshela ukuthi ulesibindi waphendula wathi: “Lanxa bonke abanye bengakhubeka ngenxa yakho, mina angisoze ngafa ngakhubeka!” Ngalobobusuku uJesu waphinda wakhuthaza abafundi bakhe wathi: “Hlalani lilindile futhi likhuleka.” (Mat. 26:​31, 33, 41) Ngabe uPhetro wakwenza lokho okwakutshiwo nguJesu mhlawumbe wayengaba lesibindi sokuvuma ukuthi ungumfundi wakhe. Kodwa yena wayiphika iNkosi yakhe futhi wazisola kakhulu.—Mat. 26:​69-75.

15. Ngobusuku bakhe bokucina uJesu watshengisa njani ukuthi wayethembele kuJehova ngenhliziyo yakhe yonke?

¹⁵ UJesu wayethembele kuJehova ngenhliziyo yakhe yonke. Yikho wayehlala ethandaza lanxa wayengelasono. Lokho kwamenza waba lesibindi sokwenza intando kaJehova, kumnyama kubomvu. (Mat. 26:​39, 42, 44; Joh. 18:​4, 5) Kufanele ukuthi uPhetro kazange akhohlwe ukuthi uJesu wathandaza kanengi ngobusuku bakhe bokucina.

16. UPhetro watshengisa njani ukuthi wayesethembele kuJehova ngenhliziyo yonke? (1 UPhetro 4:7)

¹⁶ Ngokuhamba kwesikhathi uPhetro laye wakufunda ukuthi kumele athembele kuJehova ngokuthandaza kanengi. UJesu wathi esevusiwe watshela uPhetro labanye abaphostoli ukuthi babezaphiwa umoya ongcwele owawuzabanceda ukuthi benze umsebenzi wokutshumayela. Kodwa uJesu wabatshela ukuthi bengasuki eJerusalema baze banikwe umoya ongcwele. (Luk. 24:49; Imiseb. 1:​4, 5) UPhetro wayesenzani ngalesosikhathi? Yena lamanye amaKhristu “babeqhubeka bethandaza.” (Imiseb. 1:​13, 14) UPhetro wathi ebhala incwadi yakhe yokuqala wakhuthaza amaKhristu ukuthi azisebenzise kuhle ingqondo futhi ahlale ethandaza ukuze atshengise ukuthi athembele kuJehova. (Bala u-1 Phetro 4:7.) UPhetro wafunda ukuthi kuqakathekile ukuthembela kuJehova njalo waba yinsika yebandla.—Gal. 2:9.

17. Kuyini okumele siqhubeke sikwenza lanxa kulezinye izinto esibona kulula ukuthi sizenze? (Khangela lomfanekiso.)

¹⁷ Nxa sifuna ukuzisebenzisa kuhle ingqondo zethu kumele sihlale sithandaza kuJehova. Kumele siqhubeke sithandaza kuJehova lanxa kulezinye izinto esingabona kulula ukuthi sizenze singathandazanga. Nxa sisenza izinqumo eziqakathekileyo, kuqakatheke kakhulu ukuthi sithandaze sicela ukuthi uJehova asikhokhele futhi sithembe ukuthi uyakwazi okuzasinceda.

18. Kuyini okungasinceda ukuthi sicabange ngendlela uJehova acabanga ngayo?

¹⁸ Siyambonga kakhulu uJehova ngoba wasenza senelisa ukulingisela ubuntu bakhe. (Gen. 1:26) Kodwa lokhu akutsho ukuthi asisaphambanisi. (Isaya. 55:9) Kodwa njengoPhetro, singazama ukwenza konke okusemandleni ethu ukuthi silingisele indlela uJehova acabanga ngayo. Kasizameni ukulingisela indlela uJehova acabanga ngayo, sizame ukuba ngabantu abathobekileyo, futhi sizisebenzise kuhle ingqondo zethu.