Ukuba Seduze Labafowethu Labodadewethu Kuyasinceda!

1-2. UJehova ufuna sibaphathe njani abanye?

UJEHOVA uyayiqakathekisa kakhulu indlela esiphatha ngayo abanye. UJesu yena wathi kumele sithande omakhelwane bethu ngendlela esizithanda ngayo. (Mat. 22:​37-39) Lokhu kutsho ukuthi kumele sithande wonke umuntu okugoqela lalabo abangamkhonziyo uJehova. Singenza njalo siyabe silingisela uJehova uNkulunkulu ohlala “esenza ukuthi ilanga lakhe liphume kwababi labahle lezulu line kwabalungileyo labangalunganga.”—Mat. 5:45.

² Lanxa uJehova ethanda bonke abantu, abathanda kakhulu yilabo abamlalelayo. (Joh. 14:21) UJehova ufuna simlingisele. Ufuna ‘sibathande kakhulu’ futhi ‘sibathande ngenhliziyo yonke’ abafowethu labodadewethu. (1 Phet. 4:8; Rom. 12:10) Indlela esithanda ngayo abafowethu labodadewethu kumele ifanane lendlela esithanda ngayo izihlobo zethu zegazi kumbe abangane bethu.

3. Singalufanisa lani uthando?

³ Njengoba nje kumele sinakekele iluba futhi silithelele ukuze liqhubeke likhula, lathi kumele sisebenze nzima ukuze sibathande abafowethu labodadewethu. Umphostoli uPhawuli watshela amaKhristu wathi “qhubekani litshengisa ukuthi lilothando lobuzalwane.” (Heb. 13:1) UJehova ufuna sisebenze nzima ukuze siqhubeke sibathanda abanye. Esihlokweni lesi sizaxoxa ngokuthi kungani kumele sisondele kubafowethu labodadewethu lokuthi singenzani ukuze siqhubeke sibathanda.

KUNGANI KUMELE SISONDELE KUBAFOWETHU LABODADEWETHU?

4. Singatshengisa njani ukuthi siyakuqakathekisa ukumanyana kwabantu bakaJehova? (Khangela lemifanekiso.)

⁴ Bala iHubo 133:1. Sivumelana lomhubi owathi “kuhle” futhi “kumnandi” ukuba ngabangane babantu abathanda uJehova. Umuntu angahlala ebona into enhle angacina engaselandaba layo. Lathi nxa singananzeleli singacina singasakuqakathekisi ukumanyana okukhona ebantwini bakaJehova. Phela sihlala sibabona abafowethu labodadewethu. Manje singatshengisa njani ukuthi siyakuqakathekisa ukumanyana lokhu njengoba abafowethu labodadewethu sihlala sibabona? Nxa singacabangisisa ngezinto ezenziwa ngabafowethu labodadewethu ebandleni kanye lalezo abasenzela zona sizabaqakathekisa kakhulu.

5. Indlela abantu bakaJehova abathandana ngayo ingabanceda njani abanye?

⁵ Abanye abantu ababuya okokuqala ngqa emihlanganweni yethu basala bebambe owangaphansi nxa bebona indlela esithandana ngayo. Khonokho nje kungabenza bakholwe ukuthi sebelitholile iqiniso. UJesu wathi: “Nxa lithandana abantu bonke bazakwazi ukuthi lingabafundi bami.” (Joh. 13:35) Ake sixoxe ngokwenzakala kuChaithrya owayeseyunivesithi ngesikhathi eqalisa ukufunda laboFakazi bakaJehova. UChaithrya wanxuswa emhlanganweni waboFakazi bakaJehova futhi wahamba. Ngelanga lokuqala evela emhlanganweni watshela umuntu owayemfundisa iBhayibhili wathi: “Abazali bami abakaze bangigone ngitsho kodwa emhlanganweni wenu ngigonwe ngabantu abangu-52 ngelanga elilodwa nje. Ngizibonele ukuthi uJehova ubesebenzisa lina ukuze angitshengise ukuthi uyangithanda. Ngiyafuna sibili ukuba semulini kaJehova.” UChaithrya waqhubeka efunda iBhayibhili futhi esebenzisa lokhu akufundayo wasebhabhathizwa ngo-2024. Liqiniso sibili ukuthi nxa abanye bengabona imisebenzi yethu emihle kanye lendlela esithandana ngayo bazaba lesifiso sokukhonza uJehova.—Mat. 5:16.

6. Ukusondela kubafowethu labodadewethu kuzasivikela njani?

⁶ Ukuba seduze kakhulu labafowethu labodadewethu kuyasivikela. Umphostoli uPhawuli watshela amaKhristu wathi: “Qhubekani likhuthazana nsuku zonke ukuze angabikhona kini obalukhuni ngenxa yamandla esono ayengayo.” (Heb. 3:13) UJehova angasebenzisa umfowethu kumbe udadewethu olelihlo elibukhali ukuze asincedise nxa kuyikuthi sesidane kakhulu kumbe sesiphambuka endleleni esimkhonza ngayo. (Hubo. 73:​2, 17, 23) Lokho kuyabe kuzasinceda kakhulu.

7. Uthando lusinceda njani? (UKholose 3:​13, 14)

⁷ Zinengi kakhulu izibusiso esizitholayo ngenxa yokuba phakathi kwabantu bakaJehova abasebenza nzima ukuze batshengise ukuthi bayathandana. (1 Joh. 4:11) Ngokwesibonelo, uthando lwenza ‘siqhubeke sibekezelelana’ futhi lokhu kwenza simanyane. (Bala uKholose 3:​13, 14; Efe. 4:​2-6) Siyakukholisa kakhulu ukuhlangana labafowethu labodadewethu sikhonza uJehova. Abanye abantu abakuboni konke lokhu.

HLONIPHA ABANYE

8. UJehova usincedisa njani ukuthi simanyane?

⁸ UJehova nguye owenza senelise ukumanyana labafowethu labodadewethu abasemhlabeni wonke lanxa sonke silesono futhi siphambanisa. (1 Khor. 12:25) IBhayibhili lithi ‘sifundiswa nguNkulunkulu ukuthi sithandane.’ (1 Thes. 4:9) UJehova usebenzisa iBhayibhili ukuze asitshele okumele sikwenze ukuze siqinise ubungane bethu labafowethu labodadewethu. Kuqakathekile ukuthi silihlolisise besesisenza lokho esiyabe sikufundile. (Heb. 4:12; Jak. 1:25) Lokhu yikho kanye oFakazi bakaJehova abazama ukukwenza.

9. Sifundani kuRoma 12:​9-13?

⁹ ILizwi likaNkulunkulu lisincedisa njani ukuthi sisondele kubafowethu labodadewethu? Asixoxeni ngokuthi umphostoli uPhawuli wathini ngendaba le kuRoma 12:​9-13. (Bala.) Manje singatshengisa njani ukuthi ‘siyakhokhela ekuhlonipheni abanye?’ Nxa sithethelela abanye, sibamukela kuhle emizini yethu futhi sibenzela lezinye izinto ezinhle siyabe sihamba phambili ekutshengiseni ukuthi siyabathanda. (Efe. 4:32) Akumelanga ugoqe izandla uzitshela ukuthi umfowenu nguye okumele aqalise ukusondela kuwe. Wena khokhela ekwenzeni lokhu. Ungenza njalo uzazibonela sibili ukuthi aliqiniso amazwi kaJesu athi ‘ukupha kuyathokozisa kakhulu ukwedlula ukwamukela.’—Imiseb. 20:35.

10. Kuyini okumele sikukhuthalele? (Khangela lomfanekiso.)

¹⁰ Kulokunye futhi okwakhulunywa ngumphostoli uPhawuli ngemva kokusikhuthaza ukuthi sikhokhele ekuhlonipheni abanye. Wathi: “Khuthalani, lingabi ngamavila.” Umuntu okhutheleyo uyatshiseka futhi angavele aphiwe umsebenzi uwenza ngenhliziyo yonke. IZaga 3:​27, 28 zithi: “Ungayekeli ukubenzela okuhle labo okumele ubancede, nxa kusemandleni akho ukuthi ubancede.” Nxa singabona umuntu efuna ukuncediswa asitshoni sizilazila sizitshela ukuthi kuzaze kufike omunye umuntu amncedise kodwa sihle sithi lothu siyemncedisa.—1 Joh. 3:​17, 18.

11. Kuyini okuzasinceda ukuthi siqinise ubungane bethu labanye?

¹¹ Eyinye indlela esitshengisa ngayo ukuthi siyabahlonipha abanye yikuphangisa ukubaxolela nxa besiphambanisele. U-Efesu 4:26 uthi: “Ilanga kalingatshoni lizondile.” Yindaba? Kuzahamba njani nxa singabaxoleli abanye? Uvesi 27 uthi ‘siyabe sesinika uDeveli ithuba.’ ELizwini lakhe uJehova uhlala esitshela ukuthi sithethelele abanye. UKholose 3:13 uthi: “Qhubekani lithethelelana ngenhliziyo yonke.” Nxa singathethelela abanye sizaba lobungane obuqinileyo. Ukwenza njalo kuzakwenza ukuthi ‘sihlale simanyene emoyeni silokuthula okwenza sibambane sibe munye.’ (Efe. 4:3) Kuyazicacela ukuthi ukuxolela abanye kwenza simanyane futhi sibe lokuthula.

12. UJehova usincedisa njani ukuthi sithethelele abanye?

¹² Liqiniso ukuthi ngezinye izikhathi kungaba nzima ukuxolela umuntu oyabe esizwise ubuhlungu kodwa umoya ongcwele esiwuphiwa nguNkulunkulu ungasincedisa ukuthi sixolele abanye. Ngemva kokusikhuthaza ukuthi sithandane ngenhliziyo yonke lokuthi sikhuthale umphostoli uPhawuli waqhubeka wathi “vuthani emoyeni.” Umuntu ovuthayo emoyeni uyabe etshiseka kulokho akwenzayo ngenxa yokuthi uyabe ekhokhelwa ngumoya ongcwele. Siyakudinga ukuncediswa ngumoya ongcwele kaNkulunkulu ukuze sitshengise abanye ukuthi siyabathanda kakhulu futhi siyenelisa ukubathethelela ngenhliziyo yonke. Yikho sihlala sincenga uJehova ukuthi asincedise.—Luk. 11:13.

“AKUNGABI LOKWAHLUKANA PHAKATHI KWENU”

13. Kuyini okungabangela ukuthi ibandla lidabukane phakathi?

¹³ Ibandla libunjwa ‘ngabantu bemihlobo yonke’ futhi abakhuliswe ngendlela ezitshiyeneyo. (1 Thim. 2:​3, 4) Lokhu kutsho ukuthi abantu bazaba lemibono etshiyeneyo endabeni zokugqoka lokuzilungisa, indlela zokwelatshwa lakwezokuzilibazisa. Yikho kumele sinanzelele ukuze izinto lezi zingabangeli ukwehlukana ebandleni. (Rom. 14:4; 1 Khor. 1:10) Njengoba ‘sifundiswa nguNkulunkulu ukuthi sithandane,’ akumelanga sizitshele ukuthi imibono yethu endabeni lezi iqakatheke kakhulu ukwedlula eyabanye.—Flp. 2:3.

14. Kuyini okumele sizimisele ukukwenza futhi kungani?

¹⁴ Okunye okuzasinceda ukuthi sihlale simanyene ebandleni yikuzimisela ukuhlala sikhuluma amazwi akhuthaza abanye. (1 Thes. 5:11) Eminyakeni esanda kwedlula abantu abanengi ababengasafezi inkonzo labanye ababesusiwe ebandleni baqalise ukungena imihlangano babuyela kuJehova. Sibamukela ngazo zombili! (2 Khor. 2:8) Omunye udadewethu owayengasafezi inkonzo okweminyaka elitshumi waya eWolu yoMbuso okokuqala. Uthi: “Abafowethu labodadewethu bangibingelela bebobotheka.” (Imiseb. 3:19) Indlela abafowethu labodadewethu abamamukela ngayo yamnceda njani? Uqhubeka esithi: “Ngazibonela sibili ukuthi uJehova wayengincedisa ukuthi ngiphinde ngithokoze.” Nxa singenza konke esikwenelisayo ukuze sikhulume amazwi akhuthazayo siyabe sivumela ukuthi uKhristu asisebenzise ukuncedisa ‘bonke abakhatheleyo labasindwayo.’—Mat. 11:​28, 29.

15. Kuyini okunye okumele sikwenze ukuze sihlale simanyene? (Khangela lomfanekiso.)

¹⁵ Okunye okuzasinceda ukuthi sihlale simanyene yikunanzelela esikukhulumayo. UJobe 12:11 uthi: “Indlebe ayiwahloli yini amazwi njengolimi lunambitha ukudla.” Njengoba nje umuntu opheka ukudla eqalisa ngokukulabila engakakuniki abanye lathi kumele siqale sicabangisise ngamazwi esifuna ukuwakhuluma singakawakhulumi. (Hubo. 141:3) Kumele sonke sizame ukuthi esikukhulumayo kube ngokwakhayo “ukuze abalaleleyo bancedakale.”—Efe. 4:29.

16. Ngobani okumele bahambe phambili ekunanzeleleni lokho abakukhulumayo?

¹⁶ Amadoda atshadileyo kanye labazali kumele bazibuze ukuthi abakukhulumayo kuyakhuthaza yini. (Kol. 3:​19, 21; Thit. 2:4) Njengoba abadala bebandla bengabelusi bomhlambi kaJehova kumele bananzelele ukuthi abakukhulumayo kuyabakhuthaza futhi kuyabaduduza abanye. (Isaya. 32:​1, 2; Gal. 6:1) IBhayibhili lithi: ‘Ilizwi elikhulunywe ngesikhathi esifaneleyo lihle kakhulu.’—Zaga. 15:23.

TSHENGISA NGEZENZO UKUTHI UBATHANDA NGEQINISO ABANYE

17. Singenzani ukuze kukhanye ukuthi sibathanda ngenhliziyo yonke abafowethu labodadewethu?

¹⁷ Umphostoli uJohane wathi: “Akumelanga sithande ngelizwi kumbe ngomlomo kuphela kodwa kumele sithande ngezenzo langeqiniso.” (1 Joh. 3:18) Kumele sibathande ngenhliziyo yethu yonke abafowethu labodadewethu. Manje singakwenza njani lokhu? Nxa singazinika isikhathi sokuba labafowethu labodadewethu ubungane bethu buzaqina futhi sizabathanda kakhulu. Yikho zinike isikhathi sokuba labafowenu labodadewenu, uxoxe labo emihlanganweni yebandla futhi uhambe labo ekutshumayeleni. Ungakhohlwa lokubavakatshela lapho abahlala khona. Nxa singakwenza konke lokhu siyabe sitshengisa ukuthi ‘sifundiswa nguNkulunkulu ukuthi sithandane.’ (1 Thes. 4:9) Sizazibonela sibili “ukuthi kuhle kangakanani lokuthi kumnandi njani ukuthi abazalwane bahlale ndawonye bemanyene.”—Hubo. 133:1.