UJehova Wenze Sayikholisa Imisebenzi Asinike Yona

UMats lo-Ann-Catrin Kassholm bangena isikolo seGiliyadi ngo-1979. Bathi besuka eGiliyadi bayakuba ngamamishinari e-Iran, eZaire, eTanzania, eMauritius laseMyanmar. Inkulumo eyenziwa ngumfowethu uJack Redford eGiliyadi yabanceda ukuthi bamukele loba yiwuphi umsebenzi abawuphiwayo enhlanganisweni futhi bawenze bethokoza. Thiya indlebe njengoba besilandisela indaba yabo.

Sicela lisilandisele ukuthi lalithola njani iqiniso.

Mats: Ubaba wayehlala ePoland ngesikhathi seMpi Yomhlaba Yesibili futhi wazibonela izinto ezimbi ezazisenziwa yisonto yeRoma. Kodwa wayehlala esithi: “Kumele ukuthi ikhona isonto efundisa iqiniso.” Ngokuhamba kwesikhathi ngazibonela ukuthi ubaba wayeqinisile. Ngangikuthanda ukuthenga amabhuku atshiyeneyo futhi elinye engalithengayo lalisithi The Truth That Leads to Eternal Life. Kwangalela ukuthi ngilibeke phansi ibhuku lelo. Ngalibala ubusuku bonke ngaze ngaliqeda. Ngahle ngananzelela ukuthi ngasengilitholile iqiniso.

Kusukela ngo-April 1972 ngabala amabhuku amanengi aboFakazi bakaJehova futhi ayiphendula yonke imibuzo engangilayo. Ngenza khona kanye okwenziwa yindoda okukhulunywa ngayo emzekelisweni kaJesu. Indoda le yathi isithole iphareli elihle yahle yahamba yayathengisa zonke izinto eyayilazo yasilithenga. Ngangifuna ukuya eyunivesithi ngiyefundela ukuba ngudokotela, kodwa ngathi sengithole iqiniso ngatshintsha ingqondo. (Mat. 13:​45, 46) Ngabhabhathizwa mhlaka 10 December ngo-1972.

Ngomnyaka ofananayo, abazali bami lomnawami ongumfana bafunda iBhayibhili njalo babhabhathizwa. Ngaqalisa ukuphayona ngoJuly 1973. Ebandleni lethu kwakulodade okuthiwa ngu-Ann-Catrin futhi wayephayona. Udade lo othanda uJehova wangithatha umoya yikho ngazibika kuye, sasesitshada ngo-1975. Okweminyaka emine eyalandelayo sasihlala edolobheni elihle kakhulu okuthiwa yiStrömsund eSweden. Kwakumnandi ukutshumayela lapho ngoba abantu abanengi babefuna sibili ukufunda ngoJehova.

Ann-Catrin: Ubaba wafunda ngoJehova esezaqeda izifundo zakhe eyunivesithi eseStockholm. Ngangilenyanga ezintathu kuphela ngalesosikhathi kodwa ubaba wayehamba lami emihlanganweni yebandla lasekutshumayeleni. Lokho akumphathanga umama ngoba wayengabathandi oFakazi. Kodwa ngokuhamba kwesikhathi laye wafunda iqiniso njalo wabhabhathizwa. Mina ngabhabhathizwa ngileminyaka engu-13 kwazothi sengileminyaka engu-16 ngaqalisa ukuphayona. Ngasuka ngaya e-Umeå, indawo eyayilabamemezeli abalutshwana futhi ngiseselapho ngaba liphayona eliqakathekileyo.

Mina loMats sesincedise abantu abatshiyeneyo ukuthi bafunde ngoJehova. Omunye wabo yintombazana okuthiwa nguMaivor eyatshiya umdlalo eyayiwuthanda kakhulu ukuze ikhonze uJehova. UMaivor waphayona lomnawami futhi bangena bonke ikilasi yeGiliyadi ngo-1984. Khathesi bangamamishinari e-Ecuador.

Kuyini okulincede ukuthi lihlale lithokoza ngesikhathi lisenza imisebenzi yenkonzo etshiyeneyo?

Mats: Izikhathi ezinengi besilokhe sitshintshwa imisebenzi esiyenzela uJehova futhi lokho akulula. Okusincede kakhulu ngezikhathi ezinjalo yikuzama ukulingisela uJesu, ikakhulu endabeni yokuthobeka. (Kol. 2:​6, 7) Sasisithi singafika endaweni entsha sizame ukufunda amasiko lendlela abantu labo abaphila ngayo kulokukhangelela ukuthi kube yibo abatshintshayo benze njengathi. Ukuzama ukulingisela uJesu kusenze sathokoza kungelani lokuthi singaphi.—Hubo. 1:​2, 3.

Ann-Catrin: Nxa isihlahla singaqutshulwa lapho ebesikhona besesigxunyekwa kweyinye indawo, kuyabe kumele sithole ilanga ukuze siqhubeke sikhula kuhle. UJehova ube njengelanga kithi ngoba usiphe abafowethu labodadewethu abasithandayo abasenza sizizwe sikhudumala. (Hubo. 84:11) Ngokwesibonelo ngesikhathi sisebandleni elincane eTehran, e-Iran abafowethu ladodadewethu babehlala besinxusa emizini yabo njalo besitshengisa ukuthi bayasithanda. Nxa sicabanga ngabo sikhumbula khona kanye okwakusenziwa ngabantu ababelomusa okukhulunywa ngabo eBhayibhilini. Ngabe kwakusiya ngathi sasizazihlalela e-Iran ngoba sasizikholisela. Kodwa ngoJuly 1980, uhulumende wathi oFakazi abasavunyelwa elizweni lelo futhi satshelwa ukuthi siphume siphele kungakedluli amalanga amabili. Yikho sathutha saqonda eZaire (khathesi sokuthiwa yiCongo.)

Ngakhala ezimathonsi ngesikhathi ngisizwa ukuthi kwasekumele siye e-Africa. Ngangihlala ngisizwa kuthiwa kugcwele inyoka lemikhuhlane. Kodwa sancedwa ngabangane bethu abahlala e-Africa okweminyaka leminyaka. Bathi: “Lingesabeli khatshana. Lina alikaze liye e-Africa, lizamangala selingasafuni lokusuka khona!” Babeqinisile sibili ngoba abafowethu labodadewethu basamukela ngazo zombili. Ngemva kweminyaka eyisithupha silapho, uhulumende wathi oFakazi abasavunyelwa elizweni leZaire yikho kwasekumele sisuke futhi lokhu kwasizwisa ubuhlungu kakhulu. Ngathandaza kuJehova ngisithi, “Sicela ukuhlala e-Africa.” Ngahleka ngedwa sengikhumbula ukuthi yimi lowana owayengafuni ukuya e-Africa.

UJehova ulibusise njani?

Mats: Silabangane abanengi abasithandayo abangamamishinari abavela ezindaweni ezitshiyeneyo. Kwamanye amazwe sasifunda iBhayibhili labantu abanengi futhi lokho kwakusithokozisa kakhulu. Kwezinye izikhathi sasifunda labantu abangu-20 inyanga ngayinye. Okunye engingasoze ngikukhohlwe yindlela abazalwane ababesiphatha ngayo nxa sibavakatshele. Imota esasihamba ngayo yiyo esasihlala kuyo. Abafowethu labodadewethu babesiba leqiniso lokuthi silayo yonke into lanxa bona babezidubekela. (2 Khor. 8:3) Okunye engikukholisa kakhulu zingxoxo ezimnandi engiba lazo lomkami. Nsuku zonke siyaxoxa ngezinto esizikholisileyo mhlalokho besesibonga uJehova ngendlela asithanda ngayo.

Ann-Catrin: Mina engikukholisa kakhulu yikuba phakathi kwabafowethu labodadewethu abayimihlobo etshiyeneyo. Ngakukholisa lokufunda isiFarsi, isiFrench, isiLuganda, lesiSwahili kanye lamasiko atshiyeneyo. Sathola abangane abanengi, saqeqetsha abafowethu labodadewethu abanengi futhi sasebenza labo ‘simanyene’ emsebenzini kaJehova.—Zef. 3:9.

Sasihamba endaweni ezitshiyeneyo futhi sasibona izinto ezinhle okwamagama ezidalwe nguJehova. Bekungani sihamba endaweni zonke lezi sikhokhelwa nguJehova. Usifundise izinto ezinengi kakhulu, ebesingeke sizifunde sisodwa.

Yibuphi ubunzima elidlule kubo futhi uJehova ulincedise njani?

Mats: Sake sahlaselwa yimikhuhlane etshiyeneyo okugoqela lemalariya. Umkami yena uke wa-opharethwa izikhathi ezithile. Okunye okwakusincitsha ubuthongo yikuthi abazali bethu basebegugile. Kodwa siyababonga kakhulu abanawethu ngoba benza konke abakwenelisayo ukuze babancedise. Babekezela sibili njalo bawenza bethokoza umsebenzi wokubanakekela. (1 Thim. 5:4) Sasike sikhathazeke kakhulu ngabazali bethu size sifise ukuthi aluba sasiseduze ukuze sibone ukuthi sasingabancedisa njani kulokubancedisa sikhatshana.

Ann-Catrin: Sathi siseZaire ngo-1983 ngahlaselwa yi-cholera. Udokotela watshela uMats ukuthi sihle siphume eZaire mhlalokho. Kusasa kwakhona sagada indizamtshina ethwala impahla ngoba yiyo yodwa eyayisiya eSweden.

Mats: Sakhala ezimathonsi sesicabanga ukuthi ukuba ngamamishinari kwasokuphelile. Lanxa udokotela wayecabanga ukuthi umkami wayengasoze asile, wacina esilile. Ngemva komnyaka sabuyela eZaire sayangena lebandla lesiSwahili eLubumbashi.

Ann-Catrin: Ngesikhathi siseLubumbashi ngazithwala kodwa ngaswela. Sasingakuhlelanga ukuthi sizakuba lomntwana kodwa kwasidabula kakhulu ukufelwa lusane lolu singakalubambi ngezethu. Sisadabuke njalo uJehova wasiduduza ngendlela emangalisayo. Saqalisa ukufunda iBhayibhili labantu abanengi kakhulu. Ebandleni lethu kwakulabamemezeli abangu-35 kodwa umnyaka ungakapheli basebengu-70. Emhlanganweni yebandla sasijayele ukuba ngu-40 kodwa sacina sesifika ku-220. Sasingene sacwila emsebenzini kaJehova futhi wasibusisa kakhulu. Konke lokhu kwawathoba amanxeba ethu. Kulezikhathi esiyake sidane khona sicabanga ngosane lwethu kodwa okusiduduza kakhulu yikucabanga ngentokozo esizakuba layo emhlabeni omutsha ngoba uJehova uzabuqeda du bonke ubuhlungu.

Mats: Kulesikhathi lapho umkami ayesehlala khona ediniwe, ezizwa engelamandla. Mina ngabanjwa imvukuzane futhi nga-opharethwa. Khathesi sengingcono kakhulu futhi umkami laye lokhe eqhubeka esenza akwenelisayo emsebenzini kaJehova.

Siyakwazi ukuthi ayisithi sodwa esiphakathi kwenhlupho. Ngemva kwempi eyabakhona eRwanda ngo-1994, savakatshela abafowethu labodadewethu ababehlala ezinkambeni zeziphepheli. Kwasithinta kakhulu ukubona indlela ababeqinisela ngayo, beqhubeka belokholo futhi besamukela kuhle abanye lanxa babesebunzimeni. Sazibonela sibili ukuthi uJehova kasoze abalahle abantu bakhe loba sekutheni.—Hubo. 55:22.

Ann-Catrin: Ngo-2007 kwanikelwa izakhiwo zegatsha le-Uganda. Sathi sisuka lapho sangena ebhasini silamanye amamishinari labanye abasebenza eBhetheli saqonda eNairobi, eKenya. Sisonke sasingafika 25. Sathi sesizafika e-border, kwathutsha eyinye imota ithelile yathuza ibhasi esasikuyo. Sadabuka kakhulu ngoba umtshayeli webhasi esasikuyo labafowethu abathathu kanye labodadewethu ababili bahle bafela khonapho. Omunye udadewethu wafela esibhedlela. Sikulindele ngabomvu ukuphinda sibabone nxa sebevusiwe!—Jobe. 14:​13-15.

Amanxeba engaba lawo ngenxa yengozi leyana asepholile. Kodwa mina lomkami labanye abasila engozini le sasala silohlupho lokukhathazeka. Kwezinye izikhathi ngiyake ngethuke ebusuku sengicabanga ingozi eyasehlelayo. Kodwa ukuhlala sithandaza kuJehova ngenhliziyo yonke lokubala amavesi asiduduzayo kusincede kakhulu. Sahamba sayabona labodokotela ukuze basincedise ukuthi singakhathazeki kakhulu. Khathesi sesingcono sibili futhi sihlala sithandaza kuJehova simcela ukuthi ancedise labanye abangabe bephakathi kobunzima obufanana lobethu.

Like lathi uJehova waliphatha njengamaqanda. Sicela lisichasisele ukuthi litshoni.

Mats: Nxa umuntu ethwele amaqanda uwabamba ngonanzelelo ukuze angawabulali. Yikho kanye uJehova asenzele khona. Ubehlala esisekela ngaso sonke isikhathi emsebenzini wakhe. Sizibonele sibili ukuthi uyasiqakathekisa lokuthi uyasithanda ngoba asizange siswele lutho. Uphinde wasisekela esebenzisa iQula Elikhokhelayo.

Ann-Catrin: UJehova wasincedisa ngeyinye indlela esasingayikhangelelanga. Ngelinye ilanga ngathola umbiko wokuthi ubaba ulalisiwe esibhedlela eSweden ngapha umkami wayebanjwe imalariya. Sasingelamali yokuya eSweden yikho sasesicabanga ukuthengisa imota. Sathi sisacabanga ukuthi senzeni safonelwa ngeyinye indoda lomkayo besitshela ukuthi bazwile ukuthi ubaba uyagula njalo babefuna ukubhadalela omunye wethu ukuthi ahambe. Saphinda safonelwa ngomunye udade osekhulile esitshela ukuthi wayefuna ukusinika imali ayeyigcinele ukuncedisa loba ngubani owayesebunzimeni. Elamhlalokho lingakatshoni sasesilayo imali yokuthi siye eSweden. Simbonga singaqedi uJehova!—Heb. 13:6.

Njengoba selileminyaka engu-50 lisenkonzweni yesikhathi sonke, lingathi kuyini elikufundileyo?

Ann-Catrin: Kubo bonke ubunzima lenhlupho ebesihlangana lazo, uJehova ubesincedisa ukuthi sihlaliseke ngoba simthemba ngenhliziyo yonke. (Isaya. 30:15; 2 Imilan. 20:​15, 17) Asizisoli ngitsho ngokuthi sakhetha ukusebenzela uJehova enkonzweni yesikhathi sonke futhi siswele lokuthi sizifake ngaphi izibusiso asinike zona.

Mats: Into engiyifundileyo yikuthi kumele ngimthembe uJehova ngazo zonke izikhathi ngoba yena uzahlala engincedisa. (Hubo. 37:5) Kakaze abalahlise abantu bakhe. Lalamuhla uJehova ulokhe esincedisa njengoba sesimsebenzela sisegatsheni leMyanmar.

Asithandabuzi ukuthi uJehova uzabancedisa bonke abasakhulayo abafuna ukumsebenzela besenkonzweni yesikhathi sonke. Bazazibonela sibili ukuthi kabathontisi lokuthi uzabancedisa ukuthi baqhubeke bethokoza kungelani lokuthi yiwuphi umsebenzi wenkonzo abawenzayo.