IMIBUZO EBUZWA NGABASAKHULAYO
Kuyini Okumele Ngikwenze Nxa Sengibhabhathiziwe?—Ingxenye 2: Hlala Uqotho
IBhayibhili lithi: “UJehova kasoze abancitshe okuhle labo abaqotho kuye.” (IHubo 84:11) Kutshoni ‘ukuba qotho’? Kutsho ukuphila ngendlela etshengisa ukuthi uyasigcina isithembiso owasenza kuJehova ngesikhathi uzinikela kuye. (UmTshumayeli 5:4, 5) Ungaqhubeka njani uqotho ngemva kokubhabhathizwa?
Okusesihlokweni lesi
Qhubeka ubekezelela inhlupho
Umbhalo: “Kumele sidlule phakathi kwenhlupho ezinengi ukuze singene eMbusweni kaNkulunkulu.”—ImiSebenzi 14:22.
Okutshiwo yivesi le: Wonke amaKhristu azahlangana lobunzima ekuphileni. Ezinye inhlupho ozahlangana lazo yikuchothozwa lokuphikiswa ngenxa yokuthi ungumKhristu. Ezinye inhlupho ezinjengokuswela imali loba ukugula zehlela bonke abantu nje.
Okungenzakala: Izimo zingatshintsha loba nini kumbe zenzakale ngendlela ongayithandiyo. IBhayibhili lithi izinto ezimbi zingehlela loba ngubani, kungelani lokuthi umuntu lo ngumKhristu loba hatshi.—UmTshumayeli 9:11.
Ongakwenza: Njengoba usazi ukuthi uzahlangana lenhlupho kumele ulungiselele ukumelana lazo. Kumele ubone ubunzima njengethuba elihle lokuqinisa ukholo lwakho lelokutshengisa ukuthi uthembele kuJehova. (UJakhobe 1:2, 3) Ungaqhubeka uqinisela nxa uphakathi kobunzima uzazibonela ukuthi amazwi akhulunywa ngumphostoli uPhawuli aliqiniso. Wathi: “Ngilamandla okwenza zonke izinto ngenxa yalowo ongipha amandla.”—KwabaseFiliphi 4:13.
OKWENZAKALA KOMUNYE. “Ngisanda kubhabhathizwa abanewethu batshiya ukukhonza, abazali bami baqalisa ukugula lami ngagula. Kwakungaba lula ukuthi ngikhalale, ngikhohlwe ukuthi ngesikhathi ngizinikela kuNkulunkulu ngamthembisa ukuthi ngizaqakathekisa ukumkhonza ukwedlula loba yini. Kodwa ukukhumbula ukuthi ngangizinikele yikho okwanginceda ngenelisa ukumelana lalobo bunzima.”—UKaren.
Ongakuzama: Funda ngoJosefa. Ungabala ngempilo yakhe kuGenesisi isahluko 37 lo-39 kusiya ku-41. Ngesikhathi ubala cabangisisa ngemibuzo le: Yibuphi ubunzima obamehlela engakhangelelanga lokuthi wamelana labo njani? UJehova wamncedisa njani uJosefa?
Okunye okungakunceda
Bala Okulandelayo:
“Ngingabhekana Kanjani Nesenzakalo Esibuhlungu?”
Dawuniloda:
“Lapho Umzali Egula”
Qhubeka umelana lezilingo
Umbhalo: “Lowo lalowo ulingwa ngokudonswa langokuhugwa yisifiso sakhe.”—UJakhobe 1:14.
Okutshiwo yivesi le: Ngezinye izikhathi sonke siyake silingwe yizifiso zethu okokuthi nxa singekela ukuzibamba singacina senze okubi.
Okungenzakala: Nxa usubhabhathiziwe, uzabe ulokhu uhlutshwa ‘yizifiso zenyama.’ (2 UPhetro 2:18) Ungalingeka lokuthi uye emacansini ungakatshadi.
Ongakwenza: Lungiselela khathesi ungakahlangani lezilingo ukuze ungavumeli izifiso zakho zikufuqe ukuthi wenze izinto ezingaqondanga. Khumbula ukuthi uJesu wathi: “Kakho ongasebenzela amakhosi amabili.” (UMathewu 6:24) Ungazikhethela ukuthi ngubani ofuna abe yinkosi yakho. Khetha uJehova. Lanxa isilingo singaba lamandla anganani ungakhetha ukungaweli kuso.—KwabaseGalathiya 5:16.
Ongakuzama: Woba kwazi lapho obuthakathaka khona lalapho olamandla khona. Khetha abangane abazakukhuthaza ukwenza okuhle. Xwaya abantu, izindawo, lezimo ezingenza kube nzima ukuthi wenze okuqondileyo.—IHubo 26:4, 5.
Okunye okungakunceda
Bala Okulandelayo:
“Ngingazibalekela Njani Izilingo?”
“Ngingenzani Ukuze Ngingahlali Ngicabanga Ngezemacansini?”
Qhubeka ukhuthele
Umbhalo: ‘Ngamunye wenu kumele akhuthale kuze kube sekucineni. Lokhu kuzalinceda ukuthi lingabi ngamavila.’—KumaHebheru 6:11, 12.
Okutshiwo yivesi le: Kulula ukuthi umuntu ongaqakathekisi umsebenzi wakhe ehlise ijubane futhi avilaphe.
Okungenzakala: Akuthandabuzwa ukuthi wathokoza kakhulu futhi wawukhuthele usanda kubhabhathizwa. Wawumthanda sibili uJehova. Kodwa kungenzeka ukuthi ngokuhamba kwesikhathi ubone sekunzima ukuthi uqhubeke ulalela uJehova kukho konke. Lokhu kungakuqeda amandla ucine ungasakhuthalanga.—KwabaseGalathiya 5:7.
Ongakwenza: Qhubeka usenza okuhle lanxa ngezinye izikhathi inhliziyo yakho iyabe ingavumi. (1 KwabaseKhorinte 9:27) Ukuqhubeka ufunda ngoYihlo osezulwini futhi ukhuluma laye ngomthandazo kuzakunceda ukuthi usondele kuye. Kanti njalo qhubeka usakha ubungane obuseduze lalabo abathanda uJehova.
Ongakuzama: Khumbula ukuthi uJehova uyakuthanda kakhulu futhi uzimisele ukukuncedisa. Ungacabangi ukuthi ukuzondele nxa uke wehlisa ijubane okwesikhatshana. IBhayibhili lithi: “Odiniweyo uyamnika amandla labamdambiyana ubapha amandla amakhulu.” (U-Isaya 40:29) Ngokuhamba kwesikhathi uzakubusisa ngenxa yalokho okwenzayo ukuze uphinde ukhuthale.
Okunye okungakunceda
Bala Okulandelayo:
“Bantwana—‘Qhubekani Lisebenzela Ukusindiswa Kwenu’”
Bukela Ividiyo Le:
Zwana Ukuthi Abentanga Yakho Bathini—Impilo Engcono Kulazo Zonke
Ongacabangisisa ngakho: Nxa ungahlala uqotho uzakwenza inhliziyo kaJehova ithokoze! (IZaga 27:11) UJehova uzathokoza nxa ungakhetha ukusekela yena futhi uzakunika loba yini oyidingayo ukuze umelane loSathane nxa ekuhlasela.