Kambe Imincintiswano Yama-Olympics Ingabamanyanisa Yini Abantu?—IBhayibhili Lithini Ngakho?

Kukhangelelwe ukuthi imidlalo yama-Olympics ka-2024 elabadlali abangu-206 abavela emazweni atshiyeneyo ibukelwe ngabantu abangaba yi-5 bhiliyoni. Umongameli we-International Olympic Committee okuthiwa nguThomas Bach uthi: “Imidlalo le yenza abantu emhlabeni wonke bamanyane futhi babe lokuthula. Asisikholiseni isikhathi lesi ngoba sisikhumbuza ukuqakatheka kokuhlalisana ngokuthula lokumanyana kungelani lokuthi siyimihlobo etshiyeneyo.”

Kambe imincintiswano yama-Olympics ingabamanyanisa sibili abantu? Kuyini okuzakwenza abantu babe lokuthula njalo bamanyane?

Imincintiswano yama-Olympics ingabamanyanisa yini abantu?

Ama-Olympics alonyaka enze abantu bacabanga ukulungisa izindaba ezihluphayo ezinjengokungahlalisani kuhle kanye lezombusazwe. Ezinye zezinto abafuna ukuzilungisa yizindaba zamalungelo abantu, ukubandlululana ngemihlobo langalokho umuntu akukholwayo lokuthi abanye bayathola ikanti abanye bayaswela.

Abanye bayazikholisela nje ukubukela imidlalo efanana leyama-Olympics. Imidlalo le iyabahlanganisa sibili abantu okwesikhatshana kodwa ayenelisi ukubenza bahlale belokuthula njalo bemanyene. Kulokuthi yenze njalo iveza egcekeni imicabango lezenzo ezibenza bangamanyani.

IBhayibhili lavela lakhuluma ngezenzo zabantu ezenza kube nzima ukuthi bamanyane. (2 KuThimothi 3:1-5) Ukuze ufunde okunengi ngesiphrofetho lesi, bala isihloko esithi “IBhayibhili Laphrofetha Yini Ngalokho Okwenziwa Ngabantu Kulezinsuku?”

Kuyini okuzakwenza abantu babe lokuthula njalo bamanyane?

IBhayibhili lithembisa ukuthi bonke abantu emhlabeni bazamanyana. Lithi bazamanyana nxa sebebuswa nguhulumende osezulwini obizwa kuthiwa ‘nguMbuso kaNkulunkulu.’—ULukha 4:43; UMathewu 6:10.

INkosi yoMbuso kaNkulunkulu uJesu Khristu, izakwenza kube lokuthula emhlabeni wonke. IBhayibhili lithi:

• ‘Olungileyo uzaphumelela njalo kuzakuba lokuthula kuyo yonke indawo.’—IHubo 72:7.

• ‘Izalamulela umyanga okhalela uncedo. Izabakhulula ekuhlukuluzweni lasebantwini abalodlakela.’—IHubo 72:12, 14.

Lalamuhla lokho okwafundiswa nguJesu sekumanyanise amamiliyoni abantu emazweni angu-239. OFakazi bakaJehova emhlabeni wonke sebefunde ukuhlalisana ngokuthula labantu bonke. Ukuze ufunde okunengi, bala iNqabayokulinda elesihloko esithi “Kuyini Okungasinceda Ukuthi Singabazondi Abanye?”