Ilembu Lokungcwaba EliseTurin Yilo Yini Elaligoqele Isidumbu SikaJesu?

Impendulo yeBhayibhili

Abantu abanengi bacabanga ukuthi ilembu lokungcwaba eliseTurin yilo elaligoqele isidumbu sikaJesu ngesikhathi engcwatshwa. Lokhu kwenza abantu bezinye inkolo bacabange ukuthi ilembu leli lingcwele. Kulesakhiwo samaKatolika esiseTurin e-Italy lapho eligcinwa khona endaweni evikelekileyo. Loba kunjalo iBhayibhili kalisitsheli lutho ngelembu leli.

Lokho elikutshoyo ngokufa kukaJesu kuyahambelana yini lokutshiwo ngabantu mayelana lelembu lokungcwaba eliseTurin? Hatshi.

Nanzi izinto ezintathu ezitshengisa umehluko okhona phakathi kwalokho okucatshangwa ngabantu lokutshiwo liBhayibhili.

1. Ilembu lokungcwaba eliseTurin lingamasentimitha angu-442 ubude langu-113 ububanzi futhi kulelenjana elithungelwe kulo elingamasentimitha angu-8 ububanzi.

   Okutshiwo liBhayibhili: Isidumbu sikaJesu sasingagoqelwanga ngelembu elilodwa kodwa sasigoqelwe ngamalembu amanengi. Ikhanda lakhe lona lalimbozwe ngelinye ilembu. Ngemva kokuvuswa kukaJesu omunye wabaphostoli bakhe wathi efika ethuneni wafica isidumbu singekho “amaqhele elineni ethe qekele khonapho.” IBhayibhili liqhubeka lisithi: ‘Ilembu elalikade limboze ikhanda likaJesu laseligoqiwe lodwa lingekho kwawelineni.’​—UJohane 20:6, 7.

2. Ilembu lokungcwaba eliseTurin lilamatshatha okucatshangwa ukuthi ngawegazi elalisesidunjini sikaJesu.

   Okutshiwo liBhayibhili: Ngemva kokufa kukaJesu abafundi bakhe balungisa isidumbu sakhe belandela “umkhuba wabaJuda wokungcwaba.” (UJohane 19:39-42) Umkhuba lo wawugoqela ukugezisa isidumbu lokusigcoba ngamakha. (UMathewu 26:12; ImiSebenzi 9:37) Yikho kumele ukuthi abafundi bakaJesu baqala bagezisa isidumbu sakhe bengakasigoqeli ngamaqhele.

3. I-Encyclopædia Britannica ithi ilembu lokungcwaba eliseTurin lilomfanekiso wendoda “elele ikhangele phezulu ilandela ubude belembu besekusithi ingxenye yelembu eseleyo imvale kusukela ekhanda kusiya enyaweni.”

   Okutshiwo liBhayibhili: Abafundi bakaJesu baxoxa ngokufa kwakhe langokuthola isidumbu sakhe singekho ethuneni kanye lombiko wabesifazane ‘ababona umbono wezingilosi ezathi uyaphila.’ (ULukha 24:15-24) Aluba ilembu leli lalikhona ethuneni likaJesu futhi lilomfanekiso wakhe, abafundi babezakhuluma ngalo. Kodwa iBhayibhili alitsho ukuthi abafundi bake baxoxa ngakho.

Ilembu leli kumele likhonzwe yini?

Hatshi. Ukukhonza ilembu leli akuqondanga lanxa kungabe kuliqiniso ukuthi isidumbu sikaJesu sagoqelwa ngalo. Ake sixoxe ngokuthi kungani kungamelanga silikhonze.

1. Akulasidingo sokwenza njalo. UJesu wathi: “UNkulunkulu ungumoya, labo abamkhonzayo bamele bamkhonze ngomoya langeqiniso.” (UJohane 4:24) AmaKhristu eqiniso awasebenzisi zithombe ekukhonzeni.

2. Akuvunyelwa. Imithetho Elitshumi ithi ukukhonza izithombe akuqondanga. (UDutheronomi 5:6-10) IBhayibhili lithi: “Xwayani izithombe.” (1 UJohane 5:21) Abanye bangathi ilembu leli alimeli isithombe kodwa luphawu olutshengisa lokho abakukholwayo. Kodwa abananzeleli ukuthi uphawu lucina luyisithombe nxa umuntu eluqakathekisa kakhulu.a Yikho umuntu ofuna ukuthokozisa uNkulunkulu akumelanga akhonze kumbe aqakathekise kakhulu uphawu oluthile okugoqela lelembu leli esixoxa ngalo.