IBhayibhili Lithini Ngokupha?
Impendulo yeBhayibhili
IBhayibhili lisikhuthaza ukuthi sibe ngabantu abaphanayo njalo sikwenze ngenhliziyo yonke. Lithi ukwenza njalo kwenza ophayo lowamukelayo bathokoze. (IZaga 11:25; ULukha 6:38) UJesu wathi: “Ukupha kuyathokozisa kakhulu ukwedlula ukwamukela.”—ImiSebenzi 20:35.
UNkulunkulu uthokoziswa yikupha okunjani?
Uyathokoza nxa esibona sisipha sikhululekile. ILizwi lakhe lithi: “Ngamunye wenu kenze lokho akukhethileyo enhliziyweni yakhe, angenzi elensolo loba ebanjwa ngamandla ngoba uNkulunkulu uthanda umuntu opha ethokoza.”—2 KwabaseKhorinte 9:7.
Ukupha ngokusuka enhliziyweni “yindlela yokukhonza” ethokozisa uNkulunkulu. (UJakhobe 1:27) Umuntu opha ekhululekile uyabe esebenza loNkulunkulu ngoba nxa esipha abanye kufanana lokuthi upha uNkulunkulu. (IZaga 19:17) IBhayibhili lithi uNkulunkulu uzababusisa abantu abaphanayo.—ULukha 14:12-14.
Ngokunjani ukupha okungamthokozisiyo uNkulunkulu?
Ngokwenziwa ngenhloso ezingaqondanga. Nanzi ezinye izibonelo:
Ukufuna ukubukwa ngabantu.—UMathewu 6:2.
Ukuze uphiwe okuthile.—ULukha 14:12-14.
Ukuze uthole ukuphila okungapheliyo.—IHubo 49:6, 7.
Ngokuzakhuthaza umkhuba ozondwa nguNkulunkulu. Ngokwesibonelo akuqondanga ukunika umuntu imali ukuze ayebheja kumbe athenge izidakamizwa loba utshwala ukuze adakwe. (1 KwabaseKhorinte 6:9, 10; 2 KwabaseKhorinte 7:1) Kanti njalo akumelanga unike umuntu isipho esingaba yimali loba okuthile yena engafuni ukusebenza.—2 KwabaseThesalonika 3:10.
Ukupha okuzakwenza uqakathekise abanye abantu ukwedlula imuli yakho. IBhayibhili lithi inhloko zezimuli zilomlandu wokunakekela izimuli zazo. (1 KuThimothi 5:8) Yikho akuqondanga ukuthi inhloko yemuli inike abanye izipho ngapha abemuli yayo bethwele nzima. UJesu wasola abantu ababengasananzi abazali babo besithi impahla abalayo ‘iyisipho esinikelwe kuNkulunkulu.’—UMakho 7:9-13.