UMathewu 6:34—“Lingazihluphi Ngelakusasa”

“Lingaqali ukukhathazeka ngosuku olulandelayo ngoba usuku olulandelayo luzakuba lezalo izinkathazo. Usuku ngalunye lulenhlupho zalo ezilweneleyo.”—UMathewu 6:34, INguqulo Yomhlaba Omutsha.

“Lingazihluphi ngelakusasa, ngoba ikusasa lizazinqinekela lona. Yilolosuku lulohlupho lwalo olulwaneleyo.”—UMathewu 6:34, Holy Bible in Ndebele.

Okutshiwo nguMathewu 6:34

UJesu nguye owakhuluma amazwi la ukuze akhuthaze ababemlalele ukuthi bangakhathazeki kakhulu ngenhlupho ezingakabehleli. Wabatshela ukuthi okwakuzabanceda yikukhangela inhlupho zamhlalokho.

UJesu wayengatsho ukuthi akusamelanga sicabange ngelakusasa kumbe sihlele lokho esifuna ukukwenza esikhathini esizayo. (IZaga 21:5) Kodwa wayesinceda ukuthi singakhathazeki kakhulu ngezinto esingakwaziyo ukuthi zizakwenzakala yini loba hatshi. Ukukhathazeka okunjalo kungasiqedela intokozo kumbe kusenze sehluleke ukwenza izinto okukhangelelwe ukuthi sizenze ngalesosikhathi. Ukukhathazeka ngeke kulungise uhlupho olungakasehleli. Kanti njalo kwezinye izikhathi izinto esikhathazeka ngazo zicina zingenzakalanga kumbe zenzakale ngendlela etshiyene laleyo ebesiyicabanga.

Amanye amavesi asinceda sizwisise uMathewu 6:34

Amazwi la uJesu wawakhuluma eNtshumayelweni Yasentabeni etholakala kuMathewu isahluko 5-7. Entshumayelweni le uJesu wathi ukukhathazeka kakhulu akuyingenzeleli ngitsho impilo. (UMathewu 6:27) Waphinda wathi nxa singaqakathekisa ukukhonza uNkulunkulu asilasizatho sokukhathazeka kakhulu ngekusasa. Njengoba uNkulunkulu enakekela izilimo lezinyamazana, uyabanakekela bonke abamkhonzayo.—UMathewu 6:25, 26, 28-33.