UKUCHASISWA KWAMAVESI ASEBHAYIBHILINI
IZaga 17:17—“Umngane Utshengisa Uthando Izikhathi Zonke”
“Umngane oqotho ulothando ngazo zonke izikhathi, njalo ungumfowenu ozalelwe ukukusiza ngezikhathi zobunzima.”—IZaga 17:17, INguqulo Yomhlaba Omutsha.
“Umngane utshengisa uthando izikhathi zonke, lomzalwane uzalelwa ukusiza ekuhluphekeni.”—IZaga 17:17, The Holy in Ndebele.
Okutshiwo nguZaga 17:17
Umngane weqiniso uthembekile futhi kakulahlisi. Unjengomfowenu kumbe udadewenu ozalwa laye, uba qotho futhi ulendaba lawe ikakhulu nxa usebunzimeni.
“Umngane oqotho ulothando ngazo zonke izikhathi.” Umutsho lo ungahunyutshwa langokuthi “umngane uhlala elothando sonke isikhathi.” Ibala lesiHebheru elithi ‘uthando’ alitsho ukuzwa uthanda omunye umuntu nje kodwa litsho uthando olukhanya ngezenzo. (1 KwabaseKhorinte 13:4-7) Abangane abalothando olunjalo kabatshiyani lanxa ubungane babo bungaphanjaniswa yikungazwanani kumbe ezinye nje inhlupho. Bazimisele ukuthethelelana ngenhliziyo yonke. (IZaga 10:12) Umngane onjalo kabi lomhawu nxa ebona umngane wakhe ephumelela kodwa ujabula laye.—KwabaseRoma 12:15.
“Umngane oqotho . . . ungumfowenu ozalelwe ukukusiza ngezikhathi zobunzima.” Isaga lesi sitshengisa ukuthi abantu abazalwa bonke bajayele ukuzwanana kakhulu. Yikho nxa sisenza konke okusemandleni ethu ukuthi sincedise umngane osebunzimeni siyabe singani sesingubhudi loba usisi walowomuntu. Abangane abalothando olunjalo, ubungane babo buyaqina kakhulu nxa bephakathi kobunzima.
Amanye amavesi asinceda sizwisise uZaga 17:17
Ibhuku leZaga lilamazwi ahlakaniphileyo abhalwe ngendlela enza umuntu acabange. INkosi uSolomoni yiyo eyabhala izahluko ezinengi ezisebhukwini leli. Indlela abhala ngayo isankondlo kodwa hatshi inkondlo esebenzisa amabala ahambelanayo kumbe alemisindo efananayo. Yena ezakhe inkondlo zilemitsho evumelanayo kumbe ephikisanayo. Ngokwesibonelo, uZaga 17:17 ulemitsho evumelanayo, umutsho wesibili ugcizelela lowo owakuqala. Ikanti uZaga 18:24 ulemitsho ephikisanayo. Uthi: “Bakhona abangane abahlala bezimisele ukulimazana, kodwa ukhona umngane oba qotho kuwe ukwedlula umfowenu.”
Ngesikhathi uSolomoni ebhala uZaga 17:17, wayengabe ecabanga ngobungane obuqinileyo uyise uDavida ayelabo loJonathani indodana yeNkosi uSawuli. (1 USamuyeli 13:16; 18:1; 19:1-3; 20:30-34, 41, 42; 23:16-18) Lanxa uDavida loJonathani babengazalwa mama munye, babezwanana kakhulu ukwedlula izelamani. UJonathani wayezimisele lokufaka impilo yakhe engozini ukuze avikele umngane wakhe owayemncane kulaye.a
Indlela UZaga 17:17 Ahunyutshwe Ngayo Kwamanye AmaBhayibhili
“Umngane uyathanda ngaso sonke isikhathi, lomzalwane uzalelwa inhlupheko.”—TBS.
“Umngane ulothando ngezikhathi zonke, lomzalwane uzalelwa izikhathi zenhlupheko”—Holy Bible in Ndebele.
Bukela ividiyo le emfitshane ukuze ubone okumunyethwe libhuku leZaga.
a Bala isihloko esithi “Baba Ngamathe Lolimi.”