UHezekheli
41 Indoda engayibona embonweni yangithatha yangingenisa endaweni engcwele yethempeli, yasilinganisa izinsika. Insika eyayisesandleni sokudla yayizingalo* eziyisithupha ububanzi, esesandleni senxele layo izingalo eziyisithupha ububanzi. 2 Umnyango wawuzingalo ezilitshumi ububanzi njalo imiduli eyayiseceleni yayizingalo ezinhlanu kwelinye icele, lezinhlanu kwelinye. Yalinganisa indawo engcwele futhi yayizingalo ezingu-40 ubude lezingu-20 ububanzi.
3 Yangena endlini engaphakathi* yalinganisa insika yomnyango. Yayizingalo ezimbili ubuqatha futhi umnyango wawuzingalo eziyisithupha ububanzi. Imiduli eyayisemaceleni omnyango yayizingalo* eziyisikhombisa. 4 Ngemva kwalokho yalinganisa indlu eyayikhangele endaweni engcwele futhi yayizingalo ezingu-20 ubude lezingu-20 ububanzi.+ Yasisithi kimi: “Le yiyo iNgcwelengcwele.”+
5 Yasilinganisa umduli wethempeli futhi wawuzingalo eziyisithupha ubuqatha. Izindlu ezazisemaceleni ethempeli ziligombolozele zazizingalo ezine ububanzi.+ 6 Izindlu lezi ezazisemaceleni zazakhiwe zelekana zaba yizitezi ezintathu. Isitezi ngasinye sasilezindlu ezingu-30. Umduli wethempeli wawakhiwe waba lemiqolo okwakuhlaliswe kuyo izisekelo zezindlu ezisemaceleni, kungazange kugujwe umduli.+ 7 Emaceleni womabili ethempeli kwakulamasitephisi ayeqansa ezingeleza esiya ezindlini eziphezulu,+ ehamba eqhela esiba banzi. Amasitephisi la ayeqhubeka esiba banzi nxa esuka ezindlini eziphansi ekhwela edlula kweziphakathi esiya ezindlini eziphezulu.
8 Ngananzelela ukuthi kwakulesitubhu esikhulu esasigombolozele ithempeli. Izisekelo zezindlu ezazisemaceleni zazizingalo eziyisithupha loba umhlanga owodwa ukusuka phansi kusiya phezulu ekhoneni. 9 Umduli ongaphandle wezindlu ezazisemaceleni wawuzingalo ezinhlanu ububanzi. Kwakulendawo engelalutho* phezu kwesitubhu eceleni komduli wezindlu ezazisemaceleni ethempeli.
10 Izindlu zokudlela+ lethempeli kwakwehlukaniswe yindawo eyayizingalo ezingu-20 ububanzi futhi kwakunjalo emaceleni womabili ethempeli. 11 Kwakulomnyango okwakungenwa ngawo nxa usuka endaweni engelalutho usiya ezindlini ezisemaceleni ethempeli. Omunye umnyango wawusenyakatho, omunye useningizimu. Indawo engelalutho eyayisemaceleni ethempeli yayizingalo ezinhlanu ububanzi.
12 Isakhiwo esasisentshonalanga esasikhangele endaweni eligceke sasizingalo ezingu-70 ububanzi lezingu-90 ubude. Umduli wesakhiwo lesi wawuzingalo ezinhlanu ubuqatha emaceleni wonke.
13 Yalinganisa ithempeli, lalizingalo ezingu-100 ubude. Indawo eligceke, lesakhiwo* kanye lemiduli yaso lakho kwakuzingalo ezingu-100 ubude. 14 Icele elisempumalanga kwethempeli kanye leguma eliphambi kwethempeli kwakuzingalo ezingu-100 ububanzi.
15 Yalinganisa ubude besakhiwo esasikhangele endaweni eligceke eyayingemuva kwethempeli kanye lemikoto eyayisemaceleni womabili, kwakuzingalo ezingu-100.
Yaphinda yalinganisa lendawo engcwele, leNgcwelengcwele,+ lamavurandi ayesegumeni, 16 lezitubhu, lamawindi ayebanzi ngaphakathi emancane ngaphandle+ kanye lemikoto okwakusendaweni lezo zontathu. Umduli owawuseceleni kwezitubhu wawulamapulanka+ kusukela phansi kusiyafika emawindini. Kwakunjalo lasemaceleni amawindi. 17 Kwalinganiswa laphezu komnyango lasendlini engaphakathi, laphandle kanye lasemdulini wonke. 18 Kwakubazelwe imifanekiso yamakherubhi+ lemiceciso yezihlahla zelala,+ isihlahla ngasinye sasiphakathi kwamakherubhi amabili. Ikherubhi ngalinye lalilobuso ngapha langapha. 19 Ubuso bomuntu babukhangele isihlahla selala kwelinye icele, besekusithi ubuso besilwane bukhangele isihlahla selala kwelinye icele.+ Yonke imifanekiso le eyayisethempelini yayibazwe njalo. 20 Umduli wethempeli wawubazelwe imifanekiso yamakherubhi lemiceciso yezihlahla zelala kusukela phansi kuze kuyefika phezu komnyango.
21 Umnyango*+ wethempeli wawulingana amacele wonke. Phambi kwendawo engcwele* kwakulento eyayingathi 22 li-alithare elenziwe ngezigodo.+ Lalizingalo ezintathu ukuphakama lezimbili ubude njalo lilezinsika emakhoneni. Ngaphansi lasemaceleni lalenziwe ngezigodo. Indoda engangiyibone embonweni yathi kimi: “Le yiyo itafula ephambi kukaJehova.”+
23 Indawo engcwele yethempeli yayileminyango emibili futhi iNgcwelengcwele layo yayileminyango emibili.+ 24 Umnyango ngamunye wawulezivalo ezimbili, esinye isivalo sasivuleka sisiya kwelinye icele, lesinye sisiya kwelinye icele. 25 Ezivalweni zethempeli kwakubazelwe imifanekiso yamakherubhi lemiceciso yezihlahla zelala njengasemdulini.+ Phambi kwevurandi kwakulophahla lwezigodo olwalulengele ngaphandle. 26 Emaceleni womabili evurandi kwakulamawindi ayebanzi ngaphakathi, emancane ngaphandle,+ futhi kwakulemiceciso yezihlahla zelala. Kwakunjalo lasezindlini ezazisemaceleni ethempeli lasephahleni olwalulengele ngaphandle.