UHezekheli

15 Ilizwi likaJehova laphinda lafika kimi lathi: 2 “Ndodana yomuntu, isigodo sesihlahla samagilebisi sitshiyene ngani lezinye izihlahla kumbe lengatsha zezihlahla eziseguswini? 3 Kuyini ongakwenza ngesigodo leso? Kambe abantu bangasisebenzisa ukulengisa izinto zabo? 4 Nxa singafakwa emlilweni izihloko zaso zombili ziyatsha, sona sisale sihaqazekile. Pho siyabe sisasebenzani? 5 Phela singakatshi besingeke sisetshenziswe ukwenza loba yini. Pho nxa sesitshile sahaqazwa ngumlilo ke? Siyabe singasancedi ngalutho.”

6 “Ngakho nanku okutshiwo yiNkosi Enkulu uJehova: ‘Abantu abahlala eJerusalema ngizabenza lokho engikwenze isigodo sesihlahla samagilebisi phakathi kwezinye izihlahla eziseguswini, esisetshenziswa ukubasa umlilo.+ 7 Ngizabajezisa. Lanxa bephume emlilweni, omunye umlilo uzabatshisa baphele. Lizakwazi ukuthi mina nginguJehova nxa sengibajezisa.’”+

8 “‘Ngizakwenza ilizwe lisale liyinkangala+ ngoba abathembekanga kimi,’+ kutsho iNkosi Enkulu uJehova.”