UHezekheli
19 “Kumele uhlabele ingoma yokulila, ulilela abakhokheli bako-Israyeli, 2 uthi,
‘Unyoko wayeyisilwanekazi phakathi kwezilwane.
Wayelala phakathi kwezilwane ezilamandla njalo esondla imidlwane yakhe.
3 Wondla omunye umdlwane wakhe wakhula waba yisilwane esilamandla.+
Wafunda ukudabudabula izinyamazana,
Waze wadla labantu.
4 Izizwe zezwa ngawo zawubamba emgodini wazo,
Zawudonsa ngezingwegwe zawuletha elizweni leGibhithe.+
5 Unina walinda kodwa wacina ebona ukuthi kwakungathembisi ukuthi ungaphenduka.
Ngakho wathatha omunye umdlwane wakhe wawenza waba yisilwane esilamandla.
6 Lawo waqalisa ukuhamba lezinye izilwane futhi waba yisilwane esilamandla.
Wafunda ukudabudabula izinyamazana waze wadla labantu.+
7 Wabhodabhoda ezinqabeni zabo wabhidliza lamadolobho abo,
Ukubhonga kwawo+ kwazwakala indawo yonke eyayisiyinkangala.
8 Izizwe ezingomakhelwane zabuya zizowubamba ngenethi yazo,
Zawubamba emgodini wazo.
9 Zawudonsa ngezingwegwe zawufaka ekhejini zaseziwuletha enkosini yeBhabhiloni.
Zawuvalela ukuze ilizwi lawo lingaphindi lizwakale ezintabeni zako-Israyeli.
10 Unyoko wayefanana lesihlahla samagilebisi*+ esihlanyelwe eceleni kwamanzi,
Esasithela izithelo futhi silengatsha ezinengi ngenxa yokuthola amanzi amanengi.
11 Saba lengatsha eziqinileyo ezifanele ukuba zintonga zamakhosi.
Sakhula saba side kulezinye izihlahla,
Sabonwa ngumuntu wonke ngenxa yobude baso lengatsha zaso ezinengi.
12 Kodwa saqutshulwa ngolaka+ salahlelwa phansi,
Umoya wempumalanga womisa izithelo zaso.
Ingatsha zaso eziqinileyo zephulwa zasezisoma,+ umlilo wazilobisa.+
13 Khathesi sihlanyelwe enkangala,
Endaweni ewomileyo engelamanzi.+
14 Umlilo wasabalala ezingatsheni zaso watshisa amahlumela aso lezithelo zaso,
Akulagatsha oluqinileyo olwasalayo, lentonga yobukhosi yayingasekho.+
“‘Le yingoma yokulila futhi izahlala iyingoma yokulila.’”