Uthinta Isembatho SikaJesu Asile

AmaJuda ahlala ekhunjini elisenyakatho ntshonalanga yoLwandle LwaseGalile ayezwa ukuthi uJesu usephendukile evela eDekhapholi. Kungenzeka ukuthi amanengi azwile ukuthi uthulise umoya lolwandle ngesikhathi kulesiphepho njalo amanye angabe ekwazi ukuthi usilise amadoda ayelamadimoni. Yikho ‘kulexuku elikhulu’ elizomhlangabeza elibuthene eceleni kolwandle endaweni okungenzeka ukuthi kuseKhaphenawume. (UMakho 5:21) Selilindele ngabomvu ukubona lokho azakwenza njengoba esehla esikepeni.

Omunye olindele ngabomvu ukubona uJesu ngumphathi wesinagogi okuthiwa nguJayirosi. Uyazilahla phansi enyaweni zikaJesu amncenge kanenginengi esithi: “Indodakazi yami encane igulela ukufa. Ngicela ubuye uzoyibeka izandla ukuze isile, iqhubeke iphila.” (UMakho 5:23) UJesu uzakuthini njengoba uJayirosi emncenga ukuthi elaphe indodakazi yakhe enguyedwana, eleminyaka engu-12 kuphela futhi ayithanda kakhulu?​—ULukha 8:42.

UJesu uthi esiya endlini kaJayirosi kwenzakale okunye okuzwisa usizi. Abantu abanengi abahamba loJesu bayazibuza ukuthi bazambona yini esenza esinye isimangaliso. Khonapho exukwini kulowesifazana okhathazeke ngomkhuhlane omubi alawo.

Owesifazana lo ongumJuda usehlutshwe ngumkhuhlane wokopha okweminyaka engu-12. Usebhode kubodokotela abanengi efuna ukwelatshwa njalo useqede imali yonke alayo ezama ukwenza lokho odokotela abamtshela khona. Lanxa kunjalo, umkhuhlane wakhe ‘uyaqina ngamandla’ kulokuthi ube ngcono.​—UMakho 5:26.

Kumele ukuthi umkhuhlane lo umqeda amandla futhi umthelela inhloni. Awusimkhuhlane ongaphongukhuluma ngawo ebantwini. Kanti njalo uMthetho kaMosi uthi owesifazana osesikhathini ungcolile. Loba ngubani omthintayo kumbe othinta izembatho zakhe ezilegazi kumele ageze futhi uba ngongcolileyo kuze kube ntambama.​—ULevi 15:25-27.

Owesifazana lo ‘uzwile imibiko emayelana loJesu’ futhi uyamlanda. Njengoba umkhuhlane wakhe umenza abe ngongcolileyo, udabula phakathi kwexuku ezifihlile ezitshela esithi: “Nxa ngingathinta izembatho zakhe zangaphandle nje, ngizasila.” Uthi esethinte umphetho wesembatho sikaJesu ahle ezwe ukopha sekuphelile. ‘Usesilisiwe emkhuhlaneni lo obusumhlukuluze kakhulu.’​—UMakho 5:27-29.

Kusenjalo uJesu ubuza athi: “Ngubani ongithintileyo?” Ubona angani owesifazana lo uzwa njani esizwa umbuzo lo? Impendulo kaPhetro itshengisa ukuthi uyamsola uJesu ngokubuza umbuzo onjalo. Uthi kuye: “Amaxuku akugombolozele futhi ayakuminyezela.” Pho kungani uJesu ebuze wathi: “Ngubani ongithintileyo?” Uthi: “Kulomuntu ongithintileyo ngoba ngiyakwazi ukuthi amandla aphumile kimi.”​—ULukha 8:45, 46.

Owesifazana uyabona ukuthi akusacatsheki abesezilahla phambi kukaJesu esesaba futhi eqhuqha. Ukhuluma phambi kwabo bonke abantu ngomkhuhlane wakhe langokuthi usanda kusila. UJesu uyamduduza athi: “Ndodakazi, ukholo lwakho lukusilisile. Hamba ngokuthula, usile emkhuhlaneni wakho obukuhlukuluza.”​—UMakho 5:34.

Kusegcekeni ukuthi Lowo uNkulunkulu amkhethe ukuthi abuse umhlaba ulomusa lozwelo futhi ulamandla okunceda abantu.