“UNkulunkulu Kalunganga Yini?”

1. Sizwa njani nxa sibona abantu bephathwa kubi?

UZWA njani nxa ubona abantu bephathwa kubi? Ngokwesibonelo, ubungezwa njani nxa ungezwa ukuthi kulomfelokazi osegugile oqilwe imali yakhe yonke kumbe ukuthi kulosane olulahlwe ngunina, loba ukuthi kulendoda ebotshelwe icala engalenzanga? Akuthandabuzwa ukuthi ubungezwa ubuhlungu. Akusithokozisi ukubona abantu behlukuluzwa yikho sizonda kakhulu nxa singabona abantu bephathwa kubi. Siyabe sifuna ukuthi owonileyo ajeziswe njalo kulungiswe wonke umonakalo ayabe ewenzile. Nxa lokhu kungenzakalanga singazibuza ukuthi uNkulunkulu uyakubona yini okwenzakalayo lokuthi kukhona yini azakwenza.

2. UHabakhukhi wathini ngezinto ezimbi ayezibona futhi kungani uJehova engazange amsole?

² Kusukela kudala izinceku zikaJehova ezithembekileyo zazike zizibuze imibuzo enjengale ephezulu. Ngokwesibonelo, umphrofethi uHabakhukhi wakhuleka kuNkulunkulu wathi: “Kungani ungiyekela ngibona okubi? Kungani ubekezelela abantu abahlukuluza abanye? Kungani impahla zabantu zithunjwa futhi kulodlakela olungaka? Kungani abantu behlala bexabana futhi besilwa?” (UHabakhukhi 1:3) UJehova kazange amsole uHabakhukhi ngemibuzo yakhe ngoba nguye owadala umuntu wamenza waba lesifiso sokubona abanye bephathwa kuhle. Indlela esizwa ngayo nxa sibona abantu behlukuluzwa iyafanana lendlela uJehova azwa ngayo.

UJehova Uyakuzonda Ukubona Abantu Bephathwa Kubi

3. Indlela uJehova abona ngayo okubi itshiyene njani lendlela thina esibona ngayo?

³ UJehova uyakubona konke okungalunganga okwenzakalayo. Ngokwesibonelo wakubona okwakusenziwa ngabantu ngesikhathi sikaNowa. IBhayibhili lithi: “UJehova wabona ukuthi ukuxhwala komuntu kwasekukukhulu emhlabeni lokuthi imicabango yomuntu kanye lezifiso zenhliziyo yakhe kwakukubi sonke isikhathi.” (UGenesisi 6:5) Ivesi le itshengisa ukuthi uJehova uyakubona konke okungalunganga okwenzakala emhlabeni. Thina siyabe sisazi lokho okwenzakale kithi kuphela kumbe okwenzakale kwabanye. Kodwa uJehova yena ukwazi okwenzakala emhlabeni wonke. Kanti njalo uyakubona okusezinhliziyweni zethu kanye lemicabango engalunganga esingabe silayo.—UJeremiya 17:10.

4, 5. (a) IBhayibhili litshengisa njani ukuthi uJehova uyabazwela labo abaphathwa kubi? (b) Kungani singaqiniseka ukuthi uJehova uyabazi ubuhlungu bokuphathwa kubi?

⁴ Nxa uJehova ebona abantu bephathwa kubi uzwa ubuhlungu futhi uyabazwela. Wayebazwela abantu bakhe “nxa bebubula ngenxa yokucindezelwa lokuhlutshwa yizitha zabo.” (ABahluleli 2:18) Mhlawumbe uyake ukunanzelele ukuthi nxa abantu betshona bebona izinto ezimbi zisenzakala, bacina bengasazihluphi ngakho. UJehova yena kanjalo. Lanxa sekwedlule iminyaka engaba ngu-6 000 ebona abantu bephathwa kubi, ulokhu ekuzonda okubi. IBhayibhili lithi uyalwenyanya ‘ulimi oluqamba amanga lezandla ezichitha igazi labantu abangelacala’ kanye ‘lofakazi wamanga ohlala ehutshuza amanga.’—IZaga 6:16-19.

⁵ Okunye okutshengisa ukuthi uJehova uyakuzonda ukubona abantu bephathwa kubi yindlela akhuza ngayo abakhokheli bako-Israyeli ababengalunganga. Wathuma umphrofethi wakhe ukuthi ababuze athi: “Akumelanga likwazi okulungileyo na?” Ngemva kwalokho waveza isihluku sabo egcekeni wasesitsho okuzakwenzakala kubo, wathi: “Bazakhala kuJehova becela usizo, kodwa kasoze abaphendule. Ngalesosikhathi uzabafihlela ubuso bakhe ngenxa yezenzo zabo ezimbi.” (UMikha 3:1-4) Lokhu kutshengisa ukuthi uJehova kathokozi nxa ebona abantu bephathwa kubi. Uyabazwela ngoba laye uyabazi ubuhlungu bokuphathwa kubi. Phela uSathane useleminyaka leminyaka emchothoza. (IZaga 27:11) Okunye okwazwisa uJehova ubuhlungu kakhulu yikubona iNdodana yakhe ‘eyayingenzanga sono’ ibulawa njengesigebenga. (1 UPhetro 2:22; U-Isaya 53:9) Kuyacaca-ke ukuthi uJehova uyabubona ubuhlungu abantu ababuzwayo nxa bephathwa kubi lokuthi uyabazwela.

6. Sizwa njani nxa singaphathwa kubi futhi kungani sisizwa ngaleyondlela?

⁶ Lanxa sikwazi ukuthi uJehova uyakubona konke okubi okwenzakalayo, siyacaphuka nxa singaphathwa kubi kumbe singabona abanye bephathwa kubi. Lokhu kungenxa yokuthi senziwe ngomfanekiso kaNkulunkulu. (UGenesisi 1:27) Yena ulungile njalo uyakuzonda ukubona abantu bephathwa kubi. Pho kungani evumela ukuthi abantu baphathwe kubi?

Indaba Yobukhosi BukaNkulunkulu

7. Chasisa ukuthi ubukhosi bukaJehova bahlaselwa njani.

⁷ Nxa sifuna ukwazi ukuthi kungani uNkulunkulu evumela ukuthi abantu baphathwe kubi kumele siqale sizwisise okwenzakala ensimini ye-Edeni. Njengoba sibonile, uJehova ulelungelo lokubusa umhlaba kanye labo bonke abahlala kuwo ngoba unguMdali. (IHubo 24:1; ISambulo 4:11) Kodwa abantu bathi besanda kudalwa, ubukhosi bukaJehova bahlaselwa. Njani? UJehova watshela u-Adamu ukuthi angadli izithelo zesihlahla sokwazi okuhle lokubi. Kuyini okwakuzakwenzakala nxa wayengekela ukulalela? UNkulunkulu wamtshela wathi: “Uzakufa sibili.” (UGenesisi 2:17) Umlayo uNkulunkulu ayewunike u-Adamu lo-Eva wawunganzima. Lanxa kunjalo uSathane wenza u-Eva wabona angathi umlayo lo ubancitsha inkululeko. Wamqambela amanga wamtshela ukuthi nxa wayengadla izithelo zesihlahla leso wayengasoze afe. Wathi kuye: “Alisoze life loba sekutheni. UNkulunkulu uyakwazi ukuthi ngalo kanye ilanga elizasidla ngalo, amehlo enu azavuleka futhi lizakuba njengoNkulunkulu, likwazi okuhle lokubi.”—UGenesisi 3:1-5.

8. (a) USathane wayefuna u-Eva acabangeni? (b) USathane wabuhlasela njani ubukhosi bukaJehova?

⁸ Ngamanye amazwi uSathane wayesitsho ukuthi uJehova uqambela u-Eva amanga futhi kulento eqakathekileyo amfihlela yona. USathane wenza u-Eva wacabanga ukuthi uNkulunkulu kalathando. Lokhu kwalingcolisa ibizo likaJehova. Akukhulumayo kwenza kwakhanya angathi uJehova kabusi kuhle. USathane kazange ale ukuthi uJehova nguMbusi wendawo yonke kodwa wasola indlela abusa ngayo. Ngamanye amazwi wayesithi uJehova kalalungelo lokubusa futhi kalandaba labantu ababusayo.

9. (a) Ukungalaleli kuka-Adamu lo-Eva kwabangelani njalo yiphi imibuzo eqakathekileyo eyabakhona? (b) Kungani uJehova engazange ahle abhubhise u-Adamu lo-Eva kanye loSathane?

⁹ U-Adamu lo-Eva abazange bamlalele uJehova, badla isihlahla ababetshelwe ukuthi bangasidli. Ngenxa yalokho bafa njengoba nje uNkulunkulu wayetshilo. Kodwa amanga kaSathane enza kwaba lemibuzo eminengi eqakathekileyo enjengokuthi: UJehova ulalo yini sibili ilungelo lokubusa abantu kumbe kumele bazibuse? Ubusa kuhle yini? UJehova wayengahle abhubhise u-Adamu lo-Eva kanye loSathane. Kodwa ukwenza njalo kwakungenza kukhanye angathi uSathane ubeqinisile ngoba yena wayengazange asole amandla kaJehova kodwa wayesole indlela awasebenzisa ngayo. Ngakho ukubabhubhisa kwakungasoze kutshengise ukuthi uNkulunkulu unguMbusi omuhle. Manje kuyini okwasokumele uNkulunkulu akwenze ukuze kukhanye ukuthi nguye okumele abuse? Kwasokumele abanike ithuba lokuthi bazibuse.

10. Abantu baphumelele yini ukuzibusa?

¹⁰ Abantu baphumelele yini ukuzibusa? Hatshi. Lanxa sebezame imihlobo etshiyeneyo yabohulumende, okwenzakalayo kutshengisa ukuthi okutshiwo liBhayibhili kuliqiniso. Lithi: “Nxa umuntu ebuswa ngomunye umuntu uyalimala.” (UmTshumayeli 8:9) Yikho umphrofethi uJeremiya wathi: “Awu Jehova, ngiyakwazi ukuthi umuntu kalamandla okuqondisa indlela yakhe. Umuntu kaliphiwanga ilungelo lokuqondisa izinyathelo zakhe.”—UJeremiya 10:23.

11. Kungani uJehova wavumela ukuthi abantu bahlupheke?

¹¹ UJehova wayevele ekwazi ukuthi nxa abantu bangazibusa inhlupho zizaqhubeka zisanda. Manje kungani wavumela ukuthi abantu bazibuse? Nanku umzekeliso ongasinceda sikuzwisise lokhu: Ake sithi ulomntwana okumele ahlinzwe ukuze elatshwe umkhuhlane oyingozi. Uyakwazi ukuthi ukuhlinzwa lokhu kuzamzwisa ubuhlungu futhi lawe kuyakukhathaza kakhulu. Kodwa uyakwazi lokuthi angelatshwa ngalindlela uzasila. UNkulunkulu wayekwazi ukuthi nxa abantu bangazibusa kuzakuba lobuhlungu lokuhlupheka emhlabeni. (UGenesisi 3:16-19) Kodwa wayekwazi lokuthi nxa bangaphiwa ithuba bazibuse bazazibonela ukuthi nguNkulunkulu kuphela ongenelisa ukuqeda zonke inhlupho zingaphindi zibe khona.

Indaba Yokuba Qotho Kwabantu

12. USathane ubasola esithini abantu?

¹² Ngesikhathi uSathane esola indlela uNkulunkulu abusa ngayo waqamba amanga ngoNkulunkulu futhi wangcolisa ibizo lakhe. Kodwa kulokunye akwenzayo. Wasola abantu wathi bakhonza uNkulunkulu ngenxa yezinto abanike zona. Ngokwesibonelo wathi uJobe kamthandi uNkulunkulu kodwa umkhonza ngenxa yempahla amnike yona. Wathi kuJehova: “Kawumbiyelanga yini yena lendlu yakhe lakho konke alakho? Uwubusisile umsebenzi wezandla zakhe, lezifuyo zakhe zigcwele ilizwe lonke. Kodwa ake welule isandla sakho utshabalalise konke alakho, uzabona uzakuthethisa ekukhangele.”—UJobe 1:10, 11.

13. Wayesitshoni uSathane ngesikhathi esola uJobe njalo abantu bangena njani endabeni le?

¹³ USathane wathi uJehova unika uJobe izibusiso esenzela ukuthi amthande futhi amkhonze. Ngamanye amazwi ayekutsho yikuthi uJobe kamthandi uJehova kodwa umkhonzela ukuthi aqhubeke embusisa. Wathi nxa impahla kaJobe yayingamphelela wayezamthuka uNkulunkulu. USathane wayekwazi ukuthi uJobe wayengafanani labanye ngoba wayeyindoda ‘eqotho, ehlala isenza okulungileyo, emesabayo uNkulunkulu futhi ixwaya okubi.’a Ngakho nxa uSathane wayengenza ukuthi uJobe angabi qotho kuNkulunkulu, kwakuzakhanya angathi uyenelisa ukudukisa loba ngubani. Lokhu kutshengisa ukuthi uSathane wayengasoli uJobe kuphela kodwa wayesola wonke umuntu ofuna ukukhonza uNkulunkulu. Yikho wathi kuJehova: “Umuntu [hatshi uJobe kuphela] uzadela konke alakho ukuze avikele impilo yakhe.”—UJobe 1:8; 2:4.

14. Abantu batshengise njani ukuthi okwatshiwo nguSathane kungamanga?

¹⁴ Kusukela kudala izinceku zikaJehova ezinengi zitshengise ukuthi lokho okwatshiwo nguSathane kungamanga. Ziqhubeke zithembekile njengoJobe lanxa zisebunzimeni. Lokhu kwenza uJehova athokoze futhi aphendule uSathane othi abantu abasoze baqhubeke bekhonza uNkulunkulu nxa belezinhlupho. (KumaHebheru 11:4-38) Abantu abamthandayo uNkulunkulu abazange bayekele ukumkhonza lanxa izimo zinzima. Kodwa baqhubeke bethembela kuJehova ukuthi abanike amandla okubekezela.—2 KwabaseKhorinte 4:7-10.

15. Yiwuphi umbuzo abantu abangazibuza wona ngendlela uJehova ahlulela ngayo?

¹⁵ Indlela uJehova ayiphatha ngayo indaba yokuhlaselwa kobukhosi bakhe kanye lokusolwa kwabantu abamkhonzayo itshengisa ukuthi uhlala esenza okuqondileyo. IBhayibhili liphinda likhulume ngendlela uNkulunkulu ahlulela ngayo abantu endulo kanye lezinye izizwe. Lisitshela lokuthi uzakwahlulela abantu esikhathini esizayo. Kungani singaba leqiniso lokuthi indlela uJehova ahlulela ngayo endulo lazakwahlulela ngayo esikhathini esizayo iqondile?

Kakho Owahlulela Kuhle NjengoJehova

16, 17. Yiziphi izibonelo ezitshengisa ukuthi ngezinye izikhathi abantu kabahluleli kuhle?

¹⁶ IBhayibhili lithi ‘zonke izindlela zikaJehova zilungile.’ (UDutheronomi 32:4) Kodwa thina ngeke sithi zonke izindlela zethu zilungile ngenxa yokuthi ngezinye izikhathi asahluleli kuhle ngoba siyabe singayazi yonke indaba. Ngokwesibonelo cabanga ngo-Abrahama. Wancenga uJehova ukuthi angabhubhisi idolobho leSodoma lanxa abantu bakhona babesenza izinto ezimbi. Wambuza wathi: “Kambe uzatshabalalisa abenza okubi uhlanganise labalungileyo yini?” (UGenesisi 18:23-33) UJehova kazange enze njalo, wamelela uLothi lamadodakazi akhe ukuthi baqale bafike eZowari ‘wasenisa isalufa kanye lomlilo phezu kweSodoma.’ (UGenesisi 19:22-24) Kodwa thina abantu kasahluleli kuhle kwezinye izikhathi. Ngokwesibonelo uJona wamemezela ukuthi idolobho leNiniva lizabhujiswa ngenxa yokuthi abantu balapho babesenza izinto ezimbi. Kodwa bathi bekuzwa lokho batshintsha futhi uJehova waba lesihawu kubo. UJona “wazonda wabila” ngoba yena wayefuna ukuthi lokho ayekukhulumile kwenzakale.—UJona 3:10–4:1.

¹⁷ UJehova waqinisekisa u-Abrahama ukuthi uzasindisa abalungileyo nxa esebhubhisa ababi. Kodwa uJona yena kwakusamele afunde ukuthi uJehova ulesihawu. Nxa ababi betshintsha izindlela zabo, ‘uzimisele ukubathethelela.’ (IHubo 86:5) Abanye abantu baphatha kubi abanye ukuze babatshengise ukuthi balamandla. Abanye bacabanga ukuthi nxa bangaba lozwelo abantu bazabadelela. Kodwa uJehova kanjalo. Uhlala ezimisele ukuba lesihawu kuloba ngubani okumele atshengiswe isihawu.—U-Isaya 55:7; UHezekheli 18:23.

18. Yiziphi izibonelo ezitshengisa ukuthi uJehova wahlulela kuhle?

¹⁸ Lanxa uJehova elesihawu kayekeli ukujezisa abenza okubi. Ngesikhathi abantu bakhe sebetshiye ukukhonza kweqiniso, uJehova wathi kubo: “Ngizalahlulela ngokufanele izenzo zenu, ngilithonisise ngenxa yazo zonke izinto ezenyanyekayo elizenzayo. Angisoze ngilizwele futhi angisoze ngibe lesihawu kini, kodwa ngizalipha umvuzo wezenzo zenu.” (UHezekheli 7:3, 4) Ngakho nxa abantu bengafuni ukutshintsha izenzo zabo, uJehova uyabajezisa. Okuhle ngoJehova yikuthi indaba yakhona uyabe engayiphumputhi. Ngokwesibonelo wathi esizwa insolo ngeSodoma leGomora wathi: “Ngizakwehla ngiyebona ukuthi abakwenzayo kuyahambelana yini lensolo esifike kimi.” (UGenesisi 18:20, 21) Kumele simbonge uJehova ngokuthi kahluleli njengabantu kodwa uqala ayihlolisise indaba! Yikho iBhayibhili lisithi “unguNkulunkulu othembekileyo, kakwenzi okungalunganga.”—UDutheronomi 32:4.

Themba Ukuthi UJehova Wahlulela Kuhle

19. Singenzani nxa singazwisisi indlela uJehova ahlulela ngayo?

¹⁹ Kwezinye izikhathi iBhayibhili kalisitsheli ukuthi kungani uJehova wahlulela abantu ngendlela ethile kumbe ukuthi uzabahlulela njani esikhathini esizayo. Nxa kunzima ukuzwisisa ezinye izindaba loba iziphrofetho eziseBhayibhilini esingatshelwa okunengi ngazo, kumele silindele uNkulunkulu njengomphrofethi uMikha owabhala wathi: “Ngizamlindela ngesineke uNkulunkulu umsindisi wami.”—UMikha 7:7.

20, 21. Kungani singaba leqiniso lokuthi uJehova uzahlala esenza okuqondileyo?

²⁰ Singamthemba uJehova ukuthi uzahlala esenza okuqondileyo. Lanxa abantu bengakhanya bengelandaba lokuphathwa kubi kwabanye, uJehova uthembisa ukuthi uzabajezisa abahlukuluza abanye. Uthi: “Ukuphindisela ngokwami, yimi engizabuyisela.” (KwabaseRoma 12:19) Umphostoli uPhawuli wayemthemba uNkulunkulu yikho wathi: “UNkulunkulu kalunganga yini? Hatshi!” (KwabaseRoma 9:14) Lathi nxa singalindela uJehova siyabe sitshengisa ukuthi siyamthemba.

²¹ Okwakhathesi siphila ‘ezikhathini ezinzima.’ (2 KuThimothi 3:1) Abantu abanengi bayahlupheka ngoba ‘bayacindezelwa.’ (UmTshumayeli 4:1) Kodwa uJehova katshintshanga. Ulokhu ekuzonda ukubona abantu bephathwa kubi njalo uyabazwela abahlukuluzwayo. Nxa singahlala sithembekile kuJehova futhi sisekele ubukhosi bakhe, uzasinika amandla okubekezela kuze kube yisikhathi lapho esusa konke okubi esebenzisa uMbuso wakhe.—1 UPhetro 5:6, 7.