Ungenzani Ukuze Ufunde Okunengi EBhayibhilini?

Sewake wafisa ukwenza into ethile yini kodwa wesaba ngoba ubona angani ngeke wenelise ukuyenza? Kungenzeka wacina uqunga isibindi wasuqalisa ukuyenza kancane kancane. Lokubala iBhayibhili kungakhanya kuyinto enzima. Ungazibuza ukuthi, ‘Ngiqalisele ngaphi?’ Esifundweni lesi sizaxoxa ngezinto ezizakunceda ukuthi ukukholise ukubala iBhayibhili.

1. Kungani kumele ubale iBhayibhili nsuku zonke?

Umuntu obala iBhayibhili kumbe ‘umthetho kaJehova’ nsuku zonke uyaphumelela njalo uyathokoza. (Bala iHubo 1:1-3.) Ngakho zinike isikhathi sokubala okwemizuzu emilutshwana ilanga ngalinye. Ungenza njalo uzacina usukuthanda ukubala iLizwi likaNkulunkulu.

2. Kuyini okungakunceda ukuthi uzwisise okufunda eBhayibhilini?

Zinike isikhathi ‘sokucabangisisa’ ngalokho okubalayo. (UJoshuwa 1:8, amabala angaphansi) Ngesikhathi ubala iBhayibhili zibuze imibuzo le: ‘Lokhu engikubalayo kungifundisani ngoJehova uNkulunkulu? Ngingakusebenzisa njani empilweni yami? Ngingakusebenzisa njani ukuze ngincede abanye?’

3. Kuyini ongakwenza ukuze ube lesikhathi sokubala iBhayibhili?

Abantu abanengi bayasiswela isikhathi sokubala iBhayibhili. Wena-ke? Nxa ulohlupho lolu, zama ‘ukusisebenzisa kuhle isikhathi sakho.’ (Kwabase-Efesu 5:16) Lokhu ungakwenza ngokuhlela isikhathi sokubala iBhayibhili nsuku zonke. Abanye abantu bathola isikhathi sokulibala ekuseni, abanye emini, ikanti abanye balibala bengakayilala. Yisiphi isikhathi esingcono kuwe?

GEBHA UJULE

4. Lawe ungakukholisa ukubala iBhayibhili

Engxenye ukuthola kunzima ukuqalisa ukubala iBhayibhili. Kodwa nxa ungaba lesifiso sokwenza njalo ungacina usukukholisa, njengoba nje umuntu odla ukudla angakujayelanga engacina esekuthanda lokhokudla. Bala u-1 Phetro 2:2 beselixoxa ngombuzo olandelayo.

• Ubona angani ukubala iBhayibhili nsuku zonke yinto ongacina uyikholisa yini?

Bukelani IVIDIYO libone ukuthi kuyini okwenziwa ngabanye ukuze bakholise ukubala iBhayibhili, beselixoxa ngemibuzo elandelayo.

IVIDIYO: Abasakhulayo Bafunda Ukuthanda ILizwi LikaNkulunkulu (5:33)

• Abasakhulayo obabone kuvidiyo babelaluphi uhlupho endabeni yokubala iBhayibhili?

• Kuyini okwabanceda ukuthi babale iBhayibhili nsuku zonke?

• Benzani ukuze bakukholise ukubala iBhayibhili?

Nanku ongakwenza ukuze uqalise ukubala iBhayibhili:

• Sebenzisa iBhayibhili elihunyutshwe ngendlela eqondileyo lelizwisiseka lula. Zama ukubala INguqulo Yomhlaba Omutsha ehunyutshwe ngolimi oluzwisisayo.

• Qala ngokubala ingxenye zeBhayibhili ozithanda kakhulu. Ukuze ubone ukuthi ungaqalela ngaphi bala isihloko esithi “Qalisa Ukubala IBhayibhili Nsuku Zonke” esisekuqaliseni kwebhuku leli.

• Bhala phansi ingxenye osuzibalile. Sebenzisa “Uhlelo Lokubala IBhayibhili” olusebhukwini leli.

• Sebenzisa i-JW Library^® app. Uyenelisa ukuyisebenzisa loba nini ukuze ulalele kumbe ubale iBhayibhili usebenzisa ifoni yakho kumbe okunye okwezempucuko.

• Sebenzisa izengezo eziku-Nguqulo Yomhlaba Omutsha. Uzathola amamephu, amatshathi lengcazelo yamabala azakwenza ukukholise ukubala iBhayibhili.

5. Lungiselela kuhle isifundo ngasinye

Bala iHubo 119:34 beselixoxa ngombuzo olandelayo:

• Kungani kuqakathekile ukuthandaza ungakaqalisi ukubala iBhayibhili lokulungiselela isifundo ngasinye?

Ungenzani ukuze ufunde okunengi esifundweni ngasinye? Ngesikhathi ulungiselela isifundo ngasinye esisebhukwini leli zama ukwenza okulandelayo:

1. Bala indima ngayinye.

2. Bala amavesi asendimeni ubusuzibuza ukuthi angenelana njani lendaba oyifundayo.

3. Dwebela amabala kumbe imitsho ephendula umbuzo ngamunye. Lokhu kuzakunceda nxa usuxoxa lalowo okufundisayo.

Ubukwazi yini?

OFakazi bakaJehova basebenzisa amaBhayibhili atshiyeneyo. Kodwa abalisebenzisa kakhulu yi-Nguqulo Yomhlaba Omutsha ngoba iqondile, izwisiseka lula njalo ilebizo likaNkulunkulu.—Bala isihloko esikuwebhusayithi yethu esithi “OFakazi BakaJehova BaleBhayibhili Labo Yini?”

ISIFINQO

Ukuze uzwisise okubala eBhayibhilini woba lohlelo lokulibala nsuku zonke, uthandaze ungakaqalisi ukulibala futhi ulungiselele isifundo ngasinye esisebhukwini leli.

Ufundeni?

• Ungenzani ukuze uzwisise okufunda eBhayibhilini?

• Yisiphi isikhathi ohlele ukubala ngaso iBhayibhili?

• Kungani kuqakathekile ukulungiselela isifundo ngasinye?

THOLA OKUNENGI

Bala isihloko lesi ubone ukuthi ungenzani ukuze uzwisise okubala eBhayibhilini.

“Ungenzani Ukuze Ulizwisise IBhayibhili?” (INqabayokulinda No. 1 2017)

Bala isihloko lesi ubone izindlela ezintathu ezingakunceda ukuthi ubale iBhayibhili.

“Indlela IBhayibhili Elingakunceda Ngayo—Ingxenye 1: Zijayeze Ukulibala” (Isihloko esikuwebhusayithi yethu)

Bala isihloko lesi uzwe ukuthi ungenzani ukuze ukukholise ukubala iBhayibhili.

“Indlela IBhayibhili Elingakunceda Ngayo—Ingxenye 2: Kukhwabithe Ukulibala” (Isihloko esikuwebhusayithi yethu)

Bukela ividiyo le ukuze uthole amacebo asetshenziswa ngabanye ukuze bakukholise ukubala iBhayibhili.

Taditsha Ngendlela Ezakunceda (2:06)