ISIHLOKO ESISEKUQALISENI
Esakwenzelwa nguNkulunkulu
“UNkulunkulu walithanda ilizwe waze wanikela iNdodana yakhe iyiyo yodwa ukuze kuthi loba ngubani okholwa kuyo angabhubhi kodwa abe lokuphila okungapheliyo.”—UJohane 3:16.
Ivesi leli eliseBhayibhilini laziwa kakhulu njalo lijayele ukucatshunwa kanengi. Kuthiwa akula elinye ivesi elidlula leli “elikucacisa ngamafitshane ukuthi abantu balobuhlobo obunjani loNkulunkulu lokuthi bazasindiswa njani.” Yikho kwamanye amazwe umbhalo lo kumbe sithi “uJohane 3:16” ujayele ukubukiswa emibuthanweni kazulu wonke, ezimoteni kanye lasezintweni zokubukisa ezidwetshwayo.
Kukhanya angani labo ababukisa umbhalo lo bakholwa ukuthi uthando lukaNkulunkulu yilo olwenza bathole insindiso yaphakade. Wena ke? Uzizwa njani ngothando lukaNkulunkulu? Kanti njalo ubona angani uNkulunkulu wenzeni okutshengisa ukuthi uyakuthanda?
“UNKULUNKULU WALITHANDA ILIZWE”
Abantu abanengi bayavuma ukuthi uNkulunkulu nguye owadala umhlaba, imvelo kanye labantu ngokwabo. Izinto eziphilayo zenziwe ngendlela emangalisayo njalo zenziwe kuhle kakhulu okokuthi asithandabuzi ukuthi kulomuntu olenhlakanipho enkulu owazenzayo. Abantu abanengi bayambonga uNkulunkulu nsuku zonke ngenxa yesipho sokuphila. Bayakunanzelela lokuthi nguye kuphela obanika izinto abangeke baphile bengelazo empilweni, ngokwesibonelo umoya, amanzi, ukudla kanye lezinto zemvelo ezenza abantu baqhubeke bephila njalo bekholisa abakwenzayo.
Kumele simbonge uNkulunkulu ngezinto zonke lezi ngoba unguMenzi wethu njalo uyasisekela sibili. (IHubo 104:10-28; 145:15, 16; ImiSebenzi 4:24) Kulula ukuthi sibone ukuthi uyasithanda nxa sicabanga ngakho konke asenzela khona ukuze siqhubeke siphila. Umphostoli uPhawuli wathi: ‘[UNkulunkulu] upha bonke abantu impilo lomphefumulo loba umoya esiwuphefumulayo lokunye konke. Ngokuba siphila kuye sihambe silalame.’—ImiSebenzi 17:25, 28.
Kodwa kulokunye okunengi okutshengisa ukuthi uNkulunkulu uyasithanda ngaphandle kwezinto asipha zona. Wasinika isithunzi njalo wasiqakathekisa ngokusipha ikhono lokuzwisisa ulwazi oluphathelane laye kanye lokusincedisa ukuthi siluqedisise. (UMathewu 5:3, NW) Lokhu kwenza ukuthi abantu abalalelayo babe lethemba lokuba semulini kaNkulunkulu, okutsho ukuthi babe ‘ngabantwabakhe.’—KwabaseRoma 8:19-21.
UJohane 3:16 uqhubeka esitshela ukuthi uNkulunkulu watshengisa ukuthi uyasithanda ngokuthuma iNdodana yakhe, uJesu, emhlabeni ukuthi izosifela njalo isifundise ngoYise. Lanxa kunjalo, abanengi bayavuma ukuthi abakuzwisisi sibili ukuthi kungani kwakumele uJesu afele abantu lokuthi ukufa kwakhe kusitshengisa njani ukuthi uNkulunkulu uyasithanda. Ake sibone ukuthi iBhayibhili likucacisa njani ukuthi kungani uJesu wafa lokuthi kungani ukufa kwakhe kuqakathekile.
“WANIKELA INDODANA YAKHE IYIYO YODWA”
Bonke abantu bayagula, bayaguga njalo bayafa. Kodwa lokhu ayisikho uJehova uNkulunkulu ayekuhlosile ekuqaliseni. Wanika abantu bokuqala ithuba lokuphila okungapheliyo emhlabeni olipharadayisi. Kodwa kwakulento eyodwa okwakumele bayenze: Kwakumele bamlalele. UNkulunkulu wabatshela ukuthi babezakufa bengekela ukulalela. (UGenesisi 2:17) Indoda yokuqala ayilalelanga, yahlamuka yala ukubuswa nguNkulunkulu. Lokhu kwabangela ukuthi kube lokufa. Umphostoli uPhawuli uchasisa ukuthi: “Ngakho-ke njengalokhu isono sangena emhlabeni ngomuntu oyedwa, lokufa ngesono, njalo ngale indlela ukufa kwafika ebantwini bonke, ngoba bonke benze isono.”—KwabaseRoma 5:12.
Kodwa uNkulunkulu “uthanda [ukulunga, NW ].” (IHubo 37:28) Lanxa engasithathanga lula isono sangabomo sendoda yokuqala, kazange akhethe ukuthi abantu bonke bahlupheke njalo bafe kungelathemba ngenxa yokungalaleli komuntu oyedwa. Kulokuthi enze njalo, wasebenzisa isimiso somthetho esithi, “impilo ikhwitshizwe ngempilo,” wenza ukulunga ngokudinga imbadalo ehambelanayo, wasesenza ukuthi abantu abalalelayo benelise ukuthola ukuphila okungapheliyo. (U-Eksodusi 21:23) Umbuzo okhona yikuthi, Impilo epheleleyo eyalahlwa ngu-Adamu yayizatholakala njani? Nansi impendulo: Umuntu othile kwakumele aphe kumbe anikele ngokuphila okupheleleyo okunjengokuka-Adamu.
UJesu wabuya emhlabeni ngokuzithandela wasenikela ngokuphila kwakhe ukuze akhulule abantu esonweni lasekufeni
Kusegcekeni ukuthi inzalo ka-Adamu eyayilesono yayingeke yenelise ukubhadala impilo le kodwa uJesu wayesenelisa. (IHubo 49:6-9) UJesu wayephelele njengo-Adamu ngoba wazalwa engelasono. Yikho-ke, wahlawulela abantu ukuthi bangabi yizigqili zesono ngokunikela ukuphila kwakhe. Ngokwenza njalo, wanika abantwana baka-Adamu lo-Eva ithuba lokuthi labo bathole ukuphila okupheleleyo okwakulahlwe ngabazali babo. (KwabaseRoma 3:23, 24; 6:23) Kulokuthile yini okumele sikwenze ukuze sincedwe yisenzo lesi esitshengisa uthando olukhulu kangaka?
“LOBA NGUBANI OKHOLWA KUYO”
Nxa singakhangela futhi uJohane 3:16, sinanzelela amazwi athi “loba ngubani okholwa kuyo [uJesu] angabhubhi kodwa abe lokuphila okungapheliyo.” Lokhu kutsho ukuthi kulokuthile okumele sikwenze ukuze sithole isipho sokuphila okungapheliyo. Nxa sifuna ‘ukuba lokuphila okungapheliyo’ kumele sikholwe kuJesu njalo simlalele.
Mhlawumbe uyamangala ukuthi: ‘Ukulalela kungena njani lapha? Kanti uJesu katshongo yini ukuthi, ‘loba ngubani okholwa kuye’ uzathola ukuphila okungapheliyo?’ Kuliqiniso ukuthi ukukholwa kuqakathekile. Kodwa kuqakathekile lokukhumbula ukuthi iBhayibhili lithi ukukholwa kukodwa nje akwenelanga. Nxa sifuna ukuba lobuhlobo obuhle loNkulunkulu akumelanga nje sicine ngokwazi ukuthi uJesu unguMsindisi. Umuntu okholwayo kumele azame ngamandla ukulandela lokho okwafundiswa nguJesu. Nxa sisithi silokholo kodwa lungelamisebenzi siyabe siyasoma. IBhayibhili lithi: “Ukukholwa okungelamisebenzi kufile.” (UJakhobe 2:26) Ngamanye amazwi, umuntu okholwayo kumele atshengise ngezenzo ukuthi ulokholo kuJesu okutsho ukuthi kumele enze izinto ezihambelana lokukholwa kwakhe.
UPhawuli ukuchasisa kanje: ‘Uthando lukaKhristu luyasifuqa, ngoba siyakholwa ukuba oyedwa [uJesu] wafela bonke. Wafela abantu bonke ukuze abaphilayo bangaziphileli bona ngokwabo, kodwa lowo owabafelayo wavuswa njalo.’ (2 KwabaseKhorinte 5:14, 15) Umhlatshelo kaJesu singawubonga ngenhliziyo yonke nxa sintshintsha okuthile ezimpilweni zethu, singaziphileli thina, kodwa siphilele uJesu owasifelayo. Kutsho ukuthi ezimpilweni zethu kumele siqakathekise ukulandela lokho uJesu akufundisayo. Lokhu kuzakhanya ezintweni esiziqakathekisayo, izinqumo, kanye lakho konke esikwenzayo. Abatshengisa ngezenzo ukuthi bakholwa kuJesu bazatholani?
“ANGABHUBHI KODWA ABE LOKUPHILA OKUNGAPHELIYO”
Amazwi okucina kuJohane 3:16 asitshela ngalokho uNkulunkulu akuthembisa abalokholo emhlatshelweni wenhlawulo njalo abaphila ngezimiso zakhe. UNkulunkulu uthi labo abathembekileyo ‘abasoze babhubhe kodwa bazaba lokuphila okungapheliyo.’ Ngenxa yothando lukaNkulunkulu, kulamaqembu amabili athenjiswa ikusasa elihle.
UJesu wathembisa elinye iqembu ukuphila okungapheliyo ezulwini. Watshela abafundi bakhe abathembekileyo ukuthi wayesezabalungisela indawo ukuze babuse laye enkazimulweni. (UJohane 14:2, 3; KwabaseFiliphi 3:20, 21) Abazavuswa ukuthi bayephila ezulwini “bazakuba ngabaphristi bakaNkulunkulu labakaKhristu njalo bazabusa laye okweminyaka eyinkulungwane.”—ISambulo 20:6.
Kulenani elithile labalandeli bakaKhristu elizathola isibusiso lesi. Yikho uJesu wathi: “Lingesabi, mhlambi omncane, ngoba uYihlo uthandile ukulipha umbuso.” (ULukha 12:32) Bangaki ababumba ‘umhlambi omncane’? ISambulo 14:1, 4 sithi: ‘Ngabuya ngakhangela, khonapho phambi kwami kwakuleWundlu, limi phezu kweNtaba iZiyoni, lilabayizi-144 000 ababelotshwe ibizo lalo lelikaYise emabunzini abo. Laba bathengwa phakathi kwabantu banikelwa njengezithelo zakuqala kuNkulunkulu laseWundlwini.’ Kulamabhiliyoni amanengi ake aphila kodwa ‘umhlambi omncane’ ubunjwa ngabangu-144 000 kuphela. Njengoba kuthiwa bangamakhosi, bazabusa obani?
UJesu wakhuluma ngelinye iqembu lesibili labathembekileyo elizathola izibusiso ngenxa yoMbuso wasezulwini. KuJohane 10:16 uJesu wathi: “Ngilazo ezinye izimvu ezingasizo zalo umhlambi. Lazo kumele ngizilethe. Lazo futhi zizalilalela ilizwi lami, ukuze kube lomhlambi owodwa lomalusi oyedwa.” “Izimvu” lezo zilindele ukuphila okungapheliyo emhlabeni, ithemba elalilo-Adamu lo-Eva ekuqaliseni. Sikwazi njani ukuthi zizaphila emhlabeni?
IBhayibhili likhuluma kanengi ngokuthi kuzabe kunjani emhlabeni oliPharadayisi. Ukuze uzibonele lokhu, ungavula iBhayibhili lakho ubusubala amavesi la: IHubo 37:9-11; 46:8, 9; 72:7, 8, 16; U-Isaya 35:5, 6; 65:21-23; UMathewu 5:5; UJohane 5:28, 29; ISambulo 21:4. Amavesi la asitshela ukuthi izimpi, indlala, ukugula kanye lokufa, konke kuzaphela. Akhuluma langentokozo ezatholwa ngabantu abalungileyo nxa sebesakha izindlu zabo, belima, njalo bekhulisa abantwababo emhlabeni olokuthula.a Awufisi yini ukukubona kusenzakala lokhu? Silesizathu esihle sokukholwa ukuthi sekuseduze ukuthi izithembiso lezi zigcwaliseke.
UNKULUNKULU USENZELA OKUNENGI KAKHULU
Nxa ungazinika isikhathi sokucabangisisa ngalokho uNkulunkulu akwenzele khona kanye labantu bonke nje, uzakunanzelela ukuthi usenzela izinto ezinengi kakhulu. Silempilo, ukukhalipha, impilakahle kanye lezinto ezidingekayo ezisekela ukuphila. Kanti njalo isipho senhlawulo kaJesu owasifelayo esivela kuNkulunkulu singenza sithole izibusiso ezinkulu kakhulu njengoba sifunda kuJohane 3:16.
Ukuphila okungapheliyo emhlabeni olokuthula lenjabulo, kungela kugula, izimpi, indlala kanye lokufa kuzakwenza sibe lentokozo kanye lezibusiso ezingapheliyo. Kukuwe ukuthi uzikhethele ukuthi uzazithola kumbe kawusoze uzithole izibusiso lezo. Umbuzo osalayo nanku, Wena umenzelani uNkulunkulu?
a Ukuze uthole okunengi mayelana leziphrofetho lezo, khangela isahluko-3 ebhukwini elithi IBhayibhili Lifundisani Sibili? elidindwa ngoFakazi bakaJehova.