Ubonwa Ngabanengi Kungakabi LiPhentekhosti

UJesu uthi esevusiwe ahlele ukuthi abaphostoli bakhe abangu-11 bahlangane laye kwenye intaba eGalile. Abanye abafundi abangaba ngu-500 labo bakhona khonapho njalo abanye babo bayathandabuza ukuthi uJesu uvusiwe. (UMathewu 28:17; 1 KwabaseKhorinte 15:6) Kodwa osekutshiwo nguJesu khathesi kuzanceda ngamunye wabo ukuthi abe leqiniso lokuthi usevusiwe sibili.

UJesu ubatshela ukuthi uNkulunkulu umnike amandla wonke ezulwini lasemhlabeni. Uthi kubo: “Ngakho-ke hambani liyekwenza abantu bezizwe zonke babe ngabafundi, libabhabhathize ebizweni likaBaba leleNdodana lelomoya ongcwele, libafundise ukulandela izinto zonke engililaye zona.” (UMathewu 28:18-20) UJesu usevusiwe sibili njalo ulokhu efuna ukuthi izindaba ezinhle zitshunyayelwe.

Umlayo wokwenza abafundi uphiwa bonke abalandeli bakaJesu kungelani lokuthi ngamadoda, ngabesifazana kumbe ngabantwana. Kungenzakala ukuthi kube labantu ababaphikisayo bezama ukuphambanisa umsebenzi wabo wokutshumayela lokufundisa, kodwa uJesu ubaqinisa athi: “Sengiphiwe amandla wonke ezulwini lasemhlabeni.” Lokhu kuzabanceda njani abalandeli bakhe? Ubatshela athi: “Khumbulani, ngizabe ngilani kuze kube yisiphetho somumo lo wezinto.” UJesu katsho ukuthi wonke umuntu ozakwenza umsebenzi wokutshumayela izindaba ezinhle uzaphiwa amandla okwenza izimangaliso. Lanxa kunjalo, umoya ongcwele uzabancedisa abafundi bakhe.

UJesu ubonakala kubafundi bakhe ‘okwensuku ezingu-40’ ngemva kokuvuswa kwakhe. Phakathi kwensuku lezi ubonakala elemizimba yenyama etshiyeneyo futhi ‘uziveza kubo ephila, ekwenza lokhu ngobufakazi obunengi obucacileyo.’ Kanti njalo ubafundisa “ngoMbuso kaNkulunkulu.”​—ImiSebenzi 1:3; 1 KwabaseKhorinte 15:7.

Kukhanya uJesu utshela abaphostoli bakhe ukuthi babuyele eJerusalema ngesikhathi beseseGalile. Uthi esebonane labo khonale athi kubo: “Lingasuki eJerusalema kodwa qhubekani lilindele lokho uBaba alithembise khona futhi elakuzwa ngami, ngoba lanxa uJohane wabhabhathiza ngamanzi, lina lizabhabhathizwa ngomoya ongcwele ezinsukwini eziseduze.”​—ImiSebenzi 1:4, 5.

UJesu uphinda ahlangane labaphostoli bakhe abesehamba labo ‘baze bayefika eBhethani,’ esempumalanga kweNtaba Yama-Oliva. (ULukha 24:50) Lanxa ubebatshelile ngokuhamba kwakhe, balokhu becabanga ukuthi uMbuso wakhe uzakuba semhlabeni.​—ULukha 22:16, 18, 30; UJohane 14:2, 3.

Abaphostoli babuza uJesu bathi: “Nkosi, usuwubuyisela khathesi yini umbuso ko-Israyeli?” Yena ubaphendula athi: “Kakusikho kwenu ukwazi izikhathi kumbe insuku ezibekiweyo, lezo uBaba azifake ngaphansi kwamandla akhe.” Ngemva kwalokho uphinda abatshele ngomsebenzi okumele bawenze. Uthi: “Lizakwamukela amandla nxa umoya ongcwele ufika kini, njalo lizakuba ngofakazi bami eJerusalema lakulo lonke elaseJudiya leSamariya, kuze kuyefika emaphethelweni omhlaba.”​—ImiSebenzi 1:6-8.

UJesu uqalisa ukukhuphuka esiya ezulwini ngesikhathi elabaphostoli eNtabeni Yama-Oliva. Ngesikhatshana nje iyezi liyamvala basale bengasamboni. UJesu uthe esevusiwe wabonakala elemizimba yenyama etshiyeneyo. Kodwa khathesi utshiya umzimba wenyama abelawo abesesiya ezulwini eseyisidalwa somoya. (1 KwabaseKhorinte 15:44, 50; 1 UPhetro 3:18) Abaphostoli abathembekileyo bathi besakhangele phezulu bathi qaqabu babone eceleni kwabo “sekulamadoda amabili agqoke izembatho ezimhlophe.” Amadoda la ayizingilosi njalo abuza athi: “Madoda aseGalile, limeleni khonapho likhangele esibhakabhakeni? UJesu lo othethwe kini waya phezulu uzakuza ngendlela enjengayonale elimbone ethathwa ngayo esiya esibhakabhakeni.”​—ImiSebenzi 1:10, 11.

UJesu usuke emhlabeni kungelaxuku labantu elimbonayo, bekulabalandeli bakhe abathembekileyo kuphela. Uzaphenduka “ngendlela enjengayonale” kungelaxuku labantu elimbuthaneleyo. Abalandeli bakhe abathembekileyo yibo bodwa abazananzelela ukuba khona kwakhe emandleni oMbuso.

Abaphostoli bayabuyela eJerusalema. Emalangeni alandelayo babuthana labanye abafundi kanye ‘loMariya unina kaJesu labafowabo.’ (ImiSebenzi 1:14) Iqembu leli lihlala lithandaza futhi okunye elikuthandazelayo yikukhetha umfundi ozathatha indawo kaJudasi Iskariyothi ukwenzela ukuthi abaphostoli babe ngu-12. (UMathewu 19:28) Bafuna umfundi owabona imisebenzi kaJesu futhi wambona esevusiwe. Benza inkatho ukuze babone ukuthi uNkulunkulu ukhetha bani njalo lokhu ngokokucina eBhayibhilini lapho okukhulunywa khona ngokwenza inkatho ukuze abantu babone ukuthi uNkulunkulu ufuna benzeni. (IHubo 109:8; IZaga 16:33) Kukhethwa uMathiyasi okungenzeka ukuthi ngomunye wabangu-70 abathunywa nguJesu njalo ‘uqalisa ukubalwa kanye labaphostoli abangu-11.’​—ImiSebenzi 1:26.

Ngemva kwamalanga alitshumi uJesu ekhuphukele ezulwini, kuba loMkhosi WamaJuda WePhentekhosti lika-33 C.E. Abafundi abangaba ngu-120 babuthene endlini ephezulu eJerusalema. Khonokho nje kuba lomsindo ongathi ngumoya ovunguza ngamandla njalo uzwakala endlini yonke. Babona okungathi ngamalangabi omlilo alesimo solimi njalo ahlala emuntwini wonke olapho. Abafundi bonke baqalisa ukukhuluma ngezindimi ezitshiyeneyo. Khathesi sebethululelwe umoya ongcwele uJesu ayebathembise wona.​—UJohane 14:26.